63
7 Yo dəkəbiya nyidar Tlakə nda kəla kwa wura, yo falə nyi aka dəhə sənda cha mərtə mən. Cha səkənyi papa'akur nə Israila 'ual'ual aka tuhuɗənyi ana nyida nyi. 8 Tlakə tə na, <<Na'ana nji inga; da ndo shakər na'a wa.>> Aka ənga cha dləuya nda 9 tsa dəhə ɓwaɓwatu kənda. A da chama ngə wa, kəl nda Tlakə na kərnyi ngə tə dləuya nda. Aku nyida nyi ana tuhuɗənyi cha dləuya nda. Wa'atanyi cha kəkatə nda parakəu, 10 kəl ja, nda tlə mwali nə nyi ga tliya huɗa Shanguɗə Karti nyi. Aka ənga, Tlakə tə shaka ndər dawa kənda ga pa nda. 11 Kəl ngə nda ɗənghatə sənda ɗa yahi, ku bəjir Musa, kadakaliya Tlakəu, ngə jawa ga na, <<Amanə Tlakə nda mbəɗandə nji nyi tsa dəl dəgala? Amanə Tlakə nda tə nənyi shanguɗə nyi nə Musa nda? 12 Amanə Tlakə, nda nənyi gyalkur nyi nə Musa cha mər sə shinshin ni, cha takəbiya ɓitir dəl dəgal tə ləbiya nji nyi tahə kwar dəl, ka cha fiya tləmənyi ba'anawa nda? 13 Cha ləbiya nda tahə kwar dəl wi ngə taku kwa whi tə babal, a tləhi da mada kushu wa, 14 wi ngə njo pal tla ku pama tsung, əngə Shanguɗə Tlakə tə nənda ɓəlsar. Əngə ka nəuna nji nghə Tlakə, ka gwa'atənyi tləm nə kərngha. 15 Tlakəu, ndzamar ea səya kya huɗamələm, mbwa nda kə na ngyatə ku Kartikur ana səli. Aman tuhuɗə nghə nə ea? Aman gyalkur ngha? Aman nyida nghə na tuhuɗə ngha? Ngwa ka da ngya ea wa. 16 Nakə ngə Adan ea. Jival kə ea Ibərahim ana Yakubu da kwa zəndə ea wa, nakə nəngha kwa zəndə ea ka, Tlakəu, Adan ea, nda wa'atanyi kwa dləuya ea.