55
1 <<Shila ma, dəhə hi nda kwa ngatə hili,
shili ma da ɓiti;
nahi nda kəla kwaba,
shili ma, hya ɗəlbiya hya səma!
Shili ma, hya ɗəlbiya anap ana 'ua
a da na kwaba wa, ya buɗətanyi.
2 Mya gwa'atə hyo sanda kwaba təkəra sənda kəla kwa nyandə hya?
Mya gwa'atə hya kwa tsəya wazəba kəhi ya tsəu hyo ngatə huɓa?
səndzi ma himi da ya, hya mər sənda na ya,
hyo uya sərsuma nda tə ndiya na durdur dəhəu.
3 Ngatə ɗa ma sakan ja, nji ɗa i hya shili da ya,
shila ma da ya hyo uya pi!
Yo mər alkawal nda ɓəlnyi da wa nahi
yo nəhi papa'akur nda ya mərtənyi alkawal nə Dauda.
4 La'a ma, ya fiya nyi ka shaida'u nə nji,
gavərma ana dəgalər ləvaləva nə nji.
5 A ngyatə hyo nau tsəmətə nji pampam nda kəla hya zəndi,
nji pampam nda kəla kwa zəndə hi o shil da hi,
ka ngam Hyel Tlakə kəhi,
Ndə Karti nə Israila,
aka cha nəhi səli ana dəgalkur.>>
6 Gwa'a Tlakə manə tsəu njo uya nyi;
nga nyi manə tsəu cha lahəu.
7 Ndər kəmangər cha ngyar nənyi na laku
ndər ɗimikur tsəu cha ngyar nənyi na jiga dəma.
Cha sha shilda Tlakəu, cho uya tuhuɗə kəra kərnyi,
tsa Hyel Tlakən mən, aka cho farna dəhə sə ɗimi nyi.
8 << Aka jigadəma ɗa ada wi jigadəma kəhi wa,
laku ɗa tsəu ada wi laku kəhi wa,>>
9 <<Wi ngə huɗaməlləm naɗəu tsa hə'i,
əngə tanyi tsəu laku ɗa naɗə tsa nə kəhi na laku
ana jigadəma ɗa tsəu naɗə tsa jigadəma kəhi.
10 Wi ngə tə par ana mindindili
kwa səya kya huɗaməlləm,
a da kwa ɓəla gi kəla cha ləɓətə hə'i ka tsandə səu,
tsaka kwa shilna yayar sə'i nə ndər zwa
ana sər suma nə ndər ngatə huɓa.
11 Əngə tanyi ngə ɓwanya nda kwa biya ku nya ya:
A da kwa jwajwa'a wa,
Amma kwa udiya dəhə sənda chimə ya
cha kwa mərtə dəhə sənda ya sə nyi ka cha məra.