53
1 Wa tə dləukəri mafakə kə ea ana nə wa ngə nja chabiyanyi cha Hyel nda na gyalkura?
2 Cha ha amanyi wi ngə tə sənda tə tləu,
ana wi ngilangha sənda kwa tsa ku hə'i 'ul'ul.
A da cha gumaguma ndara cha ɗa ka ndzamə wa,
sənda ku ngyakəngyanyi nda məno chim wa.
3 Nja həyatə cha ga ngyanyi,
(cha ɗa ka) ndər huɗatla, ga tsəlna ɓwaɓwatu.
Cha ɗa wi ndə nda nji kwa whi tsari
nja ngyanyi, wi da cha vanya sə wa.
4 Amma cha susti ɓwaɓwatu ndo nda kina ɗa ka nə kəmən,
iza nda məno nda kina sati.
Dəhə ka ənga mən hətə ənda ɓwaɓwatu nga
ɓu nga nda hya'atə tsa Hyel.
5 Amma ka ngam səpəla'a kəmən cha uya takasa,
dəga ka ngam sə ɗimi nda mən tə məra.
Mən uya mbəa a təwa ɓwaɓwatər ɓua nda cha sati,
mən mbəɗa təwa dəgə nda cha dləutsi.
6 Dəhə mən wi kətəng mən nda tə sa i,
kala zhang kəmən nəu nənyi na laku.
amma ngəu Tlakə tə fəkənyi bikən mən dəhəu,
7 Nja ɗanyi ga nənyi ɓwaɓwatu, amma cha tashiya kərnyi,
a cha mbəɗiya nya cha wa;
nja təɗənyi wi zər gam nda njo ki tla wulya tə kəri,
wi ngə bal'ua amar njir tsəɗə shishinyi ɗiyu,
a cha mbəɗiya nya cha wa.
8 Aku tari jiri nja tlanda nyi nəuma ga təra na cha.
Wa ngə kwa nau ndəra təkəra nyandəla cha?
Nja hənda nyi katsəu tsa hə'i nji inda na pi;
Aka bikər nji kəmən nja tsəya nyi.
9 Nja funyi ku hwa ka njir sə ɗimi,
nja haɗəyanyi ka njir gəna,
mada ngə a cha mər dza'ukur wa,
ya a shakər da ku nya cha wa.
10 Tlakə tə na, <<Ikur ɗa nga ənda cha sa ɓwaɓwatu;
tənyi hatəmachi nga ka cha shilna far bikəu.
aka ənga cho la'a nyandəla cha;
pya cha kwa ɗa 'ualəu,
a təwa tsəu sənda ya kwa i kwa ɗa na papa'akur.
11 Ahir macha sa ɓwaɓwatu, cho ɓəla uya hirgyaɗi səkəu;
cho zəndə ənda a cha sa ɓwaɓwatu ɓwa'atanyi wa.
Kadakaliya ɗa nda yo ngatə məsəɗakəkur nyi,
cho hətə bikər nji ɗangəu
aka ngam nacha tsəu yo far na bikə kənda.
12 Aka ənga yo nənyi mbaɗənyi ku pama nji wawa'a,
cho təkə kwazhalɓi na nda ka njir dunama,
aka ngam cha sanda pya cha ba'a nə təa,
nja jiganyi ka njir səpəla'a.
Aka hətə səpəla'a nə nji ɗang,
ka gədi aka njir səpəla'a.