Təl Sairus tə Vala Njir Isra'ila aka Nda Ɓəl Shili tə Hə'i Kənda
1
1 Ku tangərmar fa nda Sairus təl Pashiya tə gwa ku dzəga təlkur, məlna ga nja nyabiya sə nda Irmiya ndər mətakər tə na, Tlakə tə tsəkar ɗufwa Sairus təl Pashiya ngə cha bəziya ga tsəftə bəra,2 Janə sənda Sairus təl Pashiya tə na:
Tlakəu. Hyel nda ki Huɗamələm, na'atə dəhə təlkur inda ku dunəya, ngə cha tabiya ɗa aka ga ya hərtə nyi mbwa'alə vu Urshalima tə hə'i Yahuda. 3 Ga Hyel cha nəu na hi nahi inda nji nyi. Ma'i ma gwa Urshalima hya gwa hərtə mbwa'alə Hyel Tlakə nə njir Isra'ila, Hyel nda njo həsəli nənyi vu Isra'ila. 4 Dəhə mbwa nda həyadzər njir Yahuda ti, nja vala nda na bəjimgha, azurfa, sərshishi, kar pampaməu ana ga'a pampaməu aka mbwa'alə Hyel nda vu Urshalima.
5 Kəl ngə njirawawa'a Yahuda ana nə Banyami, fərit i'i ana njir Levi, ana kala ndə nda Hyel tə tsəkar ɗufwa cha, tə ɓatliya aka təra gwa hər Mbwa'alə Tlakə vu Urshalima. 6 Dəhə nji inda nda na ngya ku mələm kənda i'i tə vala nda na kar bəjingha, azurfa, sərshishi i'i, kar pampaməu, dəhə sə inda njo uya kwaba kwa, tsa'a na ga'a pampamməu nda nja tsəmti. 7 Tsakə təkəra sə inga,təl Sairus tə fa'abiya kar nə mbwa'alə Tlakə nda Nebukadnezar tə fa'atə vu Urshalima ga shili pəu ku vi katə nyi i'i nda. 8 Ngə Sairus təl Pashiya tə na Mitredat ndər gəzə məɗəwa ki təla jigabiya ga nə nyi nə Sheshbazar ngamna nə njir Yahuda. 9 Ja'inə sə inda nja uya, kətas bəjingha 30, kətas azurfa 1,000, ki səlsəu(ləgdər) nə azurfa 29, 10 shala bejingha 30, kyawa azurfa 410, alenya sərhuɗəvi pampaməu 1,000 11 Dəhə dəhə nja uya sərhuɗəvi nə bəjingha ana nə azurfa 5,400. Əngə sə inda Sheshbazar tə shili nə kə'i nji inda hya'atə vu Babilon shili Urshalima.