37
1 Cha Tlakə tə kəra ya, ngə cha həbiya ɗa biya ku Shanguɗə Tlakəu, ka ta'ində ɗa tə ahdar dakə; nyinyi chaɓə na ɗəhi.2 Cha nəuna naya ku ta dakə nda, ya la'a ɗəhi i ɗanghəu ya 'ul'ul nyi.3 Ngə cha jau ɗa, <<Zər ndəu, ɗəhi i ɗa kwa mbar ɗa pi səkə ya?>>
Ngə ya na, <<Tlakə ndər gyalkurə, naka sənghə ngə tə zəndi.>>
4 Təma ngə cha natə ɗa, <<Tiyakəra ɗəhi nga, ka natə nda, <Ɗəhi 'ul'ul i, ngatə ma ɓwanyar Tlakəu! 5 Janə sənda Tlakə ndər gyalkur tə narnya nə ɗəhi ina: Yo fatunyi gyang ku dzahi, hyo ɗa na pi səkə. 6 Yo fətə kum ana bəlatə dzən hi ba ya mbuya na chi; yo fu hi səpi, ya hyo ɓəla ɗa na pi. Əngə hyo zəndə ənda naya ngə Tlakəu.>>>
7 Kəl ngə ya natə mafakənda, wi nda natə ɗa cha. Ku sakanda ya kwa takərnda ti, kəl kurakə tə shili, hə'i tə dzədzi, ngə ɗəhi nda tə shili dləɓətə dza ɗəhi ana ɗəhi. 8 Ngə ya la'a, bəlatə ana kuma tə shiltə kəri, ngə chi tə mbuya nda, amma a pi ku nda wa.
9 Təma ngə cha natə ɗa, <<Zər ndəu, narnyi mafakə nə takər nə gyang.Narnyi mafakə nətakər abəra, <<Janə sənda Tlakə ndər gyalkur tə na: Gyangha shili ku gum fwaɗə nə duniya, batu dza gwa ku dzə kuɗə kuɗə na tsaka nda ɓəla ɗa na pi səkəu.>>
10 Ngə ya bəzətə mafakənda wi nda natə ɗa cha, ngə səpi tə shili gwa ku dzə inda. Ngə nda ɗa na pi ga hya'atə tə hyanda, ga ɗa ka ləvaləva nda na dunama.
11 Ngə cha natə ɗa: <<Zər ndəu, ɗəhi inə dəhə tə vəra ki Israila nga. Nda na, <ɗəhi kə ea 'ul ti, sənda ea kwa fəkər da a təra ti; a tlanda ea tə nji.> 12 Aka ənga, tiyakəranda ga na: <Janə sənda Tlakə ndər gyalkur tə na: Nahi nji ɗa, yo wunda hu kəhi yo hya'andə hi kwa, yo ɓəla shilnda hi səkə tə hə'i Israila. 13 Nahi tsəu nji ɗa, hyo zəndə ənda naya ngə Tlakəu, ma ya wunda hu kəhi ga fa'abiya hi zəbiya. 14 Yo fuhi Shanguɗə , ya hyo mər pi, yo fiya hi ku hə'i kə hi. Əngə hyo zəndə naya Tlakə ngə tə ndəra, a mərtə təya, ənghwandə Tlakəu.
15 Ɓwanya Tlakə tə shil da ya, bəra: 16 Zər ndəu, hətə zuwa ga tsəfətə atə, <Təlkur nə Yahuda.> Ka ɓəla hətə vanyi səkə, ga tsəfətə atə, <Təlkur nə Israila.> Ka ɓəla hətə vanya zuwa səkə, ka tsəfətə zuwa <Efəraim,> nə Yusufu ana dəhə ki Israila ana bazhi ngya kənyi.> 17 Ka daɓyanda dəhə tsaka kwa ɗa ka zuwa zhang ku cha ka.
18 Ma nənghə na nji tə jau nghə mi ngə ko nga səngə na? 19 natə nda, <<Janə sənda Tlakə ndər gyalkur tə na: Yo hətə zuwa nə Yusufu nda ku cha Ifraimu ana nə nya dəla Israila ana bazhi ngya nyi, yo daɓya na zuwa Yahuda, ka nda ɗa ka zuwa zhang, tsaka ndo ɗa zhang ku cha ya.> 20 Ka gəzəya tə lyanda zuwa ngə ka tsəfə kyatə nga 21 ga natə nda, <<Janə sənda tlakə ndər gyalkur tə na: Ya həbiya Israila ku pama jul nji ingə cha təra kya kwa nga. Yo tsəmtə nda dəhə, yo ɓəlanda shiltə hə'i kənda. 22 Yo shandə nda ka nji zhang ku hə'i nga, kyatə ma nə Israila. Njo uya təl zhang tə kəra nda dəhəu, ya atsəu ndo ɓəla ɗa səkə ka nji pampam mətlə ndara nda təkəbiya dzə mətlə da kida təlkur pampam wa. 23 Atsəu ndo dyaɓənda kərnənda səkə na katə kənda ana sə fiɗəfiɗə ndara na kala bikə wa, aka yo dləuya nda tsa dəhə səpəla'a kənda, yo chinda nda. Ndo ɗa ka nji ɗa, yo ɗa ka Hyel kənda.
24 Dauda kadakaliya ɗa kwa ɗa ka təl təkəra nda, dəhə kwa uya ndər ɓəla zhang. Ndo nəu gadlagadla ɗa, ndo na sənam təkəra tsaubar ɗa.