34
1 Ɓwanyar Tlakə tə shil da ya:2 <<Zər ndəu, sər ka shil na nyi takər nə njir ɓəla Israila; ka tiya nda kəranda ka natə nda: <<Janə sənda Tlakə ndər gyalkur tə na: Sər tuhuɗə na njir ɓəla Israila nda kwa ɓəla kəl kərnə nda! A da ki ya ndər ɓəla kwa tsamarti biri kətəng ma?3 Hyo səm malkənda, hyo ɓatlə dzaki kəhi na shishi kənda, ya hyo tla wulea təkəra chul nda hyo i, amma a da hyo ngyanda na huɓa.4 A da hya nənyi dunama nə inda tə tutə wa, ndara hya mbandə inda na shiləka, ndara hya mbiya kəti nə inda takasa. A da hya ɓəlandə inda kwa wi kəɓangə shili wa, ndara hya ki gwa'a inda tə sa wa. A ku tuku ana kurnghakur hya gəzətə nda.5 Aka ənga nda wiɗətədza ngam ndər ɓəla da wa, ya manda nda wiɗətədza nga ɗa ka sərsəm nə dəhə kum takəu.6 Kətəng i kwa wi kəɓangəu ku pama dəhə kəram i ana ku kala dəgəl dzəgam. Nda wiɗətədza mada mani ku dunəya, a ndə mada zhang nda tə ki gwa'a ndara tə ndzamar nda wa.
7 <<Aka əngə ja, nahi njir ɓəla, ngatə ma ɓwanyar Tlakəu: 8 Wi ngə təya na pi, əngwandə Tlakəu, biri kətəng ɗa kwa tari ndər ɓəla, aka ənga nda wiɗətədza ga ɗa ka sərsum nə kum takəu, ka ngam njir ɓəla nda ya nənda da tə gwa'a kətəng ɗa wa, amma nda kwa ɓəla kərnə nda matsa biri kətəng ɗa, 9 aka ənga nahi njir ɓəla, ngatə ma ɓwanyar Tlakəu: 10 Janə sənda Tlakə ndər gyalkur tə na: Yo mər dawa na njir ɓəla atsanda tsəu yo gwa'a kətəng ɗa. Yo dləutsə kətəng ɗa tsanda tsaka atsəu njir ɓəla inga da kwa sərsum ka kərnənda wa. Yo mbəɗandə kətəng ɗa ku nyanda, astəu ndo ɗa ka sərsum kənda wa.
11 <<Janə sənda Tlakə ndər gyalkur tə na: Naya təkərɗa kwa ki gwa'a kətəng ɗa, kwa ɓəla nda. 12 Wi ngə tə ndər ɓəla kwa ɓəla kətənyi nda tə wiɗətədza ku bijinda cha kanda, aka ənga yo ɓəla kətəng ɗa səɗa. Yo mbəɗandə nda dəhə tə mbwanda tə nda ti, mbwanda nda wiɗətə kər tə pichir ləbəkə ana kutla. 13 Yo fa'abiya nda ku pama jul nji, yo tsəmətənda shili hya'atə tə hə'i pampaməu, yo shilna nda tə hə'i kənda. Yo ɓəla nda kyo kəram Israila, ku dəl ana mbwanda nji na ngya ti ku hə'i nda. 14 Yo ɓəlanda tə mbwar ɓula mənakəu, gachikəɗa kəram nə Israila kwa ngya ka mbwar ɓəla kənda. Ndo piya ta nda tə ɓəla nda durdur, a kinda ndo uya sərsum a kyo mə i nə Israila. 15 Naya na kərɗa kwa ɓəla kətəng ɗa, yo pinda nda tə mbwa miɗakəu, əngwandə Tlakə ndər gyalkur.
16 Yo gwa'a inda tə sa yo ɓəlandə inda nja wiɗənda shil səkəu. Inda tə takasa, yo mbiya kəti kənda, yo nənyi dunama nə inda tə tuta, amma inda ngətləngətlə nyi ana inda yiyingəu yo tsəya nda. Yo ɓəla biri kətəng ngə ja aku jirikur.