خطِ اوّلِ یوحَنّا
پیشگُفتار
نامِ نوِشته کُنِندِه امزی خط ذِکر نَشُده، ولے بعد از قَرنِ دوّمِ مِیلادی امی نوِشته_ها قد امزی عِنوان پَیدا شُد: «خطِ اوّلِ یوحَنّا.» علاوِه ازی، طرزِ نوِشتِه امزی خط غَدر نزدِیک دَ طرزِ نوِشتِه زِندگی نامِه عیسیٰ مسیح دَ مُطابِق یوحَنّا اَسته. امزی خاطر زورِه مردُم قبُول مُونه که نوِشته کُنِنده امزی خط یوحَنّا باچِه زِبدی، یعنی یکی از دوازده یارای عیسیٰ اَسته.
دَ امزُو غَیت معلِمای دروغی پَیدا شُدُد که ایماندارای مسیح ره سُون گُمراهی مُوبُرد و اَمَدونِ عیسیٰ مسیح ره دَ جِسم اِنکار کده مُوگُفت که مسیح دَ جِسم ظاهِر نَشُده، بَلکِه فقط بطَورِ «روحانی» دَ بَینِ مردُم مَوجُود بُود.
پس مقصدِ اوّلِ یوحَنّا از نوِشته کدونِ امزی خط اِی بُود که امی تعلِیم غَلَط ره بَرمَلا کُنه. مقصدِ دوّم شی اِی بُود که دَ ایماندارا اِطمِینان بِدیه که اُونا نِجات پَیدا کده و باید دَ رابِطه-و-رفاقت قد خُدا و عیسیٰ مسیح زِندگی کُنه؛ چُون معلِمای دروغی تعلِیم مِیدَد که نِجات مربُوط دَ روحِ اِنسان مُوشه و گُناه_های که اِنسان قد جِسم خُو مُونه، کُدَم تاثِیری دَ نِجات شی نَدره، یعنی هر کاری که اِنسان بِخایه کده مِیتنه.
طبقه-بَندی مَوضوع_ها
تشریحِ یوحَنّا دَ بارِه کلِمِه حَیات (فصلِ ۱)
مسیح شفاعَت کُنِنده (فصلِ ۲)
مُحَبَتِ خُدا (فصلِ ۳)
مُحَبَت بَلدِه یگدِیگه (فصلِ ۳)
شِنَختونِ روحِ خُدا و روحِ شَیطو (فصلِ ۴)
خُدا مُحَبَت اَسته (فصلِ ۴)
پیروزی دَ سرِ دُنیا (فصلِ ۵)