خط بَلدِه ایماندارای عِبرانی
پیشگُفتار
اِی خط بَلدِه مسیحیای عِبرانی نوِشته شُده که بخاطرِ نَدَشتونِ فهمِ دُرُست دَ بارِه مقام و کارِ عیسیٰ مسیح دَ حالِ پس رفتو دَ دِینِ سابِق خُو بُود. امزی خاطر نوِشته کُنِندِه امزی خط بیان کده مُوگیه که عیسیٰ مسیح واقعاً از طرفِ خُدا اَمَده و بَلدِه ازی که اُونا ره تشوِیق کُنه که دَ ایمان خُو ثابِت بُمنه، اینی مطلب_ها ره بطَورِ واضِح بیان مُونه:
۱- عیسیٰ از اَزَل تا اَبَد باچِه خُدا اَسته و از تمامِ اَنبیا و ملایکه_ها و مُوسیٰ کده مقام شی باله یَه.
۲- عیسیٰ دَ وسِیلِه خُدا دَ عِنوانِ پیشوای اَبَدی تعیِین شُده و مقام شی از پیشوایونِ بَنی اِسرائیل کده باله اَسته.
۳- عیسیٰ ایماندارا ره از گُناه، ترس و مرگِ اَبَدی نِجات مِیدیه و بحَیثِ پیشوای بُزُرگ، نِجاتِ حقِیقی ره بَلدِه ازوا مُهَیا مُوکُنه که قُربانی_ها و مراسِمِ شریعت تنها سایِه امزی نِجاتِ حقِیقی و بُزُرگ اَسته.
نوِشته کُنِنده دَ فصلِ ۱۱ از شخصیَت_های مشهُورِ بَنی اِسرائیل نام مِیگِیره و دَ بارِه ایمانِ ازوا توره گُفته از خانِنده_ها درخاست مُونه که دَ ایمان خُو دَ عیسیٰ مسیح مُستَحکم بُمنه. دَ فصلِ ۱۲ تاکِید مُونه که اِمکان دَره سختی و رَنج-و-عذاب اُونا ره گِرِفتار کُنه، ولے اُونا ره تشوِیق مُونه که تا آخِر وفادار باقی بُمنه و چِیمِ اُمِید ازوا سُون عیسیٰ مسیح بَشه. اِی خط قد توره_های نصِیحَت‌آمیز و اَخطار آخِر مُوشه.
طبقه-بَندی مَوضوع_ها
بُزُرگی مسیح نِسبَت دَ ملایکه_ها (فصلِ ۱ - ۲)
بُزُرگی مسیح نِسبَت دَ مُوسیٰ (فصلِ ۳)
بُزُرگی مسیح نِسبَت دَ پیشوایونِ عهدِ عتِیق (فصلِ ۴ - ۶)
عیسیٰ و مَلکی‌صدِق پیشوا (فصلِ ۷)
عیسیٰ پیشوای بُزُرگِ عهدِ نَو (فصلِ ۸)
بَرتَری قُربانی مسیح (فصلِ ۹ - ۱۰)
اهمیَتِ ایمان (فصلِ ۱۱)
تَحَمُل و بُردباری (فصلِ ۱۲)
نصِیحَت_های آخِری (فصلِ ۱۳)