فصلِ هفتُم
سُلَیمان قصرِ خود خُو ره آباد مُونه
1 سُلَیمان خانِه خود خُو ره دَ دَورونِ سیزده سال آباد کد؛ اُو دَ امزی مُدَت تمامِ خانِه خُو ره تکمِیل کد.
2 اُو یگ خانه دَ نامِ «جنگلِ لِبنان» آباد کد که دِرازی شی صد توغَی، بَر شی پِنجاه توغَی و بِلندی شی سی توغَی بُود؛ اُو ره دَ بَلِه چار قطار ستُون های چیوِ سَرو آباد کد که تِیرهای چیوِ سَرو دَ بَلِه ستُون ها قرار گِرِفتُد. 3 چَت شی دَ بَلِه چِل و پَنج تِیر قد چیوِ سَرو جور شُد که دَ هر قطار شی پوزده تِیر بُود و پگ شی دَ بَلِه ستُون ها قرار دَشت. 4 چَوکات های کِلکِینای شی دَ سِه قطار جور شُد که کِلکِینا دَ هر سِه قطار رُوی دَ رُوی یگدِیگه بُود. 5 تمامِ درگه ها و بازُو های درگه ها چَوکات های چار-پالو دَشت و کِلکِینای خانه دَ سِه قطار رُوی دَ رُوی یگدِیگه بُود.
6 سُلَیمان «صالُونِ ستُون ها» ره آباد کد که پِنجاه توغَی دِرازی و سی توغَی بَر دَشت. دَ پیشِ رُوی شی یگ بَرَنده و ستُون ها بُود و دَ پیشِ رُوی ازوا یگ سایَبان.
7 بعد ازُو «صالُونِ تَخت» ره جور کد که دَ اُونجی قضاوَت مُوکد، امزی خاطر اُو صالُونِ قَضاوَت ام گُفته مُوشُد و اُو ره از قف تا چَت شی قد چیوِ سَرو پوشَند. 8 خانِه خود شی که دَ اُونجی زِندگی مُوکد و دَ پُشتِ صالُون دَ حَولی دِیگه بُود، دَ عَینِ شکل جور شُد. سُلَیمان امچُنان یگ خانه رقمِ امزی صالُون بَلدِه دُخترِ فِرعَون که اُو ره دَ عِنوانِ خاتُو گِرِفتُد جور کد.
9 تمامِ امزیا قد سنگای باکَیفیَت که دَ اندازِه مُعیَّن مَیده شُدُد و از مَنه و بُرون خُو قد اَره بُرِش شُده بُود جور شُد، از پای-سنگ تا سرِ دیوال و از بُرو تا حَولی کٹه. 10 پای-سنگ شی از سنگای باکَیفیَت، یعنی از سنگای کٹه بُود، از سنگای دَه توغَی و سنگای هشت توغَی. 11 دَ بَلِه ازوا سنگای باکَیفیَت که دَ اندازِه مُعیَّن بُرِش شُدُد و چیو های سَرو بُود. 12 دَ چار طرفِ حَولی کٹه دیوال شی از سِه قطار سنگای تَراش شُده و یگ قطار تِیرهای چیوِ سَرو بُود؛ حَولی داخِلی خانِه خُداوند و بَرَندِه خانه ام امی رقم بُود.
وظِیفِه حِیرام دَ آباد کدونِ خانِه خُدا
13 سُلَیمان پادشاه نفر رَیی کد و حِیرام ره از صُور اَوُرد. 14 اُو باچِه یگ خاتُونِ بیوه از طایفِه نَفتالی بُود و آتِه شی یگ مَردِ صُوری و صَنعتگرِ برونز بُود. حِیرام دَ هر کارِ برونز پُر از حِکمت، مهارت و فامِیدگی بُود. پس اُو دَ پیشِ سُلَیمان پادشاه اَمَد و تمامِ کارای شی ره انجام دَد.
15 اُو دُو ستُونِ برونزی ریختَند که بِلندی یگ ستُون هژده توغَی بُود و گِردی شی بَرابرِ ریسپونِ دوازده توغَی؛ ستُونِ دوّمی ام امی رقم بُود. 16 اُو دُو سرستُونی از برونزِ ریختَنده شُده جور کد تا اُونا ره دَ سرِ ستُون ها قرار بِدیه؛ بِلندی یگ سرستُونی پَنج توغَی بُود و بِلندی سرستُونی دِیگه ام پَنج توغَی. 17 جالی های شَبَکه کاری شُده و زنجِیرای بافته شُده بَلدِه سرستُونی های که دَ سرِ ستُون ها بُود، جور شُد؛ هفت بَلدِه یگ سرستُونی و هفت بَلدِه دِیگه سرستُونی. 18 اُو ستُون ها ره جور کد و دَ گِرداگِردِ شَبَکه کاری دُو قطار اَنارِ برونزی بُود تا سرستُونی ره ڈَولی کنه. اُو قد سرستُونی دِیگه ام عَینِ کار ره کد. 19 سرستُونی های که دَ سرِ ستُون های پیشِ رُوی دالیز بُود دَ شکلِ گُلِ سوسَن جور شُدُد و چار توغَی بِلندی دَشت. 20 سرستُونی ها دَ سرِ دُو ستُون ایشته شُد، که شکلِ کُوزه‌یی دَشت و دَ بَلِه شی شَبَکه کاری شُدُد؛ دَ گِرداگِردِ قِسمَتِ تَینِه سرستُونی اوّل دُوصد دانه اَنارِ برونزی قطار بُود و دَ گِرداگِردِ قِسمَتِ تَینِه سرستُونی دِیگه ام دُوصد دانه اَنارِ برونزی قطار بُود. 21 اُو ستُون ها ره دَ پیشِ رُوی دالیزِ خانِه خُدا ایستَلجی کد؛ اُو ستُونِ طرفِ راست ره ایستَلجی کده یاکِین نام کد و ستُونِ طرفِ چَپ ره ایستَلجی کده بوعَز نام کد. 22 دَ سرِ ستُون ها گُل های سوسَن برونزی بُود. دَ امزی رقم کارِ ستُون ها تکمِیل شُد.
23 بعد ازُو حِیرام یگ حَوضِa گِرد از برونزِ ریختَنده جور کد که از یگ لب تا لبِ دِیگِه شی دَه توغَی، بِلندی شی پَنج توغَی و گِردی شی دَ اندازِه یگ ریسپونِ سی توغَی بُود. 24 از لب شی تاتَر دَ گِرداگِردِ ازُو کاڈُو ها بُود، که دَ هر توغَی دَ گِرداگِردِ حَوض دَه کاڈُو وجُود دَشت؛ امُو کاڈُو ها دَ دُو قطار دَ غَیتی ریختَنده شُد که خودِ حَوض ریختَنده مُوشُد. 25 حَوض دَ بَلِه دوازده گاو شَنده شُدُد که رُوی سِه شی سُون شمال، رُوی سِه شی سُون غَرب، رُوی سِه شی سُون جنُوب و رُوی سِه شی سُون شَرق بُود؛ حَوض دَ بَلِه ازوا سخت شُدُد و پس-تَنِه ازوا طرفِ داخِل بُود. 26 ڈَبلی حَوض یگ قرِیش بُود و لب شی رقمِ لبِ پیله بُود و دَ شکلِ گُلِ سوسَن جور شُدُد که دُو هزار بَتb آو مِیگِرِفت.
27 حِیرام امچُنان دَه کراچی برونزی جور کد که دِرازی هر کراچی چار توغَی، بَر شی چار توغَی و بِلندی شی سِه توغَی بُود. 28 کراچی‌ها دَ اینی شکل جور شُدُد: اُونا دَ بَغل های خُو تَخته های برونزی دَشت و تَخته ها دَ چَوکات های برونزی سخت شُدُد. 29 دَ بَلِه تَخته های که دَ چَوکات ها سخت شُدُد، نَقشِ شیر ها، گاوو و کِرُوبی‌ها بُود و دَ رُوی چَوکات ها دَ زیرِ شیر ها و گاوو نَقش های گُل ها بُود. 30 هر کراچی چار اَرابِه برونزی و مِیل های برونزی دَشت؛ دَ چار کُنج شی پایه ها بَلدِه محکم گِرِفتونِ حَوضچه بُود و پایه ها دَ شکلی ریختَنده شُدُد که دَ هر پالُوی شی گُل ها بُود. 31 دَ سر، دَ مینکل جای کراچی یگ خالی‌گاه بُود که حَوضچه دَ مَنِه شی قرار گِرِفتُد و دانِ حَوضچه از چَوکاتِ خالی‌گاه کده یگ توغَی بِلندتَر بُود. چَوکاتِ امزُو خالی‌گاه گِرد بُود و بَلدِه محکم گِرِفتونِ حَوضچه رقمِ پایه کار مِیدَد که از لبِ کراچی یگ و نِیم توغَی تاتَر رفتُد؛ دَ دَورِ خالی‌گاه نَقش ها بُود؛ و تَخته های کراچی گِرد نَبُود، بَلکِه چار-کُنج بُود. 32 چار اَرابه دَ زیرِ تَخته های کراچی بُود و مِیل های اَرابه ها دَ چَوکات ها سخت شُدُد؛ بِلندی یگ اَرابه یگ و نِیم توغَی بُود. 33 اَرابه های شی رقمِ اَرابِه های گاڈی جنگی جور شُدُد؛ مِیل ها، اَرابه ها، سِیخای اَرابه ها و جای های مِیل ها پگ شی از برونز ریختَنده شُدُد.
34 هر کراچی دَ چارشِنگ خُو چار دِستگِیر دَشت و دِستگِیر ها قد کراچی‌ها از یگ پرچه برونز بُود. 35 دَ سرِ کراچی یگ پَٹی برونزی گِرد بُود که نِیم توغَی بَر دَشت. دَ سرِ کراچی دِستگِیر ها و تَخته های شی قد خود شی از یگ پرچه برونز بُود. 36 دَ رُوی دِستگِیر ها و تَخته های شی حِیرام کِرُوبی ها، شیر ها و دِرختونِ خُرما ره نَقش کد، دَ هر جای شی که خالی بُود؛ و دَ گِرداگِرد شی نَقش های گُل ها بُود. 37 دَ امزی رقم امُو دَه کراچی ره جور کد که پگِ ازوا یگ رقم ریختَنده شُدُد و یگ اندازه و یگ شکل بُود.
38 اوخته حِیرام دَه حَوضچِه برونزی جور کد که هر حَوضچه چِل بَتc آو مِیگِرِفت و هر حَوضچه از یگ لب تا دِیگه لب شی چار توغَی بُود و بَلدِه هر کُدَمِ امزُو کراچی‌ها یگ حَوضچه بُود. 39 اُو پَنج کراچی ره دَ طرفِ راستِ خانه و پَنج شی ره دَ طرفِ چَپِ خانه ایشت و حَوض ره دَ پیشِ رُوی خانه سُونِ راست طرفِ جنُوب-شَرق قرار دَد.
40 حِیرام سَطل ها، خاک‌اَنداز ها و کاسه ها ام جور کد. پس حِیرام تمامِ کارای ره که بَلدِه سُلَیمان پادشاه دَ خانِه خُداوند مُوکد دَ آخِر رَسَند؛ اُو اینی چِیزا ره جور کد:
41 دُو ستُون،
دُو سرستُونی کُوزه‌یی که دَ سرِ ستُون ها بُود؛
دُو جالی شَبَکه کاری شُده بَلدِه پوشَندونِ دُو سرستُونی کُوزه‌یی که دَ سرِ ستُون ها بُود؛
42 چارصد اَنارِ برونزی بَلدِه دُو شَبَکه کاری که بَلدِه هر شَبَکه کاری دُو قطار اَنار بُود تا قِسمَتِ تَینِه دُو سرستُونی کُوزه‌یی ره که دَ سرِ ستُون ها بُود بُپوشَنه؛
43 دَه کراچی و دَه حَوضچه ره که دَ بَلِه کراچی‌ها بُود؛
44 حَوض و دوازده گاو ره که دَ تَی حَوض بُود.
45 سَطل ها، خاک‌اَنداز ها و کاسه ها، یعنی تمامِ امزی چِیزا ره که حِیرام دَ سُلَیمان پادشاه بَلدِه خانِه خُداوند جور کد، برونز شی جَلا دَده شُد. 46 امی چِیزا ره پادشاه دَ دَشتِ اُردُن دَ گِلِ زمِینی ریختَنده جور کد که دَ مینکلِ سُکوت و صرتان بُود. 47 سُلَیمان تمامِ امزی چِیزا ره بِدُونِ وَزن ایشت، چراکه غَدر کَلو بُود؛ و وَزنِ برونزِ اِستِفاده شُده مُشَخَص نَشُد.
48 سُلَیمان امچُنان تمامِ اَسبابی ره که بَلدِه خانِه خُداوند ضرُورَت بُود جور کد:
قُربانگاهِ طِلّایی؛
میزِ طِلّایی بَلدِه نانِ حُضُورِ خُداوند؛
49 چِراغدان های طِلّای خالِص که پَنج دَ طرفِ راست و پَنج دَ طرفِ چَپ بُود و رُوی دَ رُوی مُقَدَّسترِین جای قرار دَشت، و گُل ها و چِراغ های شی قد شی قتی بُود؛
چِراغ گُلگَرَک های طِلّایی؛
50 پیله ها، قَیچی های پَلته‌بُر، کاسه ها، تاوه ها و آتِشدان ها از طِلّای خالِص؛
دِستگِیرَک های طِلّایی بَلدِه درگه های حِصِّه داخِلی خانه، یعنی بَلدِه مُقَدَّسترِین جای و بَلدِه درگه های جای مُقَدَّسِ خانِه خُدا.
51 دَ امزی رقم تمامِ کارای ره که سُلَیمان پادشاه بَلدِه خانِه خُداوند مُوکد دَ آخِر رسِید. اوخته سُلَیمان چِیزای ره که آتِه شی داوُود وَقف کدُد، یعنی نُقره، طِلّا و اَسبابِ رقم رقم ره اَوُرده دَ خزانه های خانِه خُداوند ایشت.