اوّلِ سموئیل 31

مَرگِ شائول و باچه های شی

دَ امزُو غَیت فَلَسطِینیا قد اِسرائیل جنگ کد و مَردای اِسرائیل از پیشِ فَلَسطِینیا دُوتا کد و غَدرِ ازوا دَ کوهِ جِلبوَع کُشته شُده اُفتَد. ‏2 فَلَسطِینیا شائول و باچه های شی ره دُمبال کد و اُونا یوناتان، اَبِیناداب و مَلکِیشُوعَ باچه های شائول ره کُشت. ‏3 جنگ دَ بَلِه شائول شِدَّت گِرِفت و تِیراَندازا اُو ره گِردگِیره کد و اُو دَ وسِیلِه تِیراَندازا سخت زخمی شُد. ‏4 اوخته شائول دَ سلاح بَردار خُو گُفت: ”شمشیر خُو ره بِکَش و دَ کَورِه مه چِقی کُو تا امی ناخَتنه ها اَمَده مَره زَخم نَزَنه و مَره رِیشخَند نَکنه.“ مگم سلاح-بَردار شی اُو کار ره نَکد، چُون کَلو ترس خورده بُود. پس شائول شمشیر خُو ره گِرِفته خود ره دَ بَلِه شی اَندخت. ‏5 وختی سلاح-بَردار شی دِید که شائول مُرده، اُو ام خود ره دَ بَلِه شمشیر خُو اَندخت و قد ازُو قَتی مُرد. ‏6 دَ امزی رقم شائول و سِه باچِه شی قد سلاح بَردار شی و پگِ نفرای ازُو یگجای دَ امزُو روز مُرد. ‏7 وختی اِسرائیلی های که دَ دِیگه طرفِ دَرّه و دَ اُو طرفِ دریای اُردُن بُود دِید که مَردای اِسرائیل دُوتا کده و شائول و باچه های شی کُشته شُده، اُونا شارای خُو ره ایله کده دُوتا کد و فَلَسطِینیا اَمَده دَزوا جای-دَ-جای شُد.

‏8 صَبای امزُو روز وختی فَلَسطِینیا بَلدِه لُچ کدونِ کُشته شُده‌ها اَمَد، اُونا جَسَدِ شائول و سِه باچِه شی ره که دَ کوهِ جِلبوَع اُفتده بُود پَیدا کد. ‏9 اوخته اُونا سرِ شائول ره بُرِید و سلاح شی ره از جان شی بُر کده دَ سرزمِینِ فَلَسطِینیا دَ هر طرف رَیی کد تا دَ بُت‌خانه های خُو و دَ قَوم خُو خوشخبری بِدیه. ‏10 اُونا سَلاحِ شی ره دَ بُتخانِه عَشتاروت ایشت و جَسَد شی ره دَ دیوالِ شارِ بَیت-شان اَوزو کد.

‏11 لیکِن وختی باشِنده های یابیشِ جِلعاد دَ بارِه چِیزی که فَلَسطِینیا دَ حقِ شائول کدُد شِنید، ‏12 پگِ مَردای جِرگَتُوی ازوا باله شُده تمامِ شاو سَفر کد و جَسَدِ شائول و جَسَد های باچه‌گون شی ره از دیوالِ بَیت-شان گِرِفته پس دَ یابیش اَمَد و اُونا ره دَ اُونجی سوختَند. ‏13 بعد ازُو استُغونای ازوا ره گِرِفته دَ تَی دِرختِ گَز دَ یابیش دَفن کد و بَلدِه ھفت روز روزه گِرِفت.