پَیدایش 35

پس اَمَدونِ یعقُوب دَ بَیت​ایل

و خُدا دَ یعقُوب گُفت: ”باله شُو، دَ بَیت‌ئیل بورُو و دَ اُونجی جای-دَ-جای شُو و بَلدِه خُدای که دَز تُو دَ وختِیکه از پیشِ بِرار خُو عیسَو دُوتا مُوکدی ظاهِر شُد، دَ اُونجی یگ قُربانگاه جور کُو.“ ‏2 اوخته یعقُوب دَ خانَوار خُو و دَ تمامِ کسای که قد شی بُود گُفت: ”خُدایونِ بیگَنه ره که دَ بَین شُمو اَسته دُور کُنِید و خودون ره پاک کده کالای خُو ره تَبدِیل کُنِید. ‏3 بعد ازُو بیِید که دَ بَیت​ئیل بوری تا دَ اُونجی بَلدِه خُدا یگ قُربانگاه جور کنُم، بَلدِه خُدای که دَ سختی-و-تَنگی دُعای مَره قبُول کد و دَ هر جای که رفتُم قد ازمه بُود.“ ‏4 پس اُونا تمامِ خُدایونِ بیگَنه ره که دَ پیشِ ازوا بُود قد گوشواره های که دَ گوشای خُو دَشت دَ یعقُوب دَد و یعقُوب اُونا ره دَ زیرِ درختِ بَلُوط که دَ نزدِیکِ شِکیم بُود، گور کد. ‏5 وختِیکه اُونا کوچ کد ترس-و-وَهمِ خُدا دَ بَلِه تمامِ شارای گِردوبَرِ ازوا قرار گِرِفت و هیچ کس اُونا ره دُمبال نَکد. ‏6 یعقُوب و تمامِ کسای که قد شی بُود دَ شارِ لُوز، یعنی دَ بَیت​ئیل که دَ سرزمِین کِنعان بُود، رسِید ‏7 و دَ اُونجی یگ قُربانگاه جور کده امُو جای ره «ایل بَیت​ایل» نام ایشت، چراکه خُدا دَ امُونجی دَزُو ظاهِر شُدُد دَ غَیتِیکه اُو از پیشِ بِرار خُو دُوتا مُوکد. ‏8 دَ امزُو غَیت دِبوره دایِه رِبِکا فَوت کد و دَ زیرِ یگ درختِ بَلُوط، تاتَر از بَیت​ئیل دَفن شُد. و اُونا امُو جای ره «اَلّون باخُوت» نام ایشت. ‏9 بعد از پس اَمَدونِ یعقُوب از فَدان آرام خُدا بسم دَزشی ظاهِر شُد و اُو ره بَرکت دَد. ‏10 خُدا دَزُو گُفت: ”نام تُو یعقُوب اَسته، مگم بعد ازی نام تُو یعقُوب گُفته نَشُنه، بَلکِه نام تُو اِسرائیل بَشه.“ پس خُدا اُو ره اِسرائیل نام ایشت. ‏11 و خُدا دَزُو گُفت: ”ما خُدای قادِرِ مُطلَق اَستُم؛ باروَر و کَلو شُو. از تُو یگ مِلَّت و جماعتِ قَوم ها دَ وجُود مییه و از تُو پادشاه ها پَیدا مُوشه. ‏12 و زمِینی ره که دَ اِبراهِیم و اِسحاق دَدیم دَز تُو مِیدُم و بعد از تُو امُو سرزمی ره دَ اَولادِه تُو مِیدُم.“ ‏13 اوخته خُدا امزُو جای که قد شی توره مُوگُفت از پیش شی باله رفت. ‏14 و یعقُوب دَ امزُو جای که خُدا قد شی توره گُفتُد یگ نشانی شِیخ کد، یعنی یگ سنگ ره دَ عِنوانِ نشانی ایستَلجی کد و یگ هدیِه وُچی کدَنی و روغو دَ بَلِه شی شیو کد. ‏15 اوخته یعقُوب امُو جای ره که خُدا قد شی توره گُفتُد بَیت‌ئیل نام ایشت.

فَوتِ راحیل

‏16 اُونا از بَیت‌ئیل کوچ کد. هنوز یگ مِقدار فاصِله تا اِفرات مَندُد که دَردِ زَیدونِ راحیل شُروع شُد و زَیدون شی سخت بُود. ‏17 وختِیکه زَیدون شی کَلو سخت شُد، دایی دَز شی گُفت: ”ترس نَخور، اِیمدَفعه ام تُو یگ باچه مُونی.“ ‏18 راحیل دَ حالِیکه جان مِیدَد، چُون اُو مُردَنی بُود، باچِه خُو ره «بِن اونی» نام ایشت. مگم آتِه شی اُو ره «بِنیامِین» نام ایشت. ‏19 پس راحیل فَوت کد و دَ راهِ اِفرات یعنی دَ بَیت-لَحَم دَفن شُد. ‏20 و یعقُوب دَ سرِ قبر شی یگ سنگ ره دَ عِنوانِ نشانی شِیخ کد که امُو سنگ قبرِ راحیل اَسته و تا اِمروز باقی یَه. ‏21 بعد ازُو اِسرائیل ازُونجی کوچ کد و خَیمِه خُو ره اُو سُونِ بُرجِ عیدِر زَد.

بَنی اِسرائیل

‏22 دَ حالِیکه اِسرائیل دَ امزُو سرزمی زِندگی مُوکد، رئـوبین رفته قد بِلهه کنِیزِ آتِه خُو خاو شُد و اِسرائیل ازی واقِعه خبر شُد.

باچه های یعقُوب دوازد ه بُود:

‏23 باچه های لیه اینی کسا بُود: رئـوبین باچِه اوّلباری یعقُوب و بعد ازُو شِمعون، لاوی، یهُودا، یسّاکار و زِبُولُون.

‏24 باچه های راحیل اینی کسا بُود: یوسُف و بِنیامِین.

‏25 باچه های بِلهه کنِیزِ راحیل اینی کسا بُود: دان و نَفتالی.

‏26 باچه های زِلفه کنِیزِ لیه اینی کسا بُود: جاد و اَشِیر.

اینَمیا باچه های یعقُوب بُود که دَ فَدان آرام بَلدِه شی تَوَلُد شُدُد.

فَوتِ اِسحاق

‏27 و یعقُوب پیشِ آتِه خُو اِسحاق دَ مَمری اَمَد دَ قِریَت اَربَع، یعنی دَ حِبرون، دَ امزُو جای که اِبراهِیم و اِسحاق دَ عِنوانِ بیگَنه زِندگی مُوکد. ‏28 عُمرِ اِسحاق یگ صد و هشتاد سال بُود ‏29 که آخِری نَفَس های خُو ره کشِید و فَوت کد. اُو پِیر و سالخورده شُده بُود که قد قَومای خُو یگ جای شُد و باچه های شی عیسَو و یعقُوب اُو ره دَفن کد.