فصلِ چاردَهُم
اَبرام لوط ره آزاد مُونه
1 دَ امزُو زمان اَمرافِل پادشاهِ شِنعار،a اَریوک پادشاهِ اَلاسار، کِدورلاعُمر پادشاهِ ایلام و تِدعال پادشاهِ گوئیم، 2 دَ خِلافِ بارع پادشاهِ سَدُوم، بِرشاع پادشاهِ عموره، شِناب پادشاهِ اَدمه، شِمعِبر پادشاهِ صَبوئیم و پادشاهِ مُلکِ بالِع یعنی صوغَر دَ جنگ رفت. 3 و امی پَنج پادشاه پگ شی دَ درِّه سِدِّیم یعنی دَ درِّه دریای مُرده یگ جای شُد. 4 اُونا دوازده سال کِدورلاعُمر ره خِدمت کدُد، مگم دَ سالِ سیزدَهُم اُونا شورِش کد. 5 دَ سالِ چاردَهُم کِدورلاعُمر و پادشاه های هم پَیمان شی اَمَد و اینی طایفه ها ره زَد: رِفائیا ره دَ عَشتَروتِ قَرنَئیم، زُوزی ها ره دَ هام، ایمی ها ره دَ شَوِت قِریَتایم، 6 و حوری ها ره دَ کوهِستونِ سعِیر تا ایل پاران که دَ بغلِ بیابو اَسته. 7 بعد ازُو اُونا پس تاو خورده دَ منطقِه عَین مِشفاط یعنی قادِش اَمَد و تمامِ مُلکِ عمالیقی ها ره زَد و امچُنان اَموری های ره که دَ منطقِه حَصَصُون تامار زِندگی مُوکد.
8 اوخته پادشاهِ سَدُوم، پادشاهِ عموره، پادشاهِ اَدمه، پادشاهِ صَبوئیم و پادشاهِ منطقِه بالِع یعنی صوغَر بُر شُده دَ خِلافِ ازوا دَ درِّه سِدِّیم آمادِه جنگ شُد 9 تا دَ خِلافِ کِدورلاعُمر پادشاهِ ایلام، تِدعال پادشاهِ گوئیم، اَمرافِل پادشاهِ شِنعار و اَریوک پادشاهِ اَلاسار، جنگ کنه؛ یعنی پَنج پادشاه دَ ضِد چار پادشاه. 10 درِّه سِدِّیم پُر از چاه های قِیر بُود. وختِیکه پادشاه های سَدُوم و عموره دُوتا کد بعضی ازوا دَ مَنِه چاه های قِیر اُفتَد و باقی لشکر سُون کوه ها دُوتا کد. 11 پس امُو چار پادشاه تمامِ دارایی سَدُوم و عموره ره قد پگِ خوراکِه ازوا گِرِفت و سُون راهِ خُو رفت. 12 اُونا لوط، باچِه بِرارِ اَبرام ره که دَ سَدُوم زِندگی مُوکد، قد تمامِ دارایی شی گِرِفته بُرد. 13 و یگ نفرِ که دُوتا کدُد، اَمَده اَبرامِ عِبرانی ره خبر کد. اَبرام دَ بَلُوطِستانِ مَمری اَموری زِندگی مُوکد که مَمری اَموری بِرارِ اِشکول و عانِر بُود و اُونا همپَیمانِ اَبرام بُود. 14 وختِیکه اَبرام از اسِیر شُدونِ بِرار زادِه خُو خبر شُد، اُو سِه صد و هژده نفر ره از اَفرادِ با تجربه که دَ خانِه شی پَیدا شُدُد، حَرکت دَد و لشکرِ دُشمو ره تا شارِ دان دُمبال کد. 15 دَ وختِ شاو اَبرام نفرای خُو ره تقسِیم کد و دَ سرِ دُشمو حَمله کده اُونا ره شِکست دَد و تا حوبه که دَ شمال دَمِشق اَسته، اُونا ره دُمبال کد. 16 و اَبرام پگِ مال-و-دارایی ره پس گِرِفت و بِرارزادِه خُو لوط ره قد مال-و-دارایی شی و خاتُونو و مردُمِ دِیگه ره ام پس اَوُرد.
17 وختی اَبرام بعد از شِکست دَدونِ کِدورلاعُمر و پادشاه های که قد ازُو همپَیمان بُود، پس میمَد، پادشاهِ سَدُوم دَ درِّه شاوِه یعنی درِّه پادشاه دَ دَمِ راهِ شی اَمَد. 18 و مَلکی‌صدِق،b پادشاهِ شالیمc بَلدِه اَبرام نان و شرابِ انگُور اَوُرد. اُو پیشوای خُدای مُتعال بُود 19 و اَبرام ره بَرکت دَده گُفت:
”بَرکت دَ اَبرام
از طرفِ خُدای مُتعال، خالِقِ آسمو و زمی؛
20 و حمد-و-ثنا دَ خُدای مُتعال
که دُشمَنای تُو ره دَ دِست تُو تسلِیم کد.“
اوخته اَبرام دَه-یگِ هر چِیز ره که وُلجه کدُد، دَ مَلکی‌صدِق دَد. 21 و پادشاهِ سَدُوم دَ اَبرام گُفت: ”مردُم مَره دَز مه بِدی، مگم مال-و-دارایی ره بَلدِه خود خُو بِگِیر.“ 22 لیکِن اَبرام دَ جوابِ پادشاهِ سَدُوم گُفت: ”قَسم دَ خُداوند، خُدای مُتعال، خالِقِ آسمو و زمی، 23 که از مال-و-دارایی ازتُو یگ ریشمه یا یگ سَگَگِ چپلی ام باله نَمُونُم. نَشُنه که بُگی ’ما اَبرام ره دَولَتمَند جور کدیم.‘ 24 تنها چِیزای ره قبُول مُونُم که مَردای جوان خورده. و بیل که عانِر، اِشکول و مَمری که قد مه رفتُد، حِصِّه خُو ره بِگِیره.“