Allah pinak Nide nabi nya ibou can kwei
11
1 Gima ngwig leu lene malaikati gom yai tom di nok nai bida bicuk da <<Aug ba, anai Allah De Ig nijeisi bitut nimbar hum ndok nijeisi lene ma akwop yo di ikuk yok bak Noni ei mpia dima imangti. 2 Noro anai bisai nya au. Lewo Allah kes bisai dima bak ngkiai di ikan tut Allah bi nya leu api yoni mico kep minu ndig di kwes dima kikau mem bed ningot bitai ba, can. 3 Midicuk nabi nya ibou can di ijuk sinsun kron leu binhyepo itri tut Allah ningon kanti kikau mem njap sribu gom sratus can ningot muhwindagom.>>4 Nabi cin dini ne biei zaitun ninjem can kin mini njeng nidihim can rin ba, yahacem igya ei Allah di ninyeng tak kep dihyeisi dini Noho bei. 5 Gino hi mbuk tut yok lene hum di cig-cai di hei leu yuhui miyem ide nitok nya bimai bingwig. 6 Nabi cin dini inyeng tak kep mpia-bbed him leu binhyepo ibindei ba, mpia but bi mem nijam di itri tut Allah ningon kanti. Inyeng tak kep minyei yaisi nya bibindei minyei yaisi nya noyam kin nggrom. Inyeng tak kep nsuwer ajar ninyeng hagom bibindei ba, kieng kep dihyeisi dini ninyen bit leu ingon kanti.
7 Tirigi itri tut ighyet bikes hon tu lene mindhe di niten-pos di hei kwei leu ninnei rom nya ide jui nsi micut igkep yok bihwen yok bibindei ba, 8 imai leu api ingut mijo sinsiou kak simpak ei minu ndig di ide Tuhan mai ei biei salibti nipou su. Minu ndig dima ninyeng nibiti nindati ne minu ndig Sodom kin Mesir. 9 Tungwatu nya di ikwei leu minu nya kin keret nya kin nihyet nya kin mben nya yahagom migyok igyai kep nimai ngut nya kikau mem njap nitindur ningai biniken noro isindui sut ba, hi tig ingut bi. 10 Leu api tungwatu dihyeisi dini hagom ingon llei bibor drek dip nabi cin dima imaisi. Yoni mibon pesta bidek midek biyam drek dip nabi cin dima di ibindei ba, tungwatu dihyeisi dini yahagom itug ndei inghuisi wei nindig bibor. 11 Noro njap ningai biniken dima ngwig leu lene Allah hi ninnei di niyaijo hanyen ei ihwap nsi lene ikiju hanyen bigya apino tungwatu nya di itou kep yok yahagom idigit tut nindig bibor. 12 Mpe dima ne nabi cin dima imiap nihyet nindig bibor di tibim kwei leu gwamti bipai biyok <<Ma jikui kwei ei sirini!>> Lene ikui ug ei gwamti bou ide nitok nya igyai him ba, bumbuhui ttou nggai kep yok. 13 Mpe dima ne dihyei ugwa-kwei nindig bibor lene minu ndig dima nittou nsi gom sar lo, nittou nsi muhwindatai jo nijoti. Ba, tungwatu nya ibou sribu muhwindacan cem imai bingwig. Leu api nindigsi nya idigit tut nindig bibor binggei sut Allah Di Sindem Bibor ei gwamti.
14 Mun di buhun bibor gi nican ngwig leu su. Noro jingat i! Mun di buhun bibor gi niningai micut kwei yo.
Pun mbrei gi nimuhwindacan tibim
15 Tirigi malaikati gi nimuhwindacan miep nide pun mbrei lene nihyet di nindig bibor nya kui yam ei gwamti bipai <<Nogindini ide Allah kin Nide Nibou Ndig di teu tungwatu nya biyai niyaijo biyok dima igyai nisindemti ba, inyeng tak kep dihyeisi dini hagom kikau buug hon nohonti bi o!>> 16 Lene nibou nya ibou nyatungwagom ba, bitai di igwam ei ide banggo mbrei dip ei Allah Noho bei iba ingwak bikik mpia binggei sut Allah ba, 17 ipai <<Allah Di Sindem Bibor di ningat rin ammani kin annani e, nipai sigyo biNa lewo sindi anyeng tak kep mun nyeng hagom tug hon Ade nisindemti di nindig bibor.
18 Tungwatu nya di ingon jo kep bi nya igga bibor lewo tto bou dem mem akes hukum ei yok dip ba, ambus yo di imai su nya ingonti cem. Tto bou dem mem ayai munkwas bak Ade awak di nabi nya kin Ade limwa di ikuk yok biNa bitut yo di inyeng jei nya kin yo di yuhui mbum nya yahagom. Tto bou dem mem gima anggek tut yo di inggek tut dihyeisi dini.>>
19 Leu api dimbou kau leu Allah De Ig ei gwamti ba, Brua Gi Preu di joti jo ei nibreisi bibindei ba, kigyei ninjeng srei cem kru cut ba, nisu bong nindig bibor cem dihyei ugwa-kwei ba, biget mbras dem kep tig njep.