Malaikati gom krau srat kijum mien ei nindati
10
1 Leu api dingat lo, malaikati di sindem bibor gom kin bu srek kwei leu gwamti. Bumbuhui ttou gom nggai kep noni nok sinsun ba, pwet krop ttai nibou nok topi. Niimaisi piga kei dem kep mpia com ba, nimig dem kep cou huma. 2 Noni krau srat kijum mien di kieng mingau su ei nindati. Noni ba nimig nite bei ninda com bico kep muk ngwa dip lene ba nimig nite bei ninda prak bico kep mam bei. 3 Noni ba nihyet nindig bibor di dem singa niyausi bahara. Tirigi kes nihyet leu su lene kru muhwindacan ba nisu nindig bibor di bong bibuhup nihyet. 4 Tirigi kru muhwindacan dima nisu kes bibong bu bi lene dipi bidipas kep kru nya ighyet ei sratti. Noro dimiap nihyet gom kin bu di tibim kwei leu gwamti bipai ser bipia <<Ma aku mun di tibim leu kru muhwindacan dima yuhui him bijo nding. Ma apas kep ei sratti au.>>5 Malaikati di co kep muk ngwa dip kin mam bei dima su ninda com ug ei gwamti, 6 beheng bitug hon Allah di Niyaijo kikau buug hon nohonti bi di pai tes mpia-bbed him kin dihyeisi dini kin muk ngeisi bitut mun di joti nya hagom ninyeng bipai <<Jam dem tu ba, itum ingon tut bu bi. 7 Lewo tirigi malaikati gi nimuhwindacan miep nide pun mbrei lene Allah yai igbit ningon kanti di jo nding bit leu nok Noni tri tut bak Nide awak di nabi nya nipou su pima.>>
8 Nihyet di tibim kwei leu gwamti di dimiap nipou su cuk da <<Aug yai srat di kieng mingau di jo ei malaikati di co kep muk ngwa dip kin mam bei nindati.>>
9 Gima rino duug ngat malaikati dima bidahara noni tut srat mien leu api noni pai bida <<Ayai hak ba, ayem ug. Gino ayem srat dima ne dem kep nok ahwei lon ningei di nyop kei ei ansi noro mpo-mpam ei anghopti.>>