Domba pmot ug yai srat kijum leu Allah
5
1 Leu api dingat lo, No di gwam banggo mbrei dip di krau srat kijum ei ninda com. Srat bokti mang bibor jo ei bei ninghim-noho lene iba biei nggrai bikrau kep srat dima mbimuhwindacan niti. 2 Dingat lo, malaikati di sindem bibor di ba nihyet nindig bitri tut <<Tou rima dem mem gima cug biei nggrai dima bikwek srat kijum dini i?>> 3 Noro yo di ingat rin ei gwamti kin dihyeisi kin minu nimai nya idec hi dem mem gima kwek srat kijum bingat mun di joti nya bi. 4 Leu api dipim bidiyai nggwei kibor lewo hi dem mem gima kwek srat dima bingat mun di joti nya bi. 5 Noro nibou pima yok igom pai ser da <<Apim au. Angat i! Singa ningut gom di ntun keret Yehuda him di ninyeng jei di ntun Daud him bindei cut sisar nisindemti cem sindem mem gima cug biei nggrai muhwindacan dima leu srat bikwek.>>6 Leu api dingat Domba Pmot di ya niyati ei banggo mbrei ninggimau. Mindhe ningut bitai kin nibou pima yok yahagom igya ttai Noni. Dingat lo, Domba Pmot noyam kin domba di ibui bimai nipou su. Nibou nggai muhwindacan tug nibou nggram him ba, Noni bon niyai njep muhwindacan lo, niyai dini yok ne Allah ninnei muhwindacan di Noni pinak ug ei dihyei nisurti-nipekti ri. 7 Leu api Domba Pmot ug yai srat leu No di gwam banggo mbrei dip ninda com. 8 Tirigi Noni krau srat dima rino mindhe ningut bitai kin nibou nya ibou nyatungwagom ba, bitai pima ikuk yok ei Domba Pmot Noho bei. Ikrau nggong mbrei kin bokor mas di biei nggrai di ui-gwang kei joti bikwop yok. Ba, biei nggrai di ui-gwang kei dima ne Allah de limwa nya ide nadi ri. 9 Yo dima ipai doia di nijep bu <<Nangkom dem mem gima ayai srat kijum dima ba, acug biei nggrai leu. Lewo hi bindei ba, amai nipou su apino aba amaisi bipek tungwatu nya leu bikwop keret nya kin minu nya kin nihyet nya kin mben nya hagom ei dihyeisi dini bak Allah.
10 Abindei yo dini binok imam nimpung nindig bibor di igyai kep Allah de midyai nya ba, inyeng tak kep tungwatu dihyeisi dini hagom.>>
11 Leu api diyai bong kep yok hanyen bu bidimiap malaikati nya ibou sribu-ribu kin juta-juta cem ighyet. Yo dini idis yam bingwig ttai banggo mbrei kin mindhe ningut bitai pima kin nibou nya. 12 Iba ighyet nindig bibor bipai doia <<Domba Pmot di ibui bimai dem mem gima ninyeng tak kep mun di hagom cem nyeng tut mun nyeng hagom cem ningon ki cem ba, yai nisindemti kin ninyeng jeisi kin nikei-kau-keisi kin No ba, mun nyeng hagom inggei sut Noni!>>
13 Leu api dimiap lo, Allah nipai testi nya ei gwamti kin dihyeisi kin minu nimai nya ided kin gi jo muk jou hagom bitut mun di niyaijo nya ei hantou-hantou yahagom ipai doia <<Dem mem gima inggei sut No di gwam banggo mbrei dip kin Domba Pmot ba, ikon inyeng drek dip ide nikei-kau-keisi kin ide nisindemti buug hon nohonti bi!>>
14 Leu api mindhe nya ningut bitai ibuhup <<Igbit ri!>> Leu api nibou nya ikuk yok bak binggei sut.