Banggo mbrei ei gwamti
4
1 Gima ngwig leu lene dingat ningat-hi-ngat hi kin bu tut dimbou di kau ei gwamti. Leu api nihyet di tibim nok pun mbrei di mbrap bit da nipou jem da <<Akui kwei ei sirini leu api dindo mun di pek kep ei nidipti bu bina.>> 2 Tirigi nihyet dima tibim rino Allah Ninnei sindem tut da bidingat banggo mbrei ningat gom ei gwamti ba, tungwagom gwam eisi. 3 No dima niimaisi njeng kei dem kep tig permata baiduri pandan kin permata delima. Pwet nimahai dem kep tig permata zamrud nghau ttai banggo mbrei nijoti. 4 Banggo mbrei hiter di nimangti ningat nyatungwagom ba, bitai krop ttai banggo mbrei gi nigom dima ba, nibou nya ibou nyatungwagom ba, bitai di ijuk sinsun di tiei kei bittin topi mas igwam dip. 5 Kigyei ninjeng srei ba, kru di nisu bong bibor cut leu banggo mbrei di jo ei ninggimau. Hyem njeng ningat muhwindacan jo ei banggo mbrei nuhui ba, hyem dini ne Allah ninnei ningat muhwindacan ri. 6 Leu api dingat lo, mun di nok muk ngei di ningwa dip jo nyahan di dem kep sra kin kisina di pimbai kei jo ei banggo mbrei nuhui.Mindhe ningut bitai igwam ttai banggo mbrei ba, hi ei bei ninda com hi ei bei ninda prak hi ei nijjai lene hi ei nibiho. Mindhe dima yok ibon igyai njep di ntun him yoho bei cem inghim cem mang bibor. 7 Mindhe gi nigom dem kep singa, gi nican dem kep sapi nikre, gi niningai bon niimaisi dem kep tungwatu niimaisi, gi nibitai dem kep hacam krubri di kieng ninyehei. 8 Mindhe ningut bitai dima ibon inyehei nya muhwindagom bikwop yok ba, igyai njep mang bibor ntun him bei inyehei nya kin ingkek dip cem. Ipai doia bikwop mmun-njap ba, ikes ighyet tut bi sren. Doia di ipai dima <<Allah di Sindem Bibor kwes-kwau o kwes-kwau o kwes-kwau o! Noni ningat rin ammani kin annani lene mikwei hanyen yo cem!>>
9 Mindhe ningut bitai ipai doia bibinggei sut No di gwam ei banggo mbrei dip di niyaijo kikau buug hon nohonti bi ba, ikon ninyeng bipai sigyo bak. Mpe dino ipai doia, 10 ne nibou nya ibou nyatungwagom ba, bitai pima ikuk yok ei No di gwam banggo mbrei dip Noho bei binggei sut No di niyaijo kikau buug hon nohonti bi. Leu api ikes ide topi mas ei banggo mbrei nuhui leu lene ipai,
11 <<Tuhan e, nyende Allah e, Nangkom dem mem gima ayai anyeng jei kin nikei-kau-keisi kin nisindemti. Lewo apai tes mun nyeng hagom ba, hagom jo nijoti bigyai niyaijo tug hon angon kanti.>>