3
1 TUHAN Di Sindem Bibor buhup <<Midicuk tungwagom di tri tut dihyet bibie leu binhyepo tin puig mem Da. Leu api TUHAN di jipai bipia jingon mem kep ser dima mitau kros ei Nide Ig. No di dipinak di jipai bipia jinggei ngwig sut mikwei tri tut Ditde gi preu.>>2 Noro tou riningon nddong kei mem njap dino TUHAN tau kep nye i? Lewo Noni minok hum di nikinding ngkimom cig bindig mas lene minok sabun di nitot sinsun cig bitot sinsun cem. 3 Noni mikwei kes hukum ei tungwatu nya dip noyam kin nikinding ngkimom cig di ndig perak kin mas kep hum bibindei ba, mumpiang joti bi. No di TUHAN pinak kwei mindig imam nya ingonti kep hum leu binhyepo ibon midut di igbit TUHAN ningon kanti bikuk yok bak. 4 Mpe dima lene TUHAN mijoi sut midut di timiei minu ndig Yerusalem kin minu Yehuda ibon ei nimbar hum dokti hanyen bak Noni bit leu nok ibon habiei nipou su.
5 TUHAN Di Sindem Bibor pai <<Jei bi ne midittau hak ei jikieti nok nikei di tri tut jide hukum. Leu api haninyai midibakilak yo di nung kui yok kin yo di icut tut hi ter nitnem kin yo di iris mun ei nikei noho bei kin niceu nya di igyem ide awak nya imuhup kin yo di ihwen bit kibom nya kin moibihi nya kin ngkiai nya ba, dibakilak yo di ikon dinyeng bi nya yahagom.>>
Nikwas gom leu ningot gomti
6 <<Dani ne TUHAN rin ba, diluei dingonti bi sren. Gima rino je di jintun Yakub him jisrawir bi. 7 Jikiek je leu Ditde niggai serti nya lene jiba jingon di gom bibrim jingkek mem dihyet bi noyam kin jidigup bat-jidigai bat di nipou nya.
Ma jenti jingkwei hanyen ndam Da leu api midingkwei hanyen ndam je. Noro jihig ser Da <Nibon mindei di bindei ba, ningkwei hanyen ndam Na i?> 8 Nogindini dihig ser je <Da di Allah disindui sut tungwatu nya biris Da e?> Jo nibreisi bipia bit bon jiris Da bi sren. Noro jiris Da tu bijihig ser Da <Notou niris Na i?> Dibuhup <<Jiris Da tug hon munkwas di jiyai biDa bi. Gima ne mitiei gom leu ningot gom, gom leu ningot gom kin mun di jinyeng tut di jikwas mikuisi tut Da bi cem. 9 Je di mben Israel jahagom jitug ndei nisigion jeti drek dip jide niris Da tu.
10 Ma jipwoi jide mun nyeng gom leu ningot gom, gom leu ningot gom titut yam kwei ei Tuhan De Ig leu binhyepo njita mpung bibor ei Ditde Ig. Tug hon nisinati dima ne jibiyai hamem Da leu api jingat lo, dikau dimbou pmem ei gwamti nya bidinjei mun di kei nyeng hagom bak jeni. 11 Midibindei ba, muhum misui jide njita bu bi. Ba anggur ningat nindig bibor mintun jide ba anggur him. 12 Leu api ngkiai nya yahagom mitri tut biyam bipia jingon llei bibor lewo jide minu dima bon mpia di kei bibor kei mem tungwatu nya di ingot ide ig eisi.>>
Allah miba mun di kei bibirop bak yo di ingon gom nya
13 TUHAN pai <<Jikkin kep dinghapti bibor tu. Noro jihig ser Da <Notou nikkin kep anghapti i?> 14 Ba, jipai bu <Gino ninok awak mem Allah ne gima bon ninyeng bi. Nna ug. Gino nibit nihyet ne nibipek mindei i? Gino nibon midut ningon di ngguk tut niyai munti nya ne nibipek mindei i? 15 Ningat bou niyai him bipia yo di inggei-nggwang tut yonti nya ingon llei bibor. Yo di imbuk nya ide mun nyeng hagom dem mem yok bibong kei igwam kei. Ibong kei igwam kei he bi noro ibingon Allah noom ningonti tug hon gi ibon sisar lo, ingwes ngun cem.> >>
16 Lene yo di ittin tut TUHAN isimbot kep biyam. Noni ngig nitingou mem yok biyok ngon kep ighyet lene pas kep yo di ikon ninyeng ba, ittin tut Noni yahagom inyeng ei srat gomti di jo Noho bei.
17 TUHAN Di Sindem Bibor pai <<Yo dima ne Ditde limwa nya ri. Dinyeng tut yok mem njap di dikos tut ei mem yok tu. Dingondut yok dem kep andigpoi di ngondut nipmot di ba nibou coi mem noni. 18 Ditde limwa nya mingat bou igyai him bipia mun di pek kep mem no di ningon kwes kei kin mun di cut igkep no di mbuk ter leu yam. Mun di pek kep mem no di kuk no biDa kin mun di cut igkep no di kuk no biDa bi ter leu yam.>>