11
1 Noni rino tug ndei midyai nimpu dati kin niya srak ko hagau dati cemf ei ari bingwam gi nimbie him di Darius ninyeng tak kep a. Darius ne nibou ndig minu Media ri. 2 Ba, mun di dipai bina ne mun di nijit ri.>>Minu Mesir kin minu Siria inyeng tak kepti
Malaikati dima pai <<Nibou ndig ningai gi hiter bu nya inyeng tak kep minu Persia leu api nibou ndig gi nibitai bram. Nibou ndig gi nibitai dima nyeng tut ndigban nindig bibor dor njiriek leu gi nindigsi nya. Ug ei nide ninyeng tak kepti kin ninyeng tut ndigban nindig biborti dima nipekti lene noni hum mben hagom insi mem gima ihwen bit minu Yunani ninyeng tak kepti. 3 Leu api nibou ndig gom di mimbri kui ningkek kiju. Nibou ndig dima ninyeng tak kep minu nindig bibor apino bon mun igbit nonti ningon kanti. 4 Noro tirigi nisindemti dima kui bipek nipekti lene ninyeng tak kepti dima kwas bitaisi. Nibou ndig di intun noni him bi nya inyeng tak kep minu ninyeng tak kepti bitai dima bigya luei nohoti bu. Lo, ide nisindemti noyam kin nide nisindemti bi.
5 Nibou ndig minu Mesir kum ei nide nisindemti. Noro tungwagom leu nibou pran nide nya ikieti yai nisindemti dor njiriek noni. No dima ninyeng tak kep minu ninyeng tak kepti di nindig bibor bu. 6 Ari bingwam poi ser lene nibou ndig minu Mesir jem nisut bit nibou ndig minu Siria lene bindo nipmisop bak nibou ndig minu Siria dima buwak. Noro nijem nisut bit yamti dima ngkiem bi. Ba, nipmisop dima kin nijjep kin nimunggwomg kin nide awak di ibuwak no nya yahagom itug ndei nimai. 7 Jei bi lene tungwagom di nimbier kim misop dima kui nok nibou ndig. Noni njei siceu bihwen nibou ndig minu Siria de tentara nya. Noni njei bicoi ug ei ide tentara nibousi di igya coi nya leu ba, bindei timek yok hak. 8 Mpe di noni ngkwei hanyen ug ei minu Mesir ne ttei nide siceu nya ide kwar di ikuk yo bak kin mun di iba mas kin perak bibon nya bimbut tut. Noni kon pran bit nibou ndig minu Siria hanyen bu bi mem nijam ari bingwam poi. 9 Leu api nibou ndig minu Siria njei siceu bihwen nibou ndig minu Mesir. Noro nibou ndig Mesir ba pran bit bisu jou kep ninghim dip bingkwei hanyen ug ei nide minu.
10 Leu api nibou ndig minu Siria nipmot bat nya injei siceu ba, itin ei ide nimpung tentara di nindig mem gima ikon pran. Leu api nipmot gom kiju tut tungwatu binjei bihwen siceusi dem kep minyei di su a. Noni brim ningkek bicoi siceu ide tentara nibousi di igya coi gom bihwen. 11 Gima rino nibou ndig minu Mesir gga bibor binjei sut nide tentara ug ei mpia di ikon pran bit yam eisi bihwen nibou ndig minu Siria bibindei timek nide tentara nipmem ngat. 12 Leu api ningon jei sut gino om kep siceu kin gi bindei mai imang bibor ei pranti dima cem. Noro nide nisindemti jo kikau bi.
13 Nibou ndig minu Siria mbus nide nimpung tentara di nindig bibor dor njiriek tentara gi nipou pima bu. Tirigi ttou bou dem lene noni kiju tut tentara di nindig bibor di iba ide minggwen di mang bibor binjei siceu. 14 Leu api tungwatu nya imang bibor yaham imbuk kep nibou ndig minu Mesir. Daniel e, ade mben di isibut bibor ibou poi cem yaham imbuk kep noni lewo ingat ningat-hi-ngat gom tu. Noro ide siceu nya ibindei timek yok. 15 Nibou ndig minu Siria yon siceu ttai minu ndig di bon nide tentara nibousi di igya coi nya bihwen lene yai biyati. Tentara Mesir nya yahau mem kan bi. Tentara di mimbri kui ingkek nya cem yahau mem bihwen siceu kan bi. 16 Nibou ndig minu Siria dima bon mun bit leu nonti ningon kanti lewo hi dima sindem mem gima hwen no poi mien cem bi. Noni yai minu di kei-kau dor njiriek minu nindigsi nya biyati ba, ninyeng tak kep titut yam.
17 Leu api nibou ndig minu Siria tin ei nide tentara nya yahagom mem gima injei bihwen minu ninyeng tak kepti ei nite bei mpia nibiho titut yam. Ningon kanti mem gima bindei timek nide siceu dima tug hon gi igyok ingon gom kin gi ndo nipmisoph bak nibou ndig minu Mesir ba, bindei timek nide ninyeng tak kepti. Noro ningon kanti di tin ei dima pek kep bi. 18 Gima leu api nibou ndig dima njei siceu bihwen mben di ibong sir muk pimat nya lene bindei timek imang bibor. Noro nibou ndig ngkiai gom mibindei ba, nibou ndig minu Siria de nillei-llausi dimai kes hon leu api suar noni biang niyai munti dima nibuhunti. 19 Nibou ndig minu Siria dima ngkwei hanyen ug ei nide tentara nibousi di igya coi nya ei nitimieisi hanyen. Noro tug midut leu api ninghapti tibim bu bi.
20 Nibou ndig gom kin bu ya luei nohoti leu api cuk nibou di sibut di ya kui noni mem gima ba nisibutti bibrim belasten keyam ba, bikum ei mun di nide ninyeng tak kepti dima nyeng tut nya. Jei bi lene nibou ndig dima cem tug midut lo, brei bou tungwatu nya igyai him ba, ei pranti cem bi.>>
Nibou ndig minu Siria di sibut bibor
21 Malaikati dima binut nihyet bu bipai <<Nibou ndig gi bram bu di ninyeng tak kep minu Siria ne nisibut cig ri. Dem mem noni yai ninyeng nibou ndig bi. Noro noni kwei kros lene ba niris munti biyai ninyeng nibou ndig bigwam niti. 22 Noni bindei timek tentara nya di ikon pran bit noni bicok tut Allah de Imam Nibou Ndig cem ba, sar. 23 Noni kiek nimig jou tut gi preu di sindi bon bit mben hiter nya. Mbro nok gino ninyeng tak kep minu di nimien he lo, nide nisindemti kum eisi bibor. 24 Noni ba nide niris mun igkeisi binggok puig nyahan ba, njei siceu bicoi ug ei hanjop nsi di nnum kei nya kros bihwen timiei di ibong kei igwam kei ei mpia dima yok. Noni bon kep mun di nidigup bat-nidigai bat nya ibon bi sren. Leu api kwas ndigban ngot di pos leu siceu nya kin ndigban ngot di nyeng tut tug hon nikon pranti nya tut nide limwa nya. Noni nggok puig mem gima njei siceu bihwen tentara nibousi di igya coi nya lo, nituti mem noni ngwig haninyai ser.
25 Leu api noni brim ningkek bimbus tentara ningot ndig ei mem gima njei bihwen nibou ndig minu Mesir di tin ei mem gima ba nide tentara di nindig bibor ba, mimbri kui ingkek cem bihwen ba, kon pran bit noni. Noro nibou ndig minu Mesir hau mem kan bi. Lewo yo di hiter igyok ingon gom mem gima ihwen noni tu. 26 Yo di ipingok kep ningonti di igya kui noni ibindei cut noni. Nide tentara nya imang bibor itug ndei nimai ba, siceu nya icok tut tentara nide nya nipwoi a. 27 Leu api nibou ndig cin dima igwam meja gom bigyem njita bit yam. Noro iba ingon kanti di kinei bibor biris mun ei yamti. Ingon kanti di ikos tut nya cut hacan lewo ngon bou dem bigyo. 28 Nibou ndig minu Siria ngkwei hanyen tut ndigban ngot di pos di tug ndei nya hagom ug ei nide minu. Noni bungwam ndam gima bindei timek Allah de limwa nya ide midut di ikrau kep mem ibikuk yok bak Allah. Nibou ndig dima bon mun igbit nonti ningon kanti leu api ngkwei hanyen ug ei nide minu.
29 Bed poi gi nidipti bu lene noni njei siceu ba, pi bihwen nibou ndig minu Mesir hanyen bu lo, ningon kanti dima ug pek nipekti bit leu gi nipou pima bi. 30 Lewo tentara Roma miba kibar nya bibitot minyei binjei kwei leu Mios Siprus mem gima ikon pran bit noni. Apino noni gwam nidigitti.
Leu api noni ba nigga biborti bingkwei hanyen binggok puig mem gima bindei timek Allah de limwa nya ide midut di ikrau kep nya mem ibikuk yok bak Allah. Noni bit yo di ingkwei leu Allah de limwa nya ide nikrau kepti dima ide nuhum ninsiti. 31 Noni cuk nide nimpung tentara di ibindei suwok TUHAN De Ig tug hon gi idip tut midut nindig mindhe ei nimbar hum dokti bak TUHAN bikwop njap-njap ba, itas Nisibutti Di Bindei Map Kui TUHAN De Igj eisi cem. 32 Leu api nibou ndig dima ba niris mun igkeisi bibindei ba, yo di ingkwei leu Allah de nikrau kepti pima itti kin noni. Noro yo di ibit Allah nihyet ibrim ingkek bihwen noni. 33 Yo di ingon ki nya di ibie tut ide limwa nya ibindei ba, imang bibor ingon dor niti. Noro yo di ingon ki ibou poi igyai nimai ei pranti kin hum di yem yok tut igyaisi cem ba, siceu nya ipos ibou poi ide mun di ima nya leu yok lene ibindei sima yok. 34 Tirigi niyai nimai biyokti dima jo kep yok lene ibou poi he ingondut Allah de limwa nya bimpu yok. Mbro nok gino yo di imang bibor ibicom yam bit yok lo, yo dima ibinggok puig tut mun di bon ninyeng mem yonti he. 35 Nibou di ingon ki pima ibou poi igyai nimai noro imaisi dima bindei ba, map kui ide limwa nyati bu bi noro ingon kwes kei. Mun dini yok mbut kikau ug bipek nijam ningwig honti di Allah kos tut tu.
36 Nibou ndig minu Siria bon mun igbit ningon kanti. Noni ba ningon di jei bipai bipia ninyeng jei bibor dor njiriek kwar di tungwatu nya ikuk yok bak nya kin Allah Di Ninyeng Jei Bibor cem hagom. Noni sindem mem gima yai igbit ningon kanti dima kikau ug bipek njap di Allah kes hukum ei noni dip. Lewo suar mun di Allah kos tut ei su mbut bipek kep. 37 Nibou ndig dima miba ningha bak kwar di nidigup bat-nidigai bat nya ikuk yok bak kin kwar di sop nya ikuk yok bak cem. Ningat ne ba ningha bak kwar di tungwatu nya ikuk yok bak dima yok hagom lewo noni kan bipia ninyeng jei dor njiriek hagom. 38 Noro noni nggei sut kwar di nyohou tentara nibousi di igya coi nya. Noni ba mas kin perak kin tig permata kin munkwas di kei-kau nindigsi nya bikuk no bak kwar di nidigup bat-nidigai bat nya ikuk yok bak bigyo sren dima. 39 Noni mbus yo di ikuk yok bak kwar ngkiai dima mem gima buhwen niya ser nide tentara nibousi di igya coi di isindem nya. Noni kon yo di ingon gom tut noni di ice tut ninyeng tak kep yok nya inyenga. Noni bindei ba, inok nibou di inyeng tak kep tungwatu nya ba, ibiyai dihyei ninda rom leu dihyei hanjop nsi di noni pos tu nya binok imuhup.
40 Tirigi nibou ndig minu Siria ninyeng tak kepti ningwig honti dideu su lene nibou ndig minu Mesir njei siceu bihwen noni. Nibou ndig minu Siria buhup bikon pran bit bibor binjei sut kroba pran kin kuda kin kibar minyei mang bibor ba, bihwen. Noni ba siceu bihwen noyam kin minyei di su nindig bibor biyai minu mang bibor biyati. 41 Ningat ne noni njei siceu bihwen minu di kei-kau njiriek minu nindigsi biyai nimai bak tungwatu ningot sribu mang bibor. Noro minu Edom kin minu Moab ninyeng tak kepti nya kin minu Amon nide mpia ttou nsi di bon ninyeng cem hagom ingwes ngun. 42 Mpe di noni yai minu ninyeng tak kepti dima yok biyati ne minu Mesir ninyeng tak kepti cem ningwes ngun leu ninda nsi kan bi. 43 Noni pos mben Mesir ide ndigban di iba mas kin perak bibon kin ndigban nindigsi di nibok kak bibor nya cem. Noni bindei timek mben Libia kin mben Sudan cem. 44 Mpe dima lene nibimbiti di tibim kwei leu nite bei mpia nipriti kin mpia nijjai bindei ba, ningon digit. Apino gima bindei ba, noni ba niten-pos bikon pran biyai nimai bak tungwatu nya imang bibor. 45 Ningat ne noni hok nide prak meng yati di bindo tut ninyeng jeisi ei muk ngei kin nungug di TUHAN De Ig joti ikieti. Noro niabiati bu ne noni tug ndei nimai lo, hi di mpu noni bi.>>