Nibou Ndig Belsyazar di Nebukadnezar nipmot bon pesta nindig bibor
5
1 Mpe di gom bu Nibou Ndig Belsyazar hig yo di inyeng jei nya ibou sribu gom kwei ba, bon pesta nindig bibor mem yok. Idut ba anggur ngei nindig bibor cem. 2 Tirigi idut ba anggur ngei bingwig bigyo lene Belsyazar cuk nide awak nya leu binhyepo ikon mok kin bokor di iba mas kin perak bibon po nicig Nebukadnezar pos kwei leu TUHAN De Ig ei minu ndig Yerusalem pima kwei. Nibou ndig ningon kanti rino yo di inyeng jei di igya kui noni kin nitnem ndig nya kin nitnem mien nya kin nonti yahagom idut ba anggur ngei eisi. 3 Yo dima ikon mok kin bokor mas pima haninyai kwei leu api yahagom idut ba anggur ngei eisi. 4 Yahagom inggei sut ide kwar di iba mas kin perak kin ngkimom-tembaga kin ngkimom nitu kin biei kin tig bibon.5 Tirigi ibon nok rino tungwatu ninda he tau kros bipas hurup bokti nya ei dring nggetti lene njeng mbrei piga digai hagom bisieng-siau kei. Nibou ndig cem ngat ninda dima bou niyai him. 6 Leu api niimaisi hai bibor bittin tut nindig bibor apino nibiau digit. 7 Gima rino noni hig yo di ingon ki kin yo di nung kui yok kin yo di inda dut kin yo di iko mun bibinggok tut ndiyok nya yahagom kwei. Tirigi idem yam ei su lene noni pai biyok <<Tungwa tou rino kwop mun pas bokti dima bipai igbit ningat bida lene midiba sinsun nibou ndig di jei di dem kep nghei nta bijuk noni leu api midiba miep mas di bindo tut ninyeng jeisi bisrou nikimam cem leu api midita noni nok nibou gi niningai ei minu Babel.>> 8 Lene yo di ipingok kep nibou ndig ningonti ikwei yok igyai kep hurup bokti dima sindam noro bit bon hi kwop nibokti bipai igbit ningat bak kan bi. 9 Nibou Ndig Belsyazar ningon buhun ba, niimaisi hai bibor dor njiriek gi nipou leu api yo di inyeng jei cem ingon tai-tai bou niti bigyai mun nyeng hi kan bi.
10 Mpe dima lene nibou ndig nipmem miap nibou ndig kin yo di inyeng jei di yahara-hara nyen ighyet leu api bisau bicoi ug ei ninsi di igyem pesta eisi. Noni pai bak nibou ndig <<Nnaba na di Nibou Ndig ayaijo ninno! Nnaba na di Andigpoi angon jo nyahan lene ma aimaisi hai bibor nok gima au. 11 Lewo no di ningon mpung tut Allah ninnei gi kwes ningat rin ei minu dini. Tirigi po acig nok nibou ndig pima lene no dima nintin kimbo cem ningon ki cem ningon dorti tut mumpriem nya kin nipai ningat nya cem noyam kin kwar di ingon ki nya. Nibou Ndig Nebukadnezar ta noni nok nibou mem yo di ingon ki kin yo di nung kui yok kin yo di inda dut kin yo di iko mun bibinggok tut ndiyok nya yahagom. 12 No dima nintin kimbo cem ningon ki cem mbot kep tut mumpriem nya cem mbot kep mimun cem mbus tungwatu nya ingonti tut mun di srou yok cem hagom kan. Ninyeng rino Daniel noro acig jem ninyeng Beltsazar. Ma ahig noni kwei. Noni micoi ei hurup bokti dima ningatti bipai bina.>>
Daniel coi ei hurup bokti di jo dring nggetti bimbot kep ningat a
13 Haninyai ibuwak Daniel kwei biya ei nibou ndig noho bei leu api nibou ndig hig ser noni <<Nani ne Daniel leu mben Yahudi po dicig njei bikat na kwei leu atimieisi ei minu Yehuda pima rin e? 14 Dimiap tut bipia angon mpung tut kwar di kwes-kwau nya innei cem antin kimbo cem angon ki cem dor njiriek yo di hiter. 15 Yo di ipingok kep dingonti kin yo di nung kui yok dini ibingon nikwop hurup bokti dini bicoi ei ningatti bipai bida noro idem mem bi. 16 Nogindi pa hi pai sut na bida bipia ambot kep mimun ba, ambot kep ningat di jo nding leu tungwatu nya igyai him cem kan. Gino akwop hurup bokti dima ba, acoi ei ningatti ba, apai igbit kan lene midijuk sinsun nibou ndig di jei di dem nghei nta cem ei nati leu api andei miep mas di ndo tut anyeng di jei cem. Midita nani nok nibou gi niningai ei minu Babel cem.>>
17 Lene Daniel buhup <<Nnaba ayai mun di kei nok gima hagom bida au. Ayai bak yo di hiter hak ug. Midikwop hurup bokti dima mem na di Andigpoi leu api midicoi ei ningatti bidipai bina.
18 Allah Di Ninyeng Jei Bibor ta acig Nebukadnezar nok nibou ndig di ninyeng jei bibor bisindem bibor cem ba, tungwatu nya yahagom ikuk yok bak. 19 Ninyeng di jei bibor dima bindei ba, timiei minu nya kin mben nya kin gi imbrap ighyet ter leu yam yahagom ittin noni ba, inghuisi mpig sut. Gino acig kos tut bipia miyai nimai bak tungwagom lene noni yai mun bipek kep ningon kanti dima hak ug. Gino noni kos tut bipia miteu tungwagom leu hukum nimai lene noni yai mun bipek kep ningon kanti dima cem hak ug. Noni kon bihi inyeng cem nim kep bihi cem hagom bit leu ningon kanti. 20 Noro ningon di jei bibor kin ningon di tindak kin ningon di mbuk dima bindei ba, Allah om noni leu nide banggo mbrei leu api ninyeng di jei pror yon hak leu noni. 21 Tungwatu nya ijji noni ug ei minu ting leu yok leu api ningon tungwatu bu bi noro ningon mindhe he. Noni ya-ya nyen bit keledai bigbehei nya biyem kep abris nggrup noyam kin sapi nya cem bibong bas hak ba, nggou kui noti cem. Gima hagom kikau leu api ningon hukti bipia Allah Di Ninyeng Jei Bibor ninyeng tak kep nibou ndig dihyeisi dini bitut ide ninyeng tak kepti nya hagom. Allah Nongkom he rino ta nibou nya bit leu ningon kanti.
22 Mbro nok gino na di Andigpoi ne Nebukadnezar nipmot rin ba, akan tut mun dima yok hagom tu lo, angon jei bibor kikau. 23 Andigpoi e, angon jei bibor bou TUHAN ei gwamti niyai him tirigi aba angon di jei bicuk ade limwa nya bipia ikon mok kin bokor nya po acig pos kwei leu TUHAN De Ig pima kwei. Nani kin yo di inyeng jei di igya kui na kin atnem ndig nya kin atnem mien nya jahagom jidut ba anggur ngei eisi. Leu api jinggei sut kwar di tungwatu nya iba mas kin perak kin ngkimom-tembaga kin ngkimom nitu kin biei kin tig bibon. Mun di jikuk je bak dima yok igyai tu ba, itingou nam cem ba, ingon mbum cem. Anggei sut Allah di ndo igbit ade njap nijeisi kin ningwigsi bina bi. Ba, Nongkom he rino ninyeng tak kep ayai munti nya. 24 Gima rino Allah bindei ba, ninda dima pas kep nicukti.
25 Nipasti dima rinok gini <Ikwop nimangti o ikwop nimangti o inai nibuhunti o ikwas hacan o!> lene nok. 26 Ningat rinok gini <Ikwop nimangti> ndo tut gi Allah kwop nijam di anyeng tak kepti nijeisi bibindei ba, ngwig hon nohonti tu. 27 <Inai nibuhunti> ndo tut gi Allah bakilo angon ei Nide kiloti bingat lo, adem mem bi. 28 <Ikwas hacan> ndo tut gi Allah bindei ba, anyeng tak kepti kwas hacan tu ba, mben Media inyeng mitak kep igdo hi lene mben Persia inyeng mitak kep igdo hi bu.>>
29 Haninyai Belsyazar cuk nide awak nya bipia ijuk sinsun nibou ndig di jei di dem nghei nta ei Danielti lene indei miep mas di ndo tut ninyeng di jei cem ei nikimamti leu api nibou ndig ta noni nok nibou gi niningai ei minu Babel. 30 Himmun dima cem nide siceu nya igyai nimai bak Belsyazar di nibou ndig minu Babel.