Mun di nibou ndig yai mem midut Njap Ndig nya
46
1 TUHAN Di Ninyeng Jei Bibor pai <<Suar nggam dimbou pmem di birok kik mpia priti di ibicoi ug ei mpia di jo bas hak dima kikau mem njap muhwindagom di limwa nya ibindei mbut ide midyai nya. Disindui sut ba, ikau dimbou pmem dima mem Njap Nigwam Kep Ninghuisi kin Midut Bed Jep he. 2 Njap dima ne suar nibou ndig coi kwei leu mpia di jo bas hak gi nisai bimbut kak ninsi gi nindig. Leu api ug ya kui dimbou pmem nidihim mem nijam di imam nya ibon midut nindig mindhe titut kep hum kin midut nibiyai ningon kwes kin Allahti cem gau noni ei nimbar hum dokti. Suar noni kuk no biba nibiau bicom mpia lene ba ningwak bikik mpia bikuk no bak TUHAN ei dimbou pmem nuhui dima leu api hei bingkwei hanyen ug ei nide ig. Suar dimbou pmem dima jo kikau bipek mmun kep. 3 Suar limwa nya yahagom ikuk yok biba ibiau bicom mpia lene iba ingwak bikik mpia bikuk yok bak TUHAN ei dimbou pmem nuhui dima bikwop Njap Nigwam Kep Ninghuisi kin Njap Ndig Bed Jep.4 Bikwop Njap Ningwam Kep Ninghuisi lene suar nibou ndig dimig domba pmot ningut muhwindagom kin domba nikre ningut gom di bok-ba bi ei mem midut nindig mindhe titut ei humti bak TUHAN. 5 Suar noni pwoi gandum nimangti dem liter simnaimuhwidip brimigtehican biniken kwei ba, bikrau domba nikre mem midut dima bikwas gandum nimangti bit leu ningon kanti mem gima bikrau domba pmot pima yok gom-gom mem midut dima cem. Suar noni kwas mini zaitun ningei dem liter ningai mem bibikwop midut njita nibipai sigyo bak Allahti.
6 Bikwop Njap Ndig Bed Jep ne suar nibou ndig kwas sapi nikre ningut gom kin domba pmot ningut muhwindagom kin domba nikre ningut gom di bok-ba bi nya mem midut gi nindig mindhe titut kep humti bak TUHAN. 7 Suar noni pwoi gandum nimangti dem liter simnaimuhwidip brimigtehican biniken kwei ba, bikrau sapi nikre kin kambir nikre mem midut dima bikwas gandum nimangti bit leu ningon kanti mem bikrau kin domba pmot pima yok gom-gom mem midut dima cem. Suar noni kwas mini zaitun ningei dem liter ningai mem bibikwop midut njita nibipai sigyo bak Allahti.
8 Gino nibou ndig joi sut kuk no biDa ei Ditde Ig lene suar noni coi kak ninsi ndig bingkwei hanyen cem kak puig dima. Gino nibou ndig joi sut kuk no biDa ei Ditde Ig lene suar noni mbut kak ninsi nindig leu api hei bingkwei hanyen buug ei nide ig. 9 Lene gino limwa nya ikwei kuk yok biDa mem njap nindig nya lene ma icoi kak dimbou pmem di birok kik mpia nijjai. Tirigi ingkwei hanyen ug ei ig lene ma yehei kak dimbou pmem di birok kik mpia nibiho. Suar yo di icoi kak dimbou pmem di birok kik mpia nibiho yehei hanyen kak dimbou pmem di birok kik mpia nijjai. Harin dima ingkwei hanyen ba, yehei kak dimbou pmem po icoi kak kwei ei ninsi a. Gi ingkwei hanyen lene ma imbut kak dimbou pmem gi nite hi. 10 Suar nibou ndig coi ug ei TUHAN De Ig mem nijam di limwa nya icoi kwei ba, ngkwei hanyen mem nijam di yoni ingkwei.
11 Bikwop njap di ibon pesta kin njap ndig nya lene suar ikwas gandum dem liter simnaimuhwidip brimigtehican biniken ba, ibikrau kin sapi nikre ningut gom-gom kin domba nikre ningut gom-gom. Lene suar ikwas gandum nimangti bit leu ingon kanti mem ibikrau kin domba pmot mem midut dima. Suar ikwas mini zaitun ningei dem liter ningai bibikrau kin bikwop gandum nibibon midut dima.
12 Gino nibou ndig joi sut kwas munkwas mem midut nindig mindhe titut kep humti kin midut nibiyai ningon kwes kin Allahti bit leu nijoi sutti bak TUHAN lene suar ikau dimbou pmem di birok kik mpia nipriti di jo bei mpia di jo bas hak gi ninsi mem noni. Suar noni bon midut dima noyam kin midut Njap Nigwam Kep Ninghuisi leu api hei hanyen. Ma jinggam mbou pmem dima hanyen ei ninghim dip.>>
Midut di mbut bikwop njap
13 TUHAN pai <<Suar ikwas domba pmot ningut gom di bok-ba bi bikwop njap ngwa ei njap tekti mem midut nindig mindhe titut ei humti bak TUHAN. 14 Ter leu gima lene suar ikwas gandum di nibuhunti dem kilo can kin mini zaitun ningei di dem liter gom bikwop njap tekti hagom mem gima ibisrig gandumti ba, nicukti dini jo kep bijo ninno bijo kikau. 15 Suar ibon midut nindig domba pmot ningut gom titut kep humti kin midut gandum bitut mini zaitun cem bikwop njap tekti hagom bak TUHAN.>>
Dihyei ninda rom di nibou ndig de
16 TUHAN Di Ninyeng Jei Bibor tri tut nicukti bipai <<Gino nibou ndig kwas nide dihyei ninda rom nite hi tut nipmot gom lene suar nipmot jem dihyei dima bou no nok nide kin yo di intun noni him cem ide ba, nok ide dihyei ninda rom bijo ninno bijo kikau. 17 Noro gino nibou ndig dima kwas nide dihyei ninda rom hi tut nide awak gom lene mpe di ug ei Ari Bingwam Ningkwei Hanyentio suar nide awak ngkwei dihyei dima bak nibou ndig binok nide dihyei ninda rom hanyen. Dihyei dima ne nibou ndig de dihyei rin ba, nonti kin nipmot bat nya he rino igyai nok ide dihyei ninda rom kikau ug a. 18 Ma nibou ndig brim dihyei ninda rom poi mien cem leu nide limwa nya au. Nide dihyei he rima kwas tut nipmot bat nya leu binhyepo brim Ditde limwa nya ide dihyei ninda rom leu yok bi.>>
Mpia di ingei mindhe-ndhe di ibui eisi
19 Leu api pinai dima buwak da binicoi kak dimbou di jo simin dimbou pmem ba, nicoi ug ei ninsi di kwes nya di jo bei mpia nijjai di mem imam nya ibongti. Noni su ninda bindo ninsi di jo nuhui dip ndam nite bei mpia nicutti, 20 bipai <<Suar imam nya ikwen mindhe di ibui mem midut nibiyai nikos ser sisarti kin mindhe di ibui mem midut nikum Allah de ningwamti ba, iba gandum bibon midut njita nibitin ei cem ei sirima. Igyai nok gima leu binhyepo ittei mun di kwes-kwau dima ninghui poi mien biyuug sut ug ei mpia di jo bas hak gi nisai bi. Leu gima bindei ba, limwa nya ingget biyuum mun di buhun.>>p
21 Leu api noni buwak da bu ba, nuug ei mpia di jo bas hak gi nisai bidingat lo, mpia dima bon nuhuisi bitai. 22 Bibikwop nuhuisi bitai dima bon mpia di jo bas hak nimien di nijeisi dem meter ningot can lene ninyanti dem meter simnaimuhwidip. 23 Ngug tig di bigahai ig him jo nite bei mpia di jo bas hak dima yok ba, itu mihyeti di indig hum ei niti eisi. 24 No dima pai bida, <<Gini ne mpia di mem awak di igyai midyai ei TUHAN De Ig nya ikwen mindhe ninghui di di mem limwa nya ibikuk yok bak TUHAN ei niti nya ri.>>