Doia nitig nimaisi di ikon mem minu ndig Tirus
27
1 TUHAN Di Ninyeng Jei Bibor pai bida, 2 <<Na di tungwatu di ayaijo kikau bi e, apai doia nitig nimaisi dini mem minu ndig Tirus. 3 Minu ndig di jo muk pimat dima ne nitri-nipek mun cig mem yo di ibong bidem minu hagom ei muk nintig dip nisurti-nipekti ri.Apai bipia minu ndig Tirus e, aba ade nikon nanti bipai bipia ade nuubbuti kei bibor kei!
4 Muk ndigsi rinok ig mem nani. Iwin nani bidem kep nok ingot kibar minyei di kei-kau-kei.
5 Iba biei aras di kwei leu Nungug Hermon bitap dring ei ade ig nya. Buom minu Libanon ne dihim sriwir ade nya ri.
6 Iba biei ndig ngat di kwei leu minu Basan bibon ade puer nya. Iba buom Mios Siprus bibon ade ansana. Iba gajah nikwai nisra bimau ansan dima.
7 Iba minghas linen di ibien di kwei leu minu Mesir binap ade sriwir nya binok mun di bindo mem gima hiter ibikan tut akwei leusi. Ade prak meng ne minghas nghei nta di nggriu-nggrop kei di kwei leu Mios Siprus ri.
8 Timiei kibar nsi di inok nibos kep minyei cig nya ne mben Sidon kin Arwad ri. Ade timiei kibar nsi nya ne niyai kep midyai ei muk ngeisi cig nya ri.
9 Timiei kibar nsi nya di igyai midyai nok tukan biei nya ne mben Gebal di ijoi bibor ri. Kibar minyei hiter nya leu minu ndig hagom kwei piar lene ide timiei kibar nsi nya ibisau sut gima itri mun bibipek ndiyok ei ade minu ndig ri.
10 Tentara di ikwei leu minu Persia kin Lidia kin Libia nya iba yok bikum ade tentara nya. Ipindur ide mun di ibipukep tibor ninggwenti nya kin ide topi yeng ngkuong ei ade tentara nibousi di igya coi nya. Tentara dima ripo impu na ba, ibindei timek ade siceu nya bibikum ei ade ninyeng jeisi. 11 Tentara di ikwei leu mios Arwad igya ser ade ngug tig nya ba, mben Gamad igya ser ade ig di bon ninggre di nut yam di jo anai nya. Ipindur ide mun di ibipukep tibor ninggwenti nya ei ade ngug tig him bijo sur yam kei. Yoni ripo ikum ei ade nikei-kau-keisi a.
12 Atri ade ndigban nindig bibor ei minu Spanyol leu api abipek perak kin ngkimom nitu kin ngkimom leben nitiei kin ngkimom-leben nimmun. 13 Aug tri ade ndigban ei minu Yunani kin minu ndig Tubal kin Mesekh leu api abiwim awak nya ba, abipek ndigban di iba ngkimom-tembaga bibon cem. 14 Aba ade ndigban bipek kuda di kri kroba kan kin kuda di tentara ibri bigwam dip kin bagal leu mben Bet-Togarma. 15 Jeni kin timiei Rodusv jitri mun jibipek ndiyok leu yamti. Timiei minu les him nya cem iba gajah nikwai di jei kin biei nimmun bipek ade ndigban di atri nya. 16 Nitri-nipek mun cig di ikwei leu minu Siria ipek ade mun di atri nya kin mun di abon bou anda him ningat mang bibor dima cem. Iba tig permata zamrud kin delima kin hi di iba bor bibon cem kin minghas ningwoi nghei nta kin minghas nibien he kin minghas linen cem hagom bigo ndigban di ipek leu na nya. 17 Mben Yehuda kin Israel nya iba gandum ngan kin ahwei lon kin mini zaitun kin biei ngat di ui-gwang kei hagom bigo ndigban di ipek leu na nya. 18 Timiei Damsyik ipek ndigban ade di atri nya bitut mun di abon bou anda him mang bibor cem. Iba anggur di kwei leu minu ndig Helbon kin domba nta di kwei leu minu ndig Sahar, 19 kin ngkimom nitu nitug kin biei ngat di ui-gwang kei nya cem hagom bigo ndigban di ipek leu na nya. 20 Timiei Dedan nya itri minghas di ibijuk kuda ninghim di igwam dip nya bina bibipek ndigban di abon bou anda him nya. 21 Mben Arab kin nibou di inyeng tak kep minu Kedar nya iba domba pmot nya kin domba nikre kin kambir bipek ndigban di abon nya. 22 Nitri-nipek mun cig nya di ikwei leu minu Syeba kin Raema ipwoi ide tig permata nya kin mas kin biei ngat di ui-gwang kei leu binhyepo ibipek ndigban di abon nya. 23 Timiei minu ndig ngot di ikwei leu minu ndig Haran kin Kane kin Eden kin nitri-nipek mun nindig bibor cig di leu minu Syeba nya kin timiei minu ndig ngot di Asyur kin Kilmad yahagom itri mun bibipek ndiyok bit nani. 24 Yo dima itri sinsun ubbu ngat nya kin minghas ningwoi nghei nta kin minghas nibien he kin kwo ngig di ndok di iba domba nta bibien di bon nisieng hi gom hi gom di ibingig ansan dip cem bina. 25 Iba kibar minyei nitri-nipek mun di nindig ngat di tot minyei bram yam nya bittei ndigban di apek cem atri hanyen cem.
Adem kep nok kibar minyei di mbut muk ndigsi di ndigban di buhun bibor joti.
26 Tirigi ade timiei kibar nsi nya itig minyei ug ei muk ndigsi lene hou mpia priti di ten bibor hwen na.
27 Mpe di asar muk jou lene ndigban di atri-apek nya hagom di inju ei kibar nsi kin timiei kibar nsi nya di igyai kep midyai ei muk ngeisi kin ide limwa nya kin tukan biei nya kin nitri-nipek mun cig di inyeng jei sut ndigban nindig bibor nya yahagom kin bikwop tentara di igya ser kibar cem yahagom isar minyei bisar krebou bit na ug ei muk jou.
28 Timiei kibar nsi nya di igyai midyai ei muk ngeisi yahara lewo ittin ba, ighyet di tibim kieng kep muk ntig dip hagom.
29 Tini bu ne timiei kibar nsi nya yahagom ikes kibar dima bipiar bijo nijoti hak lene ikinyon bikui ug ei mambei leu su.
30 Ibipim tut mun di cut igkep nani lene iba ingon di ngguk bibor binso-nso nyen bipim nggruet cem. Ikam dihyei ndung bibigimahap ibou nggram him ba, irim bitoi atriem cem nok bindo tut ide ningon nggukti.
31 Ikak ibou nta leu ba, ijuk sinsun kron cem lewo ingon ngguk drek dip na. Iba ingon di ngguk bibor bipim kui jei sut mun di cut igkep na.
32 Leu api ikon doia nibitig nimaisi gom mem nani di pai <Na di minu ndig Tirus e, tou rinoyam kin nani i? Na di minu ndig Tirus e, tini bu ne asar minyei jou ba, abbwe-bbwau ei muk ngeisi.
33 Tirigi po kibar mbut tut ade ndigban ei minyei ngwa dip ba, abimpu mben nya tut isuarti pima ne abindei ba, nibou ndig nya cem inyeng tut ndigban.
34 Tini bu ne asar ba, atimek ba, angwig ei muk jou tu. Ade timiei kibar nsi nya yahagom bitut mun di anju ei kibar nsi nya hagom pror bit na ei muk ninggimau yon tu.>
35 Yo di ibong muk nipimat yahagom imiap tut mun di cut igkep na apino idigit tut. Nibou ndig di ide nya cem ittin bibor biyon ningkek di henha ei yokti ba, gima jo nibreisi ei iimaisi a. 36 Tini bu ne apror bihigom bijo ninno bijo kikau. Nitri-nipek mun cig nya bidem dihyeisi dini hagom idigit tut lewo ittin tut leu ma icut ei mun di cut igkep na dimati.>>