Prap yem yeng brekti
24
1 Ei nijam di icom nye ei ningkiaisi ug ei njap gi nisimnai mem bed gi nisimnai ei ari bingwam gi nimuhwindatai ningwigsi lene TUHAN pai bida, 2 <<Na di tungwatu di ayaijo kikau bi e, apas kep njap di ammani ninyeng lewo njap di ammani rino nibou ndig minu Babel kinyon ei gi njei siceu ba, igyon ttai minu ndig Yerusalem a. 3 Da di TUHAN Ditde nihyet nibiti nindati gom mem gima atri tut bak Ditde limwa nya di yaham imbuk kep Da kikau nya pai bipia,Akiber minyei ei yeng brekti leu api akes tut ei humti.
4 Akes mikwau di ninghui kei-kau ei yeng ninsi bitut ninghat nghui kin nindimuhum nghui kin ninjum di ninggus mang nya,
5 kin domba nghui di nimmau ndok di nggriu cem leu api ma akum ei biei muiti.s Ma asindui sut minyei bidut ba, kiak leu api akwen mikwau dima kin ninjum di joti nya cem.>>
6 TUHAN Di Ninyeng Jei Bibor pai <<Buhun bibor mem minu ndig di mpung tut niyai nimai bak tungwatuti dima! Minu ndig dima dem kep yeng brek di prap yem di ipiap cem bigyo. Ibindei hei mikwau nghui di jo niti gom-gom leu ninsi kikau ba, niken hi jo ninsi bi kep. 7 Niyai nimai bak tungwatuti jo kep minu ndig dima. Noro nimbiam ninggrom di ikiber kiber ug ei dihyeiti bi. Nimbiam nggrom siber ug ei tig di ngkiem dip ba, bit bon itig dihyei binjei kep kan bi. 8 Disindui sut nimbiam nggrom dima bijo ei tig dima dip leu binhyepo yo di ingat nimbiam nggrom dima ibuhup hanyen tut.>>
9 TUHAN Di Ninyeng Jei Bibor pai <<Buhun bibor mem minu ndig di mpung tut nihwen mun cig dima! Danti rima dinju biei kep bidindig hum kep a. 10 Ma akum ei bieiti! Amiep hum cem! Akwen mikwau nghui ei niti! Asiber mikwau ningei leu yenga! Andig ninjum bingkiong ningwig a! 11 Nogindini ma akon yeng ngwak dima ei humti lene asindui sut ba, hum yem bingwoi kei noyam kin hum mbom. Tirigi hum yem prap leu yeng dima lene mipwoi hanyen bit leu nok No di ikuk yok bak nidimigsi nya. 12 Noro hum mipinde niprapti hagom bitek hak leu bi.
13 Minu ndig Yerusalem e, ade niyai munti di kinei bibor nya bindei ba, map kui nati. Mbro nok gino dibingon mem gima dibindei pwoi na lo, dem tut bi. Lewo map kui nati bijo kikau. Apwoi kei hanyen bi bibou dikes Ditde niggati ei na dip ug e. 14 Da di TUHAN Di Dinyeng Jei Bibor disimbot dat tu. Njap ngon bou dem mem gima dibindei nani tu. Midibbwe ser ade sisar bidikos ser bi. Ba, dingondut nani cem bi. Atug ndei hukum drek dip ade nibon munti nya hagom. Da di TUHAN Di Dinyeng Jei Bibor disimbot dat tu.>>
Nabi Yehezkiel nitnem nimaisi
15 TUHAN pai bida, 16 <<Na di tungwatu di ayaijo kikau bi e, midiyai no di angon ngakei bibor leu na kros ug ri. Noro ma apim ba, abwos-bwos nyen cem apim kui jei sut ba, ayai nggwei kibor tut cem au. 17 Ma asindui sut ba, hi miap tut annei di kui-juk nyen cem au. Ma ayai bram yo di yuum ningon nggukti igyai munti au. Aba minghas binggai kep abou ba, aba amig ngwak bimbut-mbut nyen au. Ma anggai kep aimaisi ba, ayem roti ningon nggukti cem au.>>
18 Dimbrap bit mben dima ei njap tekti ngat ba, mmun kep lene ditnem mai. Njap di hyep bu lene diyai igbit TUHAN nicuk dati nya. 19 Leu api limwa nya ihig ser da <<Andigpoi e, nggon rino ayai nok gima i? Gima ne mun di bindo mem nyeni notou rin i?>>
20 Leu api dipai biyok <<TUHAN cuk da, 21 bidipai sut nisokti dini bije: Jinggei sut TUHAN De Ig nisindemti. Jijoi sut jimian huk nggilun ba, jibicem kep cem. Noro TUHAN mibindei bimap kui Nide Ig. Leu api Noni miyai nimai bak jide nimpung ig bei nsi di ipilei yo ndi igyaijo nya di ibong ei minu ndig Yerusalem ei pranti. 22 Leu api mijiyai bram diyai kepti dino jinggai ser jiimaisi bijiyem roti ningon nggukti cem bi ba, gima noyam kin diyai kepti pima. 23 Ma jiba minghas binggai kep jibou ba, jiba jimig ngwak bimbut-mbut nyen au. Ma jibwos-bwos nyen bijipim kui jei sut ba, jiyai nggwei kibor tut au. Jide sisar bindei ba, jiwer mindheti bikum eisi kikau ba, jinso-nso nyen biyam cem. 24 Apino da di Yehezkiel diyai munti dini ndo bindo tut jeni. Jeni cem mijibon nok gi dibon pima yo. TUHAN pai bipia mpe di mun dima cut igkep je lene mijikan tut bipia Noni ne TUHAN Di Ninyeng Jei Bibor ri.>>
25 TUHAN pai bida, <<Na di tungwatu di ayaijo kikau bi e, midiyai Ditde Ig di ngkiem kei di inggei sut cem ingon kei sut cem igya bimian huk nggilun cem icem kep bit leu ingon kanti cem dima leu yok. Leu api midipos imunggwom bat nya cem leu yok. 26 Tirigi njap di diyai igbit dipaisi dima dem lene tungwagom di ningwes ngun leu mun di bindei sar tungwatuti dima mikwei pai nibimbiti dima bina. 27 Njap dima dem lene aji di nggicai dima minggan ba, ambrap hanyen bu leu api abbwe bu bi. Lene ambrap bit no dima. Tug hon nisinati dima lene abindo bindo mem tungwatu nya. Leu api yoni mikan tut bipia Dani ne TUHAN ri.>>