Timiei minu ndig Yerusalem ingat nadi mem gima TUHAN ngondut yok
5
1 TUHAN e, ma ayok ngon kep mun di cut igkep nye o! Ma atou kep nye ba, angat niwer mindheti o!2 Nyende ndigban ninda rom cut ug ei yo di hiter indati ba, ngkiai nya ibong ser nyende ig nya cem o!
3 Siceu igyai nimai bak nyeni nicig bat nya ba, tini bu lene nyeni nipmem bat nya iwer kibom yok lene nyeni cem niwer moibihi nya tu o!
4 Suar niba mitiei bipek minyei di nidut kin biei di nindig kep hum cem o!
5 Siceu nya ibidip huk nye mem gima niyai midyai di buhun noyam kin mindhe-ndhe nya ba, ninghuisi wei lo, igiyai nituti binye mem nigwam kep ninghuisi bi o!
6 Nuug hara ninggum ba, nibicuon niyaisi ei minu Mesir ninyen lene nuug hara njita ei minu Asyur o!
7 Nidigup bat-nidigai bat nya ibon sisar bimai leu nye nipou su noro tini bu ne suar nyeni nitug ndei ninghuisi wei drek dip ide sisar di ibon nya o!
8 Yo di igyai munti nya kei dor njiriek awak nya bi inyeng tak kep nye lo, tungwa hi di sindem mem gima kwek nye leu inda nsi bi o!
9 Nihwen kep mun cig nya igyem mpia ei minu di gahai dini kou. Gino nehei bininggok njita lene nahanok igyai nimai binye o!
10 Niyai niwei tug hon ninggum apino ningkek dut bidem kep nok komfor di indig hum eisi o!
11 Siceu nya ikat sop nya binggek yok ei Mbigdip Sion ba, inggek sop gwam nitta pilei nya bidem minu mien ngot ei minu Yehuda hagom bibindei ba, inyeng kinei o!
12 Ikat kep nyende nibou nya ikimam ba, ipindur yok lene ikon ndigpoi nya inyeng bu bi o!
13 Siceu nya icuk pinai pilei nya biba tig giling boho gandum ngat ba, icuk munggwom pinai nya yug rop biei di buhun cem apino imbris drek dip o!
14 Ndigpoi ndig nya idem yam ei dimbou pmem nuhui ei minu ndig ba, doia nibimbi tibim kwei leu pilei nya yuhui cem bu bi o!
15 Nibong kei nigwam keisi kin niba ningon di nggei-hi-nggei bibien-bien nyenti pror leu nye tu ba, ningon nggukti luei bu tu o!
16 Mun di bindei ninggap leusi jo bu bi ba, mun di buhun cut igkep nye lewo nibon sisar tu o!
17 Ningon kinei-kinau bibor lene nipim kikau ba, niyai mmui drek dip,
18 lewo Mbigdip Sion ne mpia di mbum-bra rin ba, ninduk yam ei bu bi. Noro nsien bigbehei nya ilus-lus nyen eisi o!
19 Noro TUHAN e, Nani ne nibou ndig bijo kikau rin ba, anyeng mitak kep limwa nya bijo ninno bijo kikau.
20 Nggon rima akes nye ei ninno nok i? Mpaba abbwe ser nye bihigom tu e?
21 TUHAN e, ma asindui sut nye ba, nihwou hanyen ndam Na. Miningkwei hanyen ndam Na! Ma ayai nibong kei ningwam keisi binye hanyen nok gi nipou a.
22 He, ma acom nye bihigom tu e? Ade nigga nyeti bon nohonti bi sren e?