Tut hukum di cut igkep yok kin nikiek leu sisarti kin ide niyok ngon memti
3
1 Dani ne no di cut ei niweiti lewo TUHAN niggati cut bitak kep da tu o!2 Noni rino kri da ug ei mpia di ting di dindi-kai o!
3 Leu api bui-bui nyen da njap jei. Noni gingondut da bu bi o!
4 Noni rino bindei bidingut bok ba, dibokti buhun lene dinjum nya cem dahat o!
5 Leu api bindei ba, ningon nggukti kin niweisi nggai da o!
6 Noni cuk da leu binhyepo duug gwam ei nidinditi noyam kin yo di imai ei nijam pini jug o!
7 Noni rino ba lante di ngkiem biteu da apino bon puig hi mem gima dingwes ngun leu ninda nsi bi ug o!
8 Dahara niwei-nidut bak TUHAN bimpu da lo, Noni kou sut gi miap dihyet lene,
9 ba ngug tig nya bibigen ser ditde puig nyen-nyen o!
10 Noni rino bet ningon mem da nok beruang ba, dem kep singa di tindei ser da cem o!
11 Leu api yon igkep da kikau ba, dikriek leu puig ug api ham-ham nyen da leu lene bikes da ei o!
12 Leu api sror Nide tibor binai hammi da o!
13 Noni rino prindei da ba, Nide tibor ndei dingon bitibim kikau dingutti tu o!
14 Tungwatu nya yahagom ipa ndip da ba, iba ighyet bicig da njap jei o!
15 Noni yai mun di mpo bibor bida ba, diyem gima kibon kep njita bididut gima kibon kep minyei o!
16 Noni rino ba diimaisi binging dihyei lene ba dikwai bitug tig bitig dino dikwai dahat o!
17 Dibong kei digwam kei bi mimbrek tu o! Dibbwe ser ningon nggei-hi-nggeisi tu o!
18 Niyaijo mem nijam di jeisi hi jo bida bu bi ba, ditde niyok ningon mem TUHANti cut leu da tu o!
19 Dikan-kan nyen tut ditde nijo-jo nyenti kin mun di cut igkep da lene dem kep nok diyem mun di mpo-mpam di kos dikimam o!
20 Dikan-kan nyen tut mun dima bijo kikau apino gima buhun tak dingon o!
21 Mbro nok gima lo, ditde niyok ningon memti kiju hanyen tirigi diyok ngon kep mun nyeng gom bipia,
22 TUHAN de ningon ngakeisi jo kikau bijo mumpui lene nisingat tut nyeti ngwig hon nohonti bi sren,
23 noro jep-jau bikwop njap tekti bijo kikau! Ningat ne TUHAN ningon gom jit!
24 TUHAN ne ditde ndigban gom ngat di dingon ce bi rin! Gima rino diba dingon com Noni!
TUHAN singat tut yo di iba ingon com Noni
25 TUHAN singat tut yo di iba ingon com Noni kin yo di inggok tut Noni.
26 Gima rino nna ba nyeni yoom ingon bigwam nyahan bibou TUHAN kwei mpu nye ug e.
27 Nnaba ibingon tut noom ningonti tirigi ipilei yo dini.
28 Mpe dino TUHAN bindei ba, ninghuisi wei cut igkep nye lene ma ikimut yuhui bigwam nyahan.
29 Handei kon ba, yoom nyenti ingon bijo nyahan ba, icut biNoni hak ug leu mpaba TUHAN mimpu nye ei nidipti bu e?
30 Mbro nok gino siceu ittem nye bipai nye kinei lo, suar iba ibou coi sut gima yok hagom.
31 Lewo TUHAN mirok nye bijo ninno bijo kikau bi.
32 Niabiati Noni yai ninghuisi wei binye leu lene mingondut nyeni yo. Lewo Noni ba ningon ngakeisi di ug hon nohonti bi bingon ngakei nye kikau.
33 Ningon ce tut mem gima sindui sut nye ba, itug ndei ninghuisi wei bi.
34 Tirigi siceu nya ibindei ba, nyeni ingon buhun ei isimati cem,
35 ipos nisindemti po TUHAN yai binye di inyeng tut pima bipror leu nye cem,
36 ico kep nikei nya ide nikos tutti di sren nya lo, ningat ne TUHAN kan tut bingig niyai kep tu.
37 Gino TUHAN kos tut ningon kanti tut mun nyeng hi bi lene bit bon tungwatu nya igyai mun di njiriek ningon kanti dima kan bi.
38 Mun di kei kin mun di kinei hacem ibindei mbut tug hon TUHAN nicukti.
39 Gino TUHAN kes hukum ei tungwagom dip drek dip nide sisar lene nggon rima no dima nso-nso nyen tut i?e
40 Jikwei ba, imbus nyenti ingonti bingat igyai munti nya leu ba, ittin ser ide sisar di ibon tut TUHAN Allah ei gwamti.
41 Jikwei ba, iba ingonti titut yam bingat nadi bak TUHAN nok gini,
42 <<TUHAN e, nibon sisar ba, niba nyende niyai munti bikiek nimig jou tut Na noro agikos ser sisar dima bi.
43 Ahuk nye ba, ayai nimai binye. Ade nigga biborti yon kep Ade ningondut nyeti.
44 Ade nigga biborti dem kep bumbuhui di ndok bibor. Apino bit bon nyende nadi tibim njiriek bihwou ndam Na kan bi a.
45 Abindei nye bininok mpia di icom kep mumpiang keyam eisi bou tungwatu dihyeisi dini hagom igyai him.
46 Nyende siceu nya ighyet kinei sut nye ba, ipa ndip nye.
47 Nuum mun di buhun ba, mun di bindei timek nye cut igkep nye. Mun di bindei ba, ningon ttin bibor cem ninghuisi mpig sut cem tau kep nye bikwop njap ngwa hagom.
48 Diyai nggwei biam bidem minyei drek dip ditde mben di itimek tu.
49 Midipim kikau ba, dikes dihyet hon bi,
50 bibou Na di TUHAN ei gwamti angig ayai kep nye ug e.
51 Tirigi dingat notou nyende siceu nya ibibon sop timiei ngot di ingat rin ei nyende minu ndig lene dingon ngguk tut yok.
52 Siceu yuhuk da noyam kin gi yuhuk ha. Ingon kinei sut da mikui-kausi he.
53 Icom da tut diyaisi ug ei jui minyei bousi di minyei pingge leu. Leu api iba tig mma nindak gom bikibou kep nuhui hanyen ser da.
54 Minyei sindi kui ba, ut bipek dibou bidikan bigya <Siyaijo ngwig hon ug ri!>
55 TUHAN e, dahara biNani ei jui minyei bousi di jut bibor dima nijou bidipai bipia,
56 amiap dihyet o! Dahara Nani leu binhyepo ata kep atingou leu dihyet di dahara Na tut au. Noro ma ampu da o!
57 Lene amiap ditde nadi leu api akwei dideu da ba, apai <Adigit tut au.>
58 TUHAN e, akiju tut ditde munhyet ba, ateu da bidingwes ngun tu.
59 TUHAN e, ma akwam munhyet gau da lewo angat siceu nya di ibon mun kinei tut da.
60 Ingon sibui sut da ba, igyok ingon gom mem da tu.
61 Na di TUHAN amiap ide nihyet nitigut dati ba, akan tut ide niyok nihyet mem yamti di itin ei mem da.
62 Ibohom dat dinghapti njap jei mem gima ikinei sut da bitin ei ingon kanti di kinei bibor.
63 Iba da bilor yam leu njap tekti kikau bipek mmun kep.
64 TUHAN e, ma akes hukum ei yok dip dem igbit ide nibon munti nya.
65 Ma asigion yok ba, asindui sut yok bigyaijo ei ningon di cut leuti ug e.
66 Ma ahuk yo dima ba, abindei sar yok kikau bibou acok tut yahagom leu dihyei njek dip dini ug e.