Dibijig di ki kukiau
19
1 TUHAN pai bida bipia duug pek dibijig gom. Leu api pai bu bipia duug buwak timiei Yehuda nya ide nibou kin imam di ibou tiei su nya ibou poi ba, 2 dibie tut yok kak Dimbou Pmem Den Sra ug ei Mbang Briep Hinom. Noni pai bida bipia ditri tut nihyet di Noni pai bida. 3 Noni sok nihyet ei da dip leu api ditri tut biyok <<Je di nibou ndig minu Yehuda kin je di timiei minu ndig Yerusalem e, ma jingig jitingou mem mun di TUHAN Di Sindem Bibor di jide Allah cem pai bije. Midibindei ba, mun di buhun bibor cut igkep mpia dini apino yo di imiap tut nya ingon ttin bibor. 4 Dibibon je nok gini drek dip Ditde limwa nya di iba inghim bak Dani. Yoni ibindei ba, map kui mpia dini drek dip midut di ibon bak ngkiai nya ide kwar nya di yoni kin idigup bat-idigai bat nya kin nibou ndig minu Yehuda nya yahagom ingon dorti tut bi. Yoni yuhug yo di ingon ngun nya inggrom ba, ut ei mpia dini tu. 5 Ba, ibon nimbar hum dok mem Baal leu binhyepo ibon midut nindig imunggwom bat nya tut igyai noha kep hum. Dicuk yok tut ba, dingon kanti di nok gima hi bi sren. 6 Gima rino ei nidipti bu ne tungwatu nya mijem mpia dini ninyeng Tofet kin Mbang Briep Hinom bu bi noro mijem ninyeng Mbang Briep Nibui Mikwau. 7 Miditte tut timiei Yehuda kin timiei minu ndig Yerusalem nya yahagom ingon kanti ei mpia dini. Midisindui sut ba, ide siceu nya mikon pran bit yok leu api ibindei timek yok bingwig. Midisindui sut ba, ha nya mipuk ide nimbiam leu api mindhe di niten-pos nya mibriu yok nok ide mun di igyem. 8 Mun di buhun bibor di dikes ei minu dini dip mibindei ba, yo di injiriek mpia dini mikit ibou leu binga leu sut cem. 9 Jide siceu nya migyon ttai minu ndig dini bihwen kep timiei nya yahagom. Mun di buhun bibor di cut igkep yok mibindei ba, tungwatu nya mibui ide tungwatu di inttig-tta kin imunggwom bat nya cem nok mikwau.>>10 TUHAN pai bida bipia dibindei ki dibijig kukiau ei yo di ibit da yahagom yoho bei, 11 bipai bida bipia ditri tut biyok bipia TUHAN Di Sindem Bibor pai <<Midibindei ba, minu dini bitut timiei nya yahagom iki kukiau noyam kin dibijig dini. Bit bon hi kinding yok bikei hanyen kan bi. Tungwatu nya mitig nimai ei Tofet lewo jui dip nindigsi nya hagom mpung ser tu. 12 Midibindei ba, minu dini bitut timiei nya yahagom minoyam kin Tofet. 13 Ig hagom ei minu ndig Yerusalem kin nibou ndig minu Yehuda nya ide ig kin ig di tungwatu nya indig biei nggrai di ui-gwang kei bak ham mpia-bbed him nya eisi ba, ibon midut nisiber ba anggur ningei bak kwar nya cem ei ninjek dip nyaf apino map kui hagomti noyam kin map kui Tofet.>>
14 Lene dijo leu Tofet mpia di TUHAN cuk da biditri tut nihyet ei pima. Duug ei mpia di jo bas hak ei TUHAN De Ig bidiya diyati leu api dipai bak tungwatu nya yahagom, 15 TUHAN Di Sindem Bibor di nok mben Israel ide Allah pai bije <<Dibindei ba, hukum di buhun bibor micut igkep minu ndig dini bitut minu mien di gahai nya cem hagom bit leu nok dipreu ei mem jeti lewo jahagom jingkek ndok ba, jingig jitingou mem dihyet bi.>>