Nibou ndig di ningon gom
32
1 Jingat i! Ei nidipti bu ne nibou ndig di ningon gom ninyeng mitak kep ba, yo di igya kui noni mikrau kep ningon sren-srausi. 2 Bikwop yoni yahagom inoyam kin ig jibei di yohok ser hou di kui yokti kin hak mihyeti di icoi bigya nding tirigi sigau yem yok. Yoni idem kep nok minyei di biam sindem ei iggum ndigsi nya kin tring behei ngot di tungwatu nya igwam coi ei iggum ndigsi. 3 Yoni migyok igyai kep ide limwa nya ide mun di isuar nya bingig itingou mem ighyet. 4 Yo po ingon cun pima inok gima bu bi noro yoom ingon ba, nggriu. Yo po yuhui buwei pima inok gima bu bi noro iji ngkiem. 5 Tungwatu nya minggei sut no di ningkek ndok ba, igisimbot dat bipia niris kep mun cig ningon kwes bu bi. 6 No di ningkek ndok nuhui buwei ba, kos dat mun di mbuk bibor cem. Noni ba niyai munti kin nihyet binim kep Allah bikwas njita tut yo di inggum bitau ndia ngei bak yo di inggobiau bi sren. 7 Niris kep mun cig ba ningon bisrip huk mun di mbuk bibor leu api kinyon eisi. Noni yok ningon gom tut no di nuhui mbum bibindei ba, mun di buhun cut igkep noni bibindei ba, no dima yai mun di dem mem noni bi tug hon gi ris mun ei noni dip. 8 Noro no di singat kei ningon gom lene ba ningon bisrip huk mun di singat kei ba, niyai munti nya cem singat kei.Hukum micut igkep yok noro TUHAN mipui nihyet tut yok hanyen bu
9 Je di sop di jibong kei jigwam kei e, ma jingig jitingou mem dihyet. 10 Jingon jo nyahan mem nijam dini noro ari bingwam gom gi gwam dip bu ne jingon kinei bibor lewo jide ba anggur kin njita beisi cem ngat ningat bi. 11 Hon kep ammani nimo jug ne jibong kei jigwam kei noro tini bu ne jinghuisi mimpig sut bijittin bibor. Ma jijuk jide sinsun leu je leu api jikri sinsun kron kep jintig boua. 12 Ma jipim tut miai jide di nnum kei nya kin miai ba anggur jide di ningat mpung kei, 13 lewo cibou kin mun di tigot-tigau miceu hagom. Igbit ri! Ma jiyai nggwei kibor tut ig di tungwatu nya ibong kei igwam kei eisi kin ide minu ndig di mpung tut yo di imbos-hi-mbos nya. 14 Nibou ndig de ig di kei bibor kin jide minu nibousi po nipou ne igyai nillei eisi pima minok ha ngunti bu lewo tungwatu nya ikes hagom ei binang leu su. Jide siceu nya midime jide nungug tou nya kin jide ig hagom ba, sur yam kei bijo ninno bijo kikau. Leu api keledai bigbehei nya miya-ya nyen kep ba, domba nya miyem kep abris bou cem ei sirima.
15 Noro ei nidipti bu ne Allah mikwei sut Nide nisindemti leu api iggum ndigsi miluei nitta binok beisi di nnum kei ba, njita beisi nya dimbun kei hanyen bu. 16 Minu dima mimpung tut yo di ingon gom kin nikei nikos tutti nya di sren kei. 17 Tungwatu nya igyai munti di igbit hagom mibindei ba, yahagom ingon kwes kin yam ba, ibong kei igwam kei. 18 Mun di buhun micut igkep Allah de limwa nya bu bi apino yoni mibong kei migwam kei. 19-20 Mijingon nggei-hi-nggei sut minyei di dem mem jide miaisi nya ba, jide mindhe-ndhe nimuhup tu nya miba ingon di jo nyahan biyem kep abris meng ei abris nghousi bidem minu. Noro jide siceu nya midem kep biei bou di biget di but mbras di dem kep nok tig njep hwen ba, timek bingwig. Leu api ide minu ndi nya mitimek bingwig.