Mun di micut igkep minu ndig Yerusalem
29
1 Buhun bibor mem minu ndig Yerusalem di indat bipia Allah de nimbar hum dok! Buhun bibor mem minu ndig di Daud hok prak meng nya eisi a! Nnaba ari bingwam ug-kwei sut niyok ngon kep njap nindig nya. 2 Leu api Allah miba mun di buhun bibor bihwen minu ndig dima apino tungwatu nya minso tut niwei ba, yahara nidut cem. Minu ndig titut midem kep nok nimbar hum dok di mun nggrom silipti a. 3 Allah minjei siceu bibihwen minu ndig dima ba, biyon ttai bei ninghim noho cem bei ninghas him nite hi nite hi cem. 4 Minu ndig Yerusalem minoyam kin njungwes di gruap mem bindei hei nihyet leu dihyei jou kin nihyet di gunggwei di tibim kwei leu dihyei ndungti.5 Noro ngkiai di isibut bibor dima yahagom mipror hak bidem kep dihyei ndung kin biei nnir di hou miep di bit hou nimig hak. Yoni mipror kros hak tirigi ikan tut ei mem bi. 6 TUHAN Di Ninyeng Jei Bibor miba hou sigau di nimig ten bibor kin ngkit di sindem bibor biteu minu ndig dima biyai ningwes ngun bak. Noni mikes hou sigau di nimig ten bibor kin hum di cig-cai kwei. 7 Leu api nimpung tentara ngkiai di injei ba, ihwen minu ndig Yerusalem di nok Allah de minu ndig kin Allah de nimbar hum dok bitut yo di igyon ttai di inggek bitimek nya yahagom mipror hak noyam kin gi imumpriem mem mmun. 8 Ngkiai nya di idem yam ei mem gima injei bihwen minu ndig Yerusalem midem kep no di ninggum hwen di mumpriem gi nuhui jo kep njita biyem noro kiju tut ninghop di ngwak ba, dem kep no di mai ninggobiau di mumpriem gi nuhui jo kep minyei di dut lo, kiju tut gi nikibou ngak.
Igibit nabi nipingokti nya bi
9 Jibindei mbut ninggap leusi kin nimut niyaisi dem kep no di niyai tu kikau! Handei kon ba, jibou ngwak sibui lo, sibui sut gi jidut ba anggur ngei bi! Nnaba jiba jintig di kibi-kibou yam bimbut lo, drek dip gi jidut mun di pu je bi! 10 TUHAN bindei bijiiman ba, jibong mai. Noni tak kep ser nabi nya igyai binggai kep yo di ingat ningat-hi-ngat iimaisi cem. 11 Noni mibindei ba, jingon dorti tut bikwop nabi de ningat-hi-ngat bi bijo nding leu je dem kep srat di iba lem bikrau ser. Gino jindo srat dima bak tungwagom di niyai tot srat bokti kan leu binhyepo noni mbot kep nibokti dima bije lene noni mipai bipia dem mem gima dikwop gini bije bi. Lewo iba lem srat dima ser tu. 12 Gino jindo srat dima bak no di niyai tot hurup bi lene noni mibuhup bipia noni kwop srat dima kan bi.
13 TUHAN pai <<Yo dima ikuk yok biDani ei yuhui him he noro ingonti ne jo minu ting leu Da. Ide mun di ikuk yok bak ne tungwatu ide nikos tutti di ipwoi ei ibou ngwakti he ri. 14 Gima rino midibindei ba, idigit tut nibui yokti di bijo kikau. No di ningon ki minok no di ningon mbum ba, ide ningon tekti nya hagom bon ninyeng bi.>>
Niyok ningon mem nijam gi nidipti
15 Buhun bibor mem yo di ibingon mem gima iku ingon kanti di itin ei nya leu TUHAN! Igyai mun mmuti nyahan ba, ikan bipia hi di ngat igyai munti dima ba, hi di kan tut mun di igyai bi. 16 Ikiek-kiek nyen mun nyeng hagom. Gi tou rino bon ninyeng i? Niba igtuyap bibon kep dibijig cig e, he igtuyap dima e? He ma mun di hi bon bou ninda him pai bak no di bon no <<Nani rino abon dani bi>>. E bi! He ma mun di hi bon bou ninda him dima pai bak no di bon no <<Agibon mun kan bi>>. E bi!
17 Nihyet nibiti nindati hi pai <<Jei bi ne baham tindur wer miai lene sidumti ngkwei ba, wer baham tindur hanyen.>>
18 Mpe dima lene yo di itingou nam mimiap srat di hi kwop kep ba, yo di igyai tu di igwam ei nidinditi igyai mipiga bingat mpia cem. 19 Nuhui mbum nya kin nikinei-kinau nya mikiju bingat ingwes ei ninggei-hi-nggei di mben Israel ide Allah di kwes yai biyoti hanyen. 20 Gima ne ningwig honti mem yo di ico kep nindigsi nya ba, ighyet kinei sut Allah cem ri. Allah mibindei sar yo di ibon sisar nya yahagom, 21 bitut niris mun ei hiterti cig nya kin yo di ibigen ser hukum di suar ma cut ei yo di ibon mun di kinei nya dip kin yo di itri tut niris mun ba, ibicom nikei ningon leu binhyepo noni kos tut yo di ingon sren nya ide munhyet igbit bi.
22 Gima rino nogindini TUHAN Allah Israel di teu Abraham biningwes ngun pai <<Ditde mben e, hi dima mipai je kinei ba, nimmai mibindei jiimaisi hai bu bi. 23 Tirigi jingat jimunggwom bat di diyai bije nya lene mijipai jit bipia Dani ne Allah Israel di kwes-kwau ri. Mijinggei sut Da bijittin tut Dani cem. 24 Yo di ingon mbum mipikor tut ningon di huk niti lene yo di yahara kai ningginausi bikwop nya mingon kei sut ningginausi dima.>>