Nisok nihyetti tut minu ndig Tirus kin Sidon
23
1 Gini ne nisok nihyetti tut minu ndig Tirus ri. Niyai midyai ei muk ngwa dip cig leu minu Spanyol di jiba kibar bimbut muk ndigsi e, ma jipim ba, jibwos-bwos nyen! Mpe di jibri kibar ba, jijo leu Mios Siprus lene jimiap tut bipia minu ndig Tirus timek tu. Muk nuhuisi di kibar yati dima kin ig nya nggek sinsiou tu.2 Timiei mukti nya kin nitri-nipek kep mun cig nya ei minu ndig Sidon e, ma jinso ug. Lewo jiba kibar bipinak tungwatu nya ug ei muk ndigsi nite dima ug, 3 mem nitri-nipek gandum minu Mesir kin ndigban di ngkiai nya ide cem bit leu jiyai kepti.
4 Minu ndig Sidon e, anyeng di jei pror leu na tu! Muk ndigsi di jut bibor kon anyeng bu bi bipai <<Diyai ningwoi-ngwoi nya bidinyohou munggwom pinai kin sop nya bindig bigyo sren o!>>
5 Gino mben Mesir cem imiap tut minu ndig Tirus nitimekti lene midigit tut ba, ighyet sra tut cem.
6 Timiei mukti e, ma jipim ba, jibwos-bwos nyen leu api jingwes ngun ug ei Spanyol cem. 7 Jingat jide minu ndig Tirus di jo leu nijam gi nipou yo kwei tu dima i? Gini ne minu ndig di nillei ngwig rin e? Gini ne minu ndig di pinak timiei nide nya ug ei muk nite dima ug mem gima ibong nok ngkiai ei sirima rin e? 8 Yoni ne tungwatu nitri-nipek kep mun cig nya di intun yo di inyeng jei him di tungwatu nya ibou cut biyok bibor ei dihyeisi dini rin bi e? Tou rima kos tut mem gima bindei timek minu ndig Tirus di ninyeng jei bibor dini i? 9 TUHAN Di Ninyeng Jei Bibor rino kos tut ningon kanti dima. Noni kos tut mem gima bicut limwa nya ingon di jei drek dip ningat di itug ndei ba, om kep yo di inyeng jei ei dihyeisi dini cem.
10 Timiei minu Spanyol e, ma juug yai jide miai nya. Lewo mun di jibisigi jide kibar nijou nya jo bu bi. 11 TUHAN su ninda nai muk ngwa dip ba, bicut minu ninyeng tak kepti nya ei dihyeisi dini. Noni kes nihyet mem gima siceu nya igya kep Fenisia de tentara nibousi niya coi nya hagom bisar nipwoi a. 12 TUHAN pai <<Minu ndig Sidon e! Ayai nillei bu bi. Siceu nya ico kep timiei ade nya tu. Mbro nok gino ipri ug ei Mios Siprus lo, mibong kei igwam kei ei sirima cem bi.>>
( 13 Mben Asyur rino isindui sut bi noro mben Babel rino isindui sut mindhe-ndhe di niten-pos ide nisindemti di om kep minu ndig Tirus a. Yoni rino ingot ig ninggilai nut yam di ibiyon ttai ba, ibinggek tentara nibousi niya coi nya ba, ibindei minu ndig dima binggek sinsiou ei cem.)
14 Je di timiei kibar nsi e, ma jipim ba, jibwos-bwos nyen! Minu ndig di jiba jingon com timek tu.
15 Njap ngon bou midem leu api tungwatu nya mibbwe ser minu ndig Tirus kikau mem nijam ari bingwam ningot muhwindacan di noyam kin nibou ndig gom nide njap nijeisi ri. Gino njiriek nijam dima tu ne minu ndig Tirus noyam kin sop di iba doia bikiek bipai,
16 <<Sop di tri nonti di um mun di buhun ba, tungwatu nya ingon prion ser tu e, ma ayai nggong mbrei ade ba, abimbut ttai minu ndig! Ma akek nggong mbrei ba, abipai doia bu leu binhyepo igyok ngon kep na hanyen bu.>>
17 Ari bingwam ningot muhwindacan dima ngwig leu lene TUHAN miyok ngon kep minu ndig Tirus hanyen. Noni mibindei ba, minu ndig Tirus yai kep nide midyai nok gi nipou hanyen. Noni miyai midyai nitri-nipek mun bit mben dihyeisi dini hagom. 18 Noni mipigig sut nibittemti kin nimuhup di yai nya mem nonti bi. Noro miyai gima hagom bak TUHAN. Apino yo di ikuk yok bak TUHAN miba mitiei dima bipek mun di isuar nya nok sinsun di ijuk kin njita di igyem.