Ningat-hi-ngat tut minu Babel nittiti
21
1 Gini ne nisok nihyetti tut minu Babel ri.Mun di buhun bibor di tereu nok hou nimig di sibui di nibimbiti nindig cut kwei leu iggum ndigsi bindei ba, tungwatu nya ingon ttin bibor. 2 Dingat ningat-hi-ngat tut mun di cut igkep tungwatu nya di bibon ingon di ttin bibor kin naham nimbuk kep yamti kin nibindei sar yamti cem.
Tentara Elam e, ma jikiju bijinjei siceu bijihwen! Tentara Madai e, ma jiyon ttai! Allah mibindei ba, ninghuisi wei hagom di minu Babel bindei mbut nya mikes hon.
3 Ningat-hi-ngat dima bindei bidingon tai-tai bou ba, digingat mpia cem digimiap nihyet gom cem bu bi. Nittinti kin ninggwenti hwen da bidinoyam kin sop di sindi gwam tut nimunggwom. 4 Dingon digit. Ningkek di henha bindei ba, didigit-digoi. Mmun di diyok dingon mem kwei sut nidigit-digoisi.
5 Dingat njita pesta kin banggo mem yo di ijem yok kwei igwamti cem di itin ei su. Leu api igyem njita bibidut ndia ngei. Leu api nicukti gom tibim kros kwei bipai <<Nibou tentara jen! Jitin ei jide mun di jibipukep tibor ninggwenti nya di jibicuon jiyaisi!>>
6 Leu api TUHAN pai bida <<Aug ba, akes tungwagom bitindei ser. Ma acuk noni bipai sut mun di ngat bou niyai him. 7 Gino ngat nimpung tentara di ibri kuda kwei di idor ninggre can kin nimpung tentara di ibri keledai kin unta nya kwei ne suar noni yok niyai kep yok mungkun kei.>>
8 Leu api no di ya bitindei ser dima hara <<Andigpoi e, diya biditindei ser bikwop mmun-njap ninno tu.>>
9 Angat i! Gima ne yo ri! Nimpung tentara di ibri kuda kwei dima ibou can-can idor nggre. Leu api no di ya bitindei ser dima tri tut <<Minu Babel cut tu! Kwar di ide di ikon ninyeng bijo nai timek biyem mpia ei dihyeiti tu.>>
10 Ditde mben Israel e, siceu nya ico-co nyen je dip ba, ico kep je nyen tereu nok ico-co nyen kep gandum ninjep. Noro tini bu ne ditri tut nihyet di kei di dimiap leu TUHAN Di Ninyeng Jei Bibor di Allah Israel bije.
Nisok nihyetti tut minu Edom
11 Gini ne nisok nihyetti tut minu Edom ri.
Tungwa hi jem kwei leu minu Edom bipai bida <<Na di niya ser cig e, mmun dini no jei yo e? Jo jam pig bu leu api njap tek i?>>
12 Lene dibuhup <<Njap tekti mikwei rin noro mmun cem mibram bu. Gino dibuhupti dima dem bi ne ma ariman akwei hig ser da bu.>>
Nisok nihyetti tut minu Arab
13 Gini ne nisok nihyetti tut minu Arab ri.
Je di mben Dedan e, jide nimpung nitri-nipek mun cig nya yohok ide prak meng yati ei dihyei Arab de war nggig-nggwenti. 14 Timiei Tema e, ma juhug minyei bak yo di inggobiau di ikwei ngat je nya bidut ba, jikwas njita tut yo di ingwes ngun leu itimieisi dima bigyem. 15 Lewo inang leu singau simeda di hi kus leu naham kin hampiap di dahat kan bi kin pran di cut di kiju bibor.