Allah mikes hukum ei mben Babel dip
13
1 Gini ne Allah nisokti di Yesaya di Amos nipmot yai di bitut mben Babel ri.2 Ma jitas kendera pran nya ei nungug dip di nggrei nya! Ma jijem bak tentara nya bipia jisu jinda! Gima bindo tut nituti di injei bihwen dimbou pmem nya ei minu ndig di kon nonti dima. 3 TUHAN jem nide nihwen mun cig di dimig yok ei su nya. Mimbri kui ingkek lene ingon nddong cem ba, TUHAN ningon llei sut yok. Noni pinak yok mem gima ikes hukum ei yo di itug ndei Nide niggati nya dip.
4 Jimiap nihyet di ter ei nungug him di dem kep yo di imang bibor di idem yam ei ighyet dima. Jimiap minu ninyeng tak kepti nya kin ngkiai nya di idem yam ei ighyet di kui yam dima. TUHAN Di Ninyeng Jei Bibor tin ei Nide tentara nya mem gima ikon pran. 5 Yoni ikwei leu minu di jo ting bibor ei dihyei nohon keti. TUHAN ba nigga biyai yo dima mem gima ibindei sar dihyeisi dini titut yam.
6 Ma jipim kui jei lewo njap di TUHAN de dideu kwei su. Njap dima ne TUHAN Di Ninyeng Jei Bibor de njap nibindei sarti di Noni kes kwei ri. 7 Bikwop tungwagom-gom ningkek kan gi ninda mai ba, nibrim ningkekti cut. 8 Nittin biborti micut igkep yo dima yahagom. Yahara inghuisi di wei noyam kin sop di ninghim dut di bigwam tut nimunggwom. Yoni miba ingon di digit bitou kep yam yaisi ba, iimaisi hai lewo igwam nimmaiti. 9 TUHAN de njap mikwei ba, njap dima ne TUHAN bindei mbut nigga biborti kin nimbuk biborti di bindei ninggap leusi. Noni mibindei ba, dihyeisi dini nok iggum ndigsi ba, bikwop yo di ibon sisar misar. 10 Bikwop ham nya kin nimpung ham mpia-bbed him nya ninjeng kes hon ba, mipiga mpia bu bi. Mpia njap dindi ei nipriti dima lene bed mmun cem ninjeng mipiga mpia bu bi.
11 TUHAN pai <<Midikes hukum ei dihyeisi dini dip drek dip nibon mun di kinei biborti. Lene dikes hukum ei yo di isibut nya dip drek dip ide sisar di ibon nya. Midicut bikwop yo di ikon yonti nya inyeng leu yok ba, midikes hukum ei yo di ingon jei nya kin yo di iten-pos nya dip. 12 Yo di ingwes ngun nya poi mien bibor. Yoni poi mien he ritereu nok mas di pimbai kei a. 13 Midibindei ba, mpia-bbed him digit ba, dihyeisi dini ugwa-kwei bison leu nijoti mem njap di Da di TUHAN Di Dinyeng Jei Bibor dindo Ditde niggati ei nibreisi.
14 Ngkiai di ibong ei Babel nya mintek gimahap ba, tungwagom-gom nang ug ei nitimieisi hanyen. Idem kep rusa di nang leu no di huk no pimo. Nok gima cem idem kep domba nya di ibon ide gembala bi. 15 Bikwop tungwatou rino siceu nya ikat lene midat bigyai nimai bak. 16 Yoni mingat siceu nya di ibui ide munggwom ngwoi nya binem-nnai cem di icoi ug ei ig di ide bicat ndigban di ide nya cem lene ikat itnem bat nya bicut tut yok bou igyai him cem.>>
17 TUHAN pai <<Mporo dipingok mben Madaih ingonti leu api injei bihwen mben Babel. Dem tut gima hi ba mas kin perak bingot kep yok bi. 18 Iba ide hampiap kin singau tibor biyai nimai bak pinai kin sop gwam nitta pilei nya. Ingon gi nggriu sut ningwoi-ngwoi nya bingondut munggwom mien nya cem bi. 19 Minu Babel rino kei bibor kei dor njiriek minu ninyeng tak kepti nindigsi nya ba, timiei di ibong minu ndig dima ingon llei sut. Noro Da di TUHAN dibindei bitimek noyam kin gi po dibindei timek Sodom kin Gomora. 20 Tungwagom ngat cem mibong ei sirigima bu bi. Mben Arab di ibong-bong nyen ei iggum ndigsi hi di mohok nide prak meng ei mpia dima ba, gembala hi di mijem nide domba nya bikes yok kep minta di igyem ei mpia dima bu bi. 21 Mindhe-ndhe di ipijuk kan bi nya mibong ei mpia dima. Hapug mitot naham ei ig bei di ide nya. Ha unta cem mibong ei sirima. Kambir di ipijuk kan bi nya cem mipri-pri nyen ei ig kumti nya. 22 Nsien bigbehei kin nsien mbrei igyausi mibong yam dip bitibim kwei leu minu Babel de tentara nibousi di igya coi nya kin ig nibou ndig de cem. Tto bou mem gima minu Babel tug ndei nitimekti dideu kwei su. Nide njap dem tu. Hi dima om ei bu bi.>>