Allah sok nihyet ei Nabi Yesaya dip bak Nibou Ndig Ahas
7
1 Nibou Ndig Ahas nicig ninyeng Yotam ba, nignyon ninyeng Uzia. Mpe dino Ahas ninyeng tak kep timiei Yehuda nya lene Rezin di nibou ndig Siria kin Pekah di Remalya nipmot di nok nibou ndig mem minu Israel injei siceu kwei bikon pran bit timiei minu ndig Yerusalem nya. Noro bit bon ihwen yok bitimek kan bi.2 Tirigi Nibou Ndig Ahas miap tut tentara Siria inghapti bipia ikwei njei siceu bit tentara Israel pima tu lene noni kin nide limwa nya yahagom ingon ttin bibor ba, inok biei ninggrupti di hou ttem-ttem nyen.
3 TUHAN pai bak Yesaya <<Ma nani kin apmot Syear Yasyub juug um Nibou Ndig Ahas. Mijingat noni ei mpia gom di ijem ninyeng bipia Mpia Nitot Kep Sinsun Cig ide di jo simiak minyei di yehek kwei leu minyei bousi gom di jo nai nindenti dima. 4 Acuk noni bipia tindei ser siceu nya noro ma ningon jo nyahan. Ma noni ttin tut yok ba, ningon buhun au. Lewo Nibou Ndig Pekah kin Nibou Ndig Rezin bitut tentara Siria yahagom ide niggati noyam kin bui priot can di tti tut nimmup he. 5 Mben Siria kin mben Israel kin ide nibou ndig yuhum yam nsi ba, 6 ikos tut bipia yoni mihwen je di timiei Yehuda nya bibindei ba, Ahas de limwa nya ittin tut yok leu api yahagom mitti kin yok bu. Leu api nibou ndig cin dima mita Tabeel nipmot nok nibou ndig biya luei Ahas nohoti bu.
7 Noro Da di TUHAN disimbot dat bipia mun di buhun dini micut igkep Ahas bi sren, 8 lewo mben Siria ibon ide minu ndig nibousi ei Damsyik ba, Nibou Ndig Rezin ninyeng tak kep minu ndig Damsyik sri bibou mben Israel icut bak ide siceu nya di mihwen yok bitimek bingwig ei nijam ari bingwam ningot muhwindagom ba, muhwi ngwig ug e. 9 Mben Israel ide nisindemti nindig dor njiriek minu ndig Samaria bi ba, minu ndig Samaria de nisindemti nindig dor njiriek Nibou Ndig Pekah bi.
Gino aba angon titut bicom Da bi lene acut bak ade siceu nya.>>
Bindo di bitto Imanuel nikweisi
10 Mpe dima lene TUHAN sok nihyet gom kin bu bak Ahas, 11 bipai <<Ma ahara Da di TUHAN bidinok ade Allah leu binhyepo diyai bindo di bitto gom bina. Gino bindo dima tibim kwei leu nimai nya ikieti lene gima kei lo, tibim kwei leu mpia-bbed him lene gima cem kei.>>
12 Noro Ahas buhup <<Dikou sut gi dahara Na tut bindo di bitto. Leu gi nok lene dibingon Na di TUHAN.>>
13 Lene Nabi Yesaya pai <<Gi nok lene je di jintun Nibou Ndig Daud him e, ma jimiap kep dihyet! Gino jibingon tungwatu nya tut gima yoom ingon tut jeti bidem bigyo apino jibingon Allah cem tut gima om ningon tut je bu e? 14 Nogindini TUHAN Nonti mindo bindo di bitto mem je. Sop gwam nitta pilei gomd di nghop tu misrek tut nipmot leu api jem ninyeng Imanuel.e 15 Tirigi nipmot dima mahan ba, ningon tungwatu ne tungwatu nya mibong kei migwam kei. 16 Noro nipou tirigi tto bou dima dem bigyo ne nibou ndig cin di attin tut pima ide minu hagom minok mpia di ha he bong.
17 TUHAN micuk nibou ndig Asyur kwei bihwen je. Gima bindei ba, nani kin ade ig bei nsi nya kin ade limwa nya jahagom mijitug ndei mun di buhun bibor dor njiriek mun di buhun di nipou cut igkep je ei mpe di po mben Israel kin timiei Yehuda nya ikwas yam pima kikau kwei bipek ammani kep.
18 Mpe dima lene TUHAN mihig mben Mesir di imang bibor di noyam kin kros nya kwei leu Minyei Nil nibrig. Noni mihig mben Asyur di inoyam kin mimpam nya kwei leu itimieisi. 19 Yoni mingwig kep mbang di jut bibor nya kin dihyei mihyeti nya kin mun di tigot-tigau nya kin mintu-minta hagom ei jide minu dini.
20 Mpe dima lene TUHAN muubon nibou ndig Asyur binok awak leu api nibou ndig dima miyai mun kinei sut mben Israel noyam kin nikak kep tungwatu inta bidem ingut titut cig bibindei ba, inta ngwig leu yok.
21 Mpe dima lene mbro nok gino tungwagom mihyen kep sapi mien ningut gom kin kambir ningut can he lo, 22 do ngei di noni miyai leu mindhe-ndhe dima nimangti midor njiriek mem ibou poi di niken di igwam ei minu dima idutti. Ningat ne yo dima midut sapi do ngei kin ahwei lon ngei ri.
23 Mpe dima lene ba anggur ninjem sribu gom hei bibikwop miai anggur di kei bibor nya hagom ba, nibok ug ei mitiei perak nibuhunti sribu gom bibikwop nok. Noro cibou nggwen kin tigau nggwen miceu hagom. 24 Yo di ingim kan nya di yuug ei mpia dima ittei ide hampiap kin tibor nya mingat lo, cibou nggwen kin tigau nggwen kieng kep minu dima hagom tu. 25 Ba, ndia nggwen di tigot-tigau dima miceu miai di igyai ei nindenti nya hagom apino mibrim ingkek biyuug ei mpia dima bu bi. Noro sapi kin domba nya yongkom he rino migyem kep mintu-minta ei sirima.>>