SRAT DIUN MIMUN
1
1 Diun di Salomo pas di brim ingon dor njiriek diun nindigsi nya.Diun Gi Nigom
No di sop mbrap
2 <<Aba ahui ngkek bimei da. Angon ngakei dati nyop kei dor njiriek ba anggur ngei!
3 Anghap ui-gwang kei. Anyeng dem kep mini di ui-gwang di kiber a. Gima rino sop gwam nitta pilei nya ingon ngakei na ug o!
4 Ditde nibou ndig e, sibrim simig haninyai. Abuwak da ug ei ade ninsi di abong a. Abindei ba, nahagom ningon nggei-hi-nggei ba, nikon ade ningon ngakeisi ei nai dor njiriek ba anggur ngei. Dem mem gima sop gwam nitta pilei nya ingon ngakei na o!
5 Je di sop minu ndig Yerusalem e, mbro nok gino dingkek rom lo, dani ne sop di ubbu ri. Diromti dem kep prak meng di yohok ei iggum ndigsi Kedar. Noro dingkek dia-diau bidem kep minghas mbrawin ngot di ipindur ei Salomo de ig nibou ndig!
6 Ma jingwes pri gau da drek dip dingkek di rom au. Lewo mpia com pijuk dingkek. Dikijam bat nya ingon sibui sut da bicuk da ba, diyai midyai ei ba anggur nghousi. Gima rino bon nituti ndia hi mem gima dinyohou dingkekti bi.
7 Disut di dingon kieti na e, ma apai igbit bida tut mpia di anyohou ade domba nya eisi ug e. Akes yok bibong nyahan ei sirigitou mem mpia huk pijumti i? Nggon rima diba minyahas ninggai biku diimaisi ei mpe di duhwou-hwou nyen ei kambir kin domba di asut bat nya ide nikieti he i?>>
No di pinai mbrap
8 <<Na di ubbu ngat ei sop nya ikieti e, nggon rima akan tut mpia dima bi i? Abit nimpung domba nya yoho hak ba, anggok abris nghousi mem yok dideu gembala nya ide prak meng yati nya.
9 Na di angwam kep da ba, angon ngakei da e, nani noyam kin kuda niwek hi di kri nibou ndig Mesir de kroba di bri bigwamti.
10 Anyoi dia kei ei ade mimau nggreti. Akimam kei-kau sut tig permata komti di andei a.
11 Midiba mas bibon miep komti bidicim perak nitou nya eisi mem nani.>>
No di sop mbrap
12 <<Tirigi ditde nibou ndig bong nibongti leu lene ditde mini narwastu di ui-gwang kei nuui tun kei.
13 Mpe dino no di ngwam kep da bidingon ngakei dima bong dingget dip ne nuui tun bidem mura.
14 No di ngwam kep da bidingon ngakei dima dem kep mitou pacar nibou gom di hei ei ba anggur nghousi ei En-Gedi.>>
No di pinai mbrap
15 <<Na di dingon ngakei e, aubbu ngat. Ningat ne nani ubbu ngat! Ba, ayai nggrop mbris bibor.>>
No di sop mbrap
16 <<Na di dingon ngakei bibor e, aubbu ngat. Aubbu ngat nijit a. Abris nghousi minok nghim nsi di siyem njita tut yam eisi ba,
17 biei aras kin buom mijei gau sa binok ig jibei ei abris nghousi dima.