--19--
24
1 Ma angon kinei sut yo di isibut nya au. Ma ahig asut bit yok au. 2 Lewo ihig yam tut bigyok ingon gom mem ibindei ba, mun di kinei cut igkep tungwatu nya.--20--
3 Yo di ig bei nsi nya ibindei sindem ide ig tug hon ide ningon kiti kin ide ningon dor nititi. 4 Yo di intin kimbo nya ide ig mpung tut ndigban di nibok kak ba, kei-kau cem.
--21--
5 Ningon kiti bon ninyeng dor njiriek nisindemti. Nintin kimboti bon ninyeng dor njiriek ninghuisi sindemti. 6 Nipou tirigi tentara nya ikon pran bigyo ne suar ikos dat bidem nipou ug e. Gino nipingok kep ningonti cig nya imang yo rinaha ne tentara dima mibindei sar ide siceu nya bingwig.
--22--
7 Bit bon no di ningkek ndok ningon dorti tut ningon kiti kan bi lewo jut bibor. Bit bon noni bohom ndat mun hi ei mpe dino hiter isimbot kep biyam tut mun di bon ninyeng kan bi.
--23--
8 No di kos dat ningon kanti tut mun di sibut ne tungwatu nya mijem ninyeng ninggek kep mun cig. 9 No di ningon tindur ningon kanti di tin ei nya bindei ba, sisar ntun him. Tungwatu nya ingon mpo tut no di ba nihyet bicig yok.
--24--
10 Gino mun di buhun bibor cut igkep na biyai angon bicut leu lene jo nibreisi bipia adem mem mun nyeng hi bi.
--25--
11 Ma ahig angon eisi tut gino ateu no di ningon ngun leu hukum nimai au. Ma ateu noni nipou tirigi indin nikimam bigyo. 12 Gino akan <<Handei kon ba, sisrig nide munhyetti au.>> Lene Allah mingig niyai kep na. Noni kan bidem tut akanti dima leu api ba ningon di sren kei bimbus angonti. Noni birop hanyen bak tungwatu nya bit leu igyai munti nya.
--26--
13 Dimunggwom na e, ma ayem ahwei lon ngei. Gima kei mem na. Ahwei lon ngei di nyop kei, 14 bindo tut ningon kiti di nyop kei mem ade niyaijoti ri. Gino ama ningon kiti bou na lene gima biyai angon nggei-hi-nggei ei nidipti bu.
--27--
15 Ma ayai bram yo di isibut nya di igyok ingon gom mem gima ipos mitiei kin ig leu yo di ingon gom nya igyai kepti nya au. 16 Mbro nok gino mun di buhun cut igkep no di ningon gom mbirimang bibindei ba, noni cut-cut nyen lo, noni mikiju hanyen. Noro mun di buhun bibor micut igkep yo di isibut nya ba, imos kei.
--28--
17 Gino ade siceu nya itug midut bicut lene ma angon kei kep yok ba, ayai nillei tut cem au. 18 Lewo TUHAN mikan tut ade ningon kei kep yokti dima ba, wok na drek dip lewo gima kinei bibor. Mpaba Noni mihig ningon ei hukum di kes ei yok dip.
--29--
19 Ma asibut tut yo di isibut nya ba, angon kinei sut yok au. 20 Lewo ibon ide nijam di kei hi ei nidipti bu bi ba, igyok ingon mem nidipti mikui-kausi he.
--30--
21 Dimunggwom na e, ma attin tut TUHAN ba, abou cut bak nibou ndig. Ma aba na bikum yo di yaham imbuk kep yok au. 22 Yo dima micut kros lewo mun di buhun di Allah kin nibou ndig ibindei di cut igkep yok ne munhyet di nimien rin bi.
Nipingokti nya hi kin bu
23 Yo di ingon ki ipai,
<<Ma nikei mbus nite hi bihigom tirigi kes hukum ei tungwagom dip au. 24 Gino nikei kos tut bipia no di ningon mui ningon ngun ne yahagom misigion noni bipai kinei-kinau drek dip. 25 Noro nikei nya di ikes hukum ei no di ningon mui dip ingon nggei-hi-nggei ba, tungwatu nya ibou cut biyok.>>
26 No di ba ningon gom bibuhup bina hak ne asut di nijit hak ri.
27 Ma awak atnem ba, abon amunggwom bat nya au e, bibou anda jo kep niyai miai leu binhyepo abitug ndei mun di bahati tut na nipou ug e.
28 Ma ambrap gau hiter tug hon nide munhyet di angon kiowi eisi ba, aris mun ei noti cem au. 29 Ma apai <<Midibirop hanyen bak noni bit leu nok gi po noni bon bak dani nipou su pima au.>>
30 Ei mpe di gom ne dimbut kak puig dibikwam ug ei no di ningon mbum di mbris cem nide miaisi kin miai ba anggur nghousi. 31 Lene dingat lo, mpia dima wer ndia nggig nggwenti kin sinai nghousi ningkom ba, ngug tig di bikrop ttai cem lus bingwig leu su. 32 Dingig diyai kep bidikan-kan nyen tut leu api duum ningginausi dini. 33 Tug hon niiman buhunti kin nibong mbigomti kin nigwam bikrop nindati kin nigwam kep ninghuisi mbigomti mibindei ba, 34 ade mun di amati dem bi leu api nuhui mbumti micut igkep na dem kep nok nipos kep mun cig di ba minggwen bikak na.