22
1 Ninyeng di kei nibok kak bibor dor njiriek ndigban nindig bibor. Gino tungwatu nya ijoi sut na lene gima kei njiriek gi injei perak kin mas bak nani.2 No di nyeng kin no di nuhui mbum yahacem ima mun nyeng gom di bindei ba, inoyam. Gima ne TUHAN di pai tes yahacem ri.
3 Gino yo di ipmem bat nya imiep ingon tu nya itau kep mun di nahanok micut igkep yok ne imbres yonti leu noro bon yo di ingon mbum nya yoom yonti leu kan bi apino itug midut.
4 Tungwatu nya inggei sut yo di iba ibou coi mem yam bikuk yo bak TUHAN. Yo dima inyeng tut ndigban leu api ide njap ug ei ari bingwam mang bibor.
5 Gino ajoi sut acuon ayaisi lene ma ambres nanti leu ndep jui kin bon di jo sir yo di iris mun igkei nya imbutti.
6 Ma jipingok jimunggwom bat nya ingonti tut igyai munti di singat kei nya leu api yoni migyok ngon kep nipingokti dima ei mpe di yuug krau indig-ndausi.
7 No di nyeng tut ndigban ninyeng tak kep no di nuhui mbum. Gino hiter dahat ningwam leu nani ne anyeng tak kep noni.
8 No di ndim ningan di bindei ba, niris kep tungwatu nyati hei ei hiter ningonti mitug ndei mun di buhun di cut igkep noni lene gima bindei ba, nisindemti mem gima ndim ningan pima pror hak leu noni drek dip.
9 TUHAN njei ningat di kei bak no di ngondut hiter drek dip gi po kwas nide ningat di kei tut no di nimati dem bi pima.
10 Ma jijji no di ba nihyet bicig hiter leu jikieti apino nisrep huk yamti kin niba nitok biyamti kin nipai yam kineisi ntus.
11 Nibou ndig mijem nisut bit no di biyai hamem ningon gomti kin nihyet mmau keisi.
12 TUHAN nyohou yo di ipmem bat nya imiep ingon tu yahagom noro nggek tut niris kep mun cig nya ide ningon mangti.
13 No di mbris nok nimai ngak kep ig lewo kan <<Mindhe singa no lus-lus nyen ei nisai ma kwei ba, mittem sa ug ri.>>
14 Sop di nikrar jut nihyet di bihwen pinai ingonti dem kep bon. No di TUHAN gga no bibor misrei ei bon dimati bisrou noni.
15 Munggwom nya ibon kep mun ningon mbum de ngan-ngan bijo. Noro iba biap tindak bingginau yok bibijji igyai kepti leu yok.
16 No di ba noho rok ninyeng tut ndigban tug hon gi co kep nuhui mbum nya ba, njei munkwas bak yo di inyeng ne wer nikinei-kinau drek dip.
Nipingokti ningot ningai di tug hon ningon kiti
17 Amiap e, midingginau na tut yo di ingon ki nya ingginausi! Ma angig atingou mem ditde ningginausi nya. 18 Gino apwoi ditde ningginausi nya ei angonti ba, andat kep igbit lene angon kei. 19 Dijoi sut gino aba angon com TUHAN. Gima rino nogindini midingginau na tut nipingok nati nya. 20 Dipas kep yo di ingon ki nya ide nipingokti ningot ningai mem na. Bon nipingokti dini biyai angon ba, angon ki ba, antin kimbo cem, 21 lene bingginau na tut mun di nijit-jau hak. Gino yo di hiter ihig ser na tut lene bon abuhup ighyet igbit.
--1--
22 Ma ayem nuhui mbum nya imuhup tut gi iwer yok nikinei-kinau ba, asrep huk nuhwap mbum di imbrap gau yonti nya ighyet nghwak him tirigi igya ei nikei noho bei au. 23 Lewo TUHAN mimbrap gau yok tut ide munhyet bikus yo di isrep huk yok innei leu.
--2--
24 Ma jinggre kin no di gga igkei di ningon kui haninyai au. 25 Leu ma ayai bram niyaisi ba, bit bon akes hon nibon kepti dima hanyen kan bi.
--3--
26 Ma apreu ei mem tungwa hi tut gima aya hon nide ningwam di dahat ei su au. 27 Leu hi rima andei nigo ningwam dima bi lene niceu mipos ade mun di anyeng tut nya hagom bitut bilen di abongti cem leu na.
--4--
28 Harin dima ason-son nyen hanjop kwas yamti di adigup bat-adigai bat nya ipek tu jit-jau a.
--5--
29 Angat no di ba nijoi bibor biyai midyai ei ayai him tu e? Nibou ndig miba no dima biyai midyai ei nide ig. Noni minok awak mem no di bon ninyeng bi he bi sren.