11
1 TUHAN ningon mpo tut no di ba kilo nitrowai biris mun bak tungwatu nya. Noro ningon kwes kin no di ba kilo di igbit bitri ndiyok tut yok.2 No di kon nonti ninyeng mibindei ninyeng bikinei. No di yai mun mmuti ningon ki.
3 Nide ningon srenti bie tut no di ningon kwes kei. Niris kep mun cig nya misar drek dip ide niris mun ei tungwatu nyati.
4 Mpe dino aum nimai lene mun di anyeng tut nya mibon ninyeng mem na bi sren. Gino aba angon di gom biyai mun ne angwes ngun drek dip.
5 Ningon srenti dime kep no di ningon kwes kei nide puig niyaijoti bisur yam kei. Noro no di sibut ttei nonti ndam gi misar.
6 No di ningon sren ningwes ngun tug hon nibon mun di igbitti. Noro bit bon hi ba ningon com no di drui bou ngwak bi lewo gima yok noyam kin bon di noni biam.
7 Tirigi yo di isibut nya imai ne ide mun di igyok ingon mem nya cem mai bit yok.
8 TUHAN teu no di ningon kwes kei leu mun di buhun di cut igkep noni biningwes ngun. Mun di buhun kriau noni leu api ndei no di sibut.
9 No di sibut nimbrapti bindei sar tungwatu. No di ningon kwes kei ningon kiti bindei ba, tungwatu ingwes ngun.
10 Gino timiei minu ndig di ingon sren yuum mun di isuar nya nok gi dem ne ingon llei bibor. Yo dima imbos-hi-mbos ei mpe dino no di sibut mai su.
11 Ningat di kei di TUHAN njei bak yo di ingon sren nya bindei ba, ide minu ndig kei-kau. Yo di isibut nya ighyet di kinei bindei nggek ide minu ndig.
12 No di ningon mbum bindei hiter ninyeng kinei. No di ningon ki kimut nuhui bipai mun-mun hi bi.
13 Bit bon hi ba ningon com no di tri tut nihyet hou bidigek kep mpia kan bi. Noro dem mem aba angon com no di ningon gom lewo no dima mikimut nuhui tut munhyet.
14 Gino mben hi ibon nibou di bie tut yok bi ne isar drek dip. Gino nipingok kep ningonti cig nya imang yo rinaha ne limwa nya ibong kei igwam kei.
15 Gino apreu ei mem tungwa hi tut gima aya hon nide ningwam di dahat ei tu lene gima mibindei ba, mun di buhun micut igkep na. Ma aket ei mun dimati au leu binhyepo angon jo nyahan.
16 Tungwatu nya mikon sop di isingat kei nya inyeng. Noro suar ndigpoi nya icom yahanggwap leu binhyepo itug ndei ide mun di imati.
17 Ade ningondut tungwatu nyati bindei ba, angon kei bibor. Ade nimbuk tut yokti miyai niwei bak nanti anghuisi.
18 No di sibut mitug ndei nimuhup nitrowai. Gino abon mun di igbit ne amuhup di kei-kau mitau bina.
19 No di ta nibou ei niyai munti di igbit mitug ndei njap di jei bibor. No di mpig bou kep nibon munti di kinei ningat rima ndam nimai.
20 TUHAN ningon mpo tut no di ningon mbuk. Noro ngondut no di yai mun di igbit.
21 Ningat ne no di sibut mitug ndei hukum. Noro no di ningon sren miningwes ngun.
22 Sop di ningon mbum nide nuubbuti dem kep srak mas di jo na nihwap.
23 Tirigi no di ningon kwes kei nikos tutti nya pek kep ne ningat di kei ntun him. Tirigi no di sibut nikos tutti nya pek kep ne tungwatu nya igga drek dip.
24 Bihi ikwas ide mun di ima nya tut hiter apino ide ninyeng tut ndigbanti kum eisi. Bihi ikibut noro yuhui di mbum bibor kum eisi.
25 No di ningon mba mitug ndei nimati mang bibor hanyen bidor tunggwei bu. No di mpu hiter lene niyai munti dima bindei ba, impu noni cem drek dip niyaisi dima.
26 Tungwatu nya misigion no di nju gandum ngan bikui sur mpia bitri bi bibou nibok kui ug e a. Noro ikon no di sindui sut ba, ipek gandum ngan leu noni ninyenga.
27 Tungwatu nya mingon kei sut no di ta nibou ei niyai munti di kei nya. Noro mun di buhun bibor micut igkep no di tindei ser nituti mem niyai munti di kinei.
28 No di ba ningon com mun di nyeng tut nya micut nok biei nimeng nimui di dimbos. Noro no di ningon sren mibong kei migwam kei noyam kin biei meng di nnum kei.
29 No di yok nisinsiou ei nide ig bei nsi nyati ne mun di nyeng tut nya mipror leu noni. No di ningon mbum miyai midyai kigkep mem no di ningon ki.
30 TUHAN cuon no di ningon kwes kei niyaisi. No di ningon ki bindei ba, nindigsi nya induk yam bibit bong.
31 Yo di ingon kwes kei mitug ndei ibuhup biyokti hanyen ei dihyeisi dini. Gima rino ma akan kep bipia no di sibut kin no di bon sisar mitug ndei hukum.