Nipingokti hi kin bu
6
1 Dimunggwom na e, apreu ei mem tungwa hi tut gima aya hon nide ningwam di dahat ei tu e? 2 He ahyet srou nanti ba, ade nipreu eisi nya kri kep nanti cem e? 3 Dimunggwom na e, gi nok lene acut ei no dima ninda nsi ba, ninyeng tak kep na tu. Handei kon ba, dindo puig mem gima angwes ngun leu ninda nsi. Abipbur ba, aug ngat no dima lene abidip huk noni leu binhyepo kwek na leu ade nipreu eisi. 4 Ma abong ba, agwam kep anghuisi mbigom cem au e bibou, 5 akwek nanti leu bansi dima dem kep nok ha kin rusa di kwek nonti biningwes ngun leu no di huk no mem gima prindei no ug e.Ayat di sok kep yo di ibong biei nda dip
6 Suar yo di ibong biei nda dip nya ingig igyai kep ako nya igyai munti nya bipwoi nisinati ei ingonti. 7 Lewo ako nya ibon ide minir kin ide nibou ndig kin no di nyohou yok bi. 8 Noro inju njita ei ide dihyei jou mem nijam di njita ngat ningat nindig bibor bitin ei mem nijam di ninggum mihwen yok. 9 No di bong biei nda dip mibong mem nijam pig bu i? Ug ei mpe di tou leu api noni mikiju hanyen i? 10 No dima gwam juug biba ninda ngot yam bigwam kep ninghuisi mbigom he lene kan <<Nna ba sibong mbigom ug e lewo siyai nggrop buhun.>> 11 Noro tirigi noni bong mai kep ninghuisi lene jei bi mun di bindei ba, nuhui mbum micut igkep noni dem kep nok nipos kep mun cig ba minggwen bihwen noni.
12 Yo di isibut kin yo di ingkek ndok iris mun ei tirima-tirima ba, 13 ikek igyai cem iba inda ngon mun biyam mem gima ibiris mun cem, 14 ibou ngwakti di mpiei mpung tut nitin ei ningon kanti di kinei di bindei ba, niba nitok biyamti jo bidem ug. 15 Gima yok hagom mibindei ba, mun di buhun cut igkep yok kros bitug midut.
16 Mun nyeng muhwindacan dini bindei ba, TUHAN ningon sibui gima rino Noni miba niyai ngat gima kan bi. 17 Ningon jei kin nuhui di buwei sut nihyet di igbit bi kin ninda di kimukep yo di ingon ngun nya, 18 kin ningon di kos dat mun di mbuk bibor kin nimig di dia tut gima bipbur ndam mun di kinei, 19 kin no di ris-ris nyen nihyet tut mun di noni ngat bou niyai him kin no di bindei ba, niba nitok biyamti kieng kep yo di ingon kwes kin yam.
Nisok kepti tut sop-pinai wak cam nya di icut tut yam
20 Dimunggwom na e, ma apwoi acig ningon lene ma abbwe ser apmem nipingok nati nya au. 21 Ma ayok ngon kep ighyet ba, apwoi ninghig-niker ei angonti. 22 Ide ningginausi nya mibie tut na kak ambutti nya binyohou na tirigi abong mai bindo puig di kei bina mpe dino ayai ngkiem. 23 Acig-apmem nya ide ningginausi nya dem kep ninjeng di piga digai puig di kei mem nani ba, ide nisok kepti nya mindo puig niyaijoti di kei bibor bina. 24 Ningginausi dima mibindei om na ei minu ting leu sop di ikrar jut nya kin hiter nitnem nihyet di bihwen-hwen nyen angona. 25 Ma asindui sut ide nuubbuti ba, biyai angon di pri kep yok au. Ma asindui sut ide nikek niyaisi ba, brim angon au. 26 Bon tungwagom yai mitiei di nibok dem njita den gom bak sop di krar igkei leu api yem njita tut noni lene dem. Noro nicut tut hiter nitnem ne mibindei ba, suar ba nonti niyaisi bigo.
27 Bon tungwa hi nggriou hum kin ningget lo, hum tigut no bi e? 28 Bon tungwa hi co-co nyen kep hum mbom lo, hum tigut nimig bi e? 29 Nok gima cem bit bon no di yem njita tut hiter nitnem ningwes ngun leu hukum kan bi. 30 Gino no di nggum nggimang njita drek dip ninggumti lene tungwatu nya ighyet kinei sut noni bi e? 31 Lene gino ikat noni ne suar noni birop hanyen tut njita di nggimang dima mbimuhwindacan bram yam. Apino niyai munti dima mipinde ndigban di nyeng tut nya hagom leu noni. 32 Noro notou mem no di yem njita tut hiter nitnem i? No dima bibon nonti ninyeng kinei! Ningon mbum bibor! 33 Tungwatu nya mihwen bit noni ba, ighyet miwer mpiahi tut cem leu api ninyeng kinei bijo ninno bijo kikau. 34 Lewo tug hon niyai munti di kinei dima ne sop dima nijjep ningon sibui ba, ningon kui kep gima hwen noni cem. Tirigi noni ba nigga biborti bibuhup hanyen lene gikan tut ningondutti bi sren. 35 Bit bon hi ba mitiei bihwen ningon bicut kan bi. Mun di kei mang bibor di njei bak midem mem gima bicut nide nigga biborti dima kan bi.