Ningat di kei di tug hon ningon kiti
4
1 Dimunggwom bat jen, ma jingig jitingou mem jicig nipingok jeti bijiyok ngon kep leu api mijitug ndei ningon kiti. 2 Ditde ningginausi dini ne kei bibor mem je ri. Gima rino ma jisindui sut bijo ei au. 3 Tirigi po dimien yo di dinok munggwom di nimig gom ngat bak dicig lene, 4 dicig ngginau da bipai <<Ayok ngon kep ditde nipingok nati nya lene ma abbwe ser au. Abindei mbut ditde nipingok nati nya leu binhyepo ade niyaijoti mpung tut ningon nggei-hi-nggeisi. 5 Ata abou ei ningon kiti kin nintin kimboti cem! Ayok ngon kep ditde nipingok nati nya lene ma acom dihyet ei au. 6 Abibon ningon kiti nok mun di bon ninyeng leu api abinyohou nanti. Angon ngakei ningon kiti leu api abiya srak ko hagau nanti ba, abong kei agwam kei.>> 7 Mun di bon ninyeng di suar ayai nimbie him ngat rino abrim angkek leu binhyepo atug ndei ningon kiti kin ningon di huk nititi di bon ninyeng dor njiriek mun di ahuk bram nindigsi nya hagom. 8 Akon ningon kiti nok nomor gom ei angonti leu api ma gima hak anyeng di jei ei nati. Ma anggriou ningon kiti kin na leu api abitug ndei anyeng di jei cem. 9 Ningon kiti dima miyai mitou nikomti gom di kei bibor kei binani binok ade topi nibou ndig ba, abijuk abou a.10 Dimunggwom na e, ma amiap kep dihyet! Ma angig atingou mem ditde nipingok nati mungkun kei leu api ade njap jei ei dihyeisi dini. 11 Dingginau na tut ningon kiti bidindo nisinati tut niyaijoti di igbit cem bina tu. 12 Gino ayai nok gima ne mun nyeng hi mibigen ser ade puig tirigi abindei mbut ayai munti nya bisrou amig mpe di ador kak puig cem bi. 13 Ma ayok ngon kep ningginausi di ayai leu da tu nya kikau. Anyohou ya ser ningginausi dima mungkun. Lewo ningat di kei mintun him ayaijoti tug hon ningginausi dima. 14 Ma ayai bram yo di isibut nya igyai munti nya kin igyaijoti nya cem au. 15 Ma akak puig di yo dima ikak au. Noro ma aom nanti minu ting leu yok ba, amig jo kep nimbut kikau! 16 Bon yo di isibut ibong mai kan bi bibou ibon mun di kinei nipou ug e. Ba, igyai nggrop buhun bi bibou ibindei ba, mun di buhun cut igkep nindigsi nya nipou ug e. 17 Nibon kep mun di kineisi kin nisibutti ne njita di igyem kep inggumti kin gungei di idut kep inggobiausi ri.
18 Puig di yo di ikei nya imbut kak dem kep nok mpia njap di sindi pri ba, nipigati piga kikau binindig kep. 19 Noro puig di yo di isibut nya imbut kak dindi bidem kep mmun mau di dindi-kai ba, indrat mpia bicut lo, igikan tut mun di indrat bi.
20 Dimunggwom na e, ma angig atingou mem dihyet! Lene ma ayok ngon kep ditde nipingokti nya. 21 Ma acom dihyet ei au. Noro ma apwoi dihyet ei angonti. 22 Yo di ingon huk dihyetti mitug ndei niyaijoti kin ninghuisi kwesti. 23 Ma anyohou ya ser angonti lewo angonti rino bindo tut puig di ayaijoti mbut kak. 24 Ma andat kep mun di igbit bi au. Aom nanti minu ting leu nindat kep mun di igbit bi kin nihyet di bindei srawir tungwatu cem. 25 Ma aimaisi bindo tut ade ningon sren keisi. Ma abon munti midem kep nok mo di ba nijou bisu tig behei au. 26 Tirigi abon mun nyeng hi bigyo lene ma abon munti nok no di mbrap nihyet di kei ba, bitak kep ningon di sibui ei ningonti au. Gi nok lene ningat mintun him midyai di abrim angkek tut nya hagom. 27 Ma aom nanti ei minu ting leu mun di kinei lene aba angon di sren bimbut llu ug bipek nipekti. Ma akriek leu puig di nijit jit-jau au.