33
1 Ayub e, nogindini ma ayok atingou mem dihyet di dipai dini mungkun kei.2 Ditin ei mem gima ditri tut dikan-kan nyenti bina tu.
3 Diba dingon gom bimbrap ba, mun di dipai ne mun di nijit ri.
4 Allah de Ninnei pai tes da ba, No Di Sindem Bibor hi ninnei ei dihwap nsi.
5 Ba, gino abuhup bida kan lene ma ambrap gau nanti.
6 Sahacem sinoyam ei Allah niyai him. Noni ba igtuyap bibon jau sa.
7 Gima rino ma adigit tut da au. Ditin ei dingon kanti mem gima dihwen bit na bi.
8 Dimiap kep mun di apai dat nya bidingon dorti tut angon kanti cem.
9 Apai <Dingonti pwoi ba, dibon nitunggweisi cem hi bi. Mun di kinei rap da bidibon mun tunggwei cem bi.
10 Noro Allah pai mun mem bisu tindei mem gima hwen bit da. Noni ba No biyai da nok Nide siceu.
11 Noni ba lante biteu dimig lene nyohou tou kep diyai munti nya hagom.>
12 Ayub e, angon kanti dima tunggwei bibor. Lewo Allah nindig njiriek tungwatu leu gi simbot kep mun nyeng hi bit tungwatu nya.
13 Nggon rino apai kep Allah bipia Noni gimiap tungwatu nya ighyet di ilua kwop bi i?
14 Mbro nok gino Allah mbrap mbigom mbican lo, tungwa hi gingig nitingou mem nihyet bi.
15 Noni mbrap tug hon mumpriem kin ningat-hi-ngat mem mmun tirigi tungwatu nya ibong mai leu.
16 Noni bidip huk yok leu binhyepo ingig itingou mem nihyet apino idrui sut bikiju.
17 Ningon kanti pingok ingonti nok leu binhyepo ikes hon sisar leu ba, ibon bu bi. Nipingok yokti nya bindei ba, inggei-nggwang tut yonti bi.
18 Noni gisindui sut ba, hi bindei sar yok bi. Noni cuon igyaisi leu nimai a.
19 Allah ba ninggwenti di hwen ingut bipingok ingonti leu api inghuisi titut yam wei-wau sut.
20 No di nggwen ninsi kou njita lene ningon him wei sut njita di mmau kei cem.
21 Nitta cut leu api krin ba, ninggang bai bikinei-kinau cem.
22 Mbigom ma ninnei ngkwei hanyen ug ei mpia di yahagom innei idem yam eisi ba, minu nimai nya ide son dideu no tu.
23 Mpaba malaikati di srig Allah de malaikati ibou sribu-ributi di pus kiek tungwatu ingonti tut ide midyai gom mikwei mpu noni.
24 Malaikati dima mingondut noni bimbrua ser <Akwek noni hak ug! Disindui sut ba, noni juk ug ei minu nimai nya ide bi. Mitiei nibikwek noni rini leu binhyepo niyati kwes hanyen bu.>
25 Ningut miyai nisindemti bu lene mimbri kui ningkek hanyen ba, ningkek sibui nok munggwom pilei ningkek hanyen.
26 Mpe di noni ngat nadi lene Allah buhup nide nadi. Leu api no dima miba ningon llei binggei sut Allah ninyeng lewo Allah cuon niyaisi ser nhyema mai au.
27 No dima mipai ei yo di yahagom yoho bei <Dikan bigya gi kinei ne gi kei rin apino ditde sisar nindig. Mbro nok gima lo, Allah kes hukum ei da dip bi.>
28 Allah cuon dinnei leu ba, duug ei minu nimai nya ide bi. Diyaisi no jo yo dini.
29 Allah ngkwei-ngkwei nyen him niyai munti dima,
30 leu binhyepo teu tungwatu biyai niyaijo nijep biyok lene biyai nibong kei nigwam kei biyok mem nijam di igyaijo.
31 Gima rino Ayub e, angig atingou mem dihyet ba, agwam nyahan lewo tini bu ne dani rino dimbrap a.
32 Ne gino atin ei angon kanti ne apai sut hak ug. Gino angon kwes lene ahyet dima bindo bipia angon ngun.
33 Gi bi ne ma agwam nyahan hak ba, angig atingou mem dihyet leu binhyepo dingginau na tut ningon di ki.