NIMBRAP BIT YAM GI NININGAI
22:1--27:23
Elifas kon nihyet tut Ayub bipia bon mun di kinei bibor
22
1-2 Leu api Elifas pai <<Allah suar tungwatu di mpu Noni e? E bi! Tungwa tou rino srig tungwatu nya ikieti bitut no di ningon ki cem bon ninyeng mem nonti njem he i?3 Apo abon mun igbit Allah ningon kanti bon ninyeng mem Allah e? Apo ayai munti di kei-kau nya mpu Allah e?
4 Allah sok kep na bikes hukum ei nani dip drek dip ade nikuk na bak Noti e? E bi!
5 Noro drek dip ade sisar di mang bibor kin ayai munti di kinei bibor.
6 Gino ade adig-ajoi hi rop nide ningwam bi lene apos nide sinsun nya hagom leu noni drek dip ba,
7 agiyai minyei bak yo di inggobiau bidut bi. Agicigit yo di inggum kui ig bigyem njita bit na cem bi.
8 Aba ade ninyeng jeisi kin ade nisindemti bipos dihyei titut yam leu binhyepo anyeng tak kep hagom.
9 Agingondut kibom nya bi ba, aco kep moibihi nya cem.
10 Gima rino nogindini bon nya krop ttai na tu lene ningon digitti cut igkep na kros biyai angon di digit bibor.
11 Angat mpia bi lewo nidinditi com niti bikum eisi. Minyei di su nindig bibor hwen na bitak na tu.
12 Apo Allah gwam ei gwamti anai ba, tou kep nimo jug bingat ham mpia-bbed him ei gimu bi e?
13 Mbro nok gima lo, ahig ser <<Noni kan mindei i? Noni ningat rin ei bumbuhui ninghim ma kwei ba, bit bon Noni gimbus nyeni ingonti kan bi.>>
14 Akan bipia Allah mian kwei lo, bumbuhui nggai ser niyai bingat mpia bi ba, mpe dino Noni ya nyen ei niban di bikwas gwamti kin dihyeisi dini leu yam dip he e.m
15 Abungwam ba, ambut kak puig di yo di isibut nya ikak ninno tu e?
16 Yoni imai urung nipou tirigi njap dem mem gima imai bigyo. Lene minyei su bihwen yok.
17 Yo dima rino ibrim ingkek di irok No Di Sindem Bibor ba, ikan bigya bit bon Noni bon mun-mun hi tut yoni kan bi.
18 Lo, ningat ne Allah rino hak ninyeng tut ndigban ei yokti a! Dingon dorti tut yo di isibut dima yok ikan-kan nyenti bi!
19 Tirigi no di singat ngat hukum di cut igkep yo di isibut nya ne ba ningon di nggei-hi-nggei bipa tut yok.
20 Mun di yo di isibut inyeng tut nya hagom sar bingwig. Lene hum yem ndigban niken-ken di jo nya cem bitimek bingwig.
21 Ayub e, ma abindei ba, angon kwes kin Allah leu binhyepo abong kei agwam kei. Gino abon nok gima lene Noni minjei mun di kei bak nani.
22 Ace tut Allah de ningginau nati nya ba, apwoi gima yok hagom ei angonti.
23 Aba abou coi mem TUHAN leu api angkwei hanyen ndam Noni. Abikes hon mun di kinei di jo ade ig.
24 Acom ade mas di pimbai kei nya leu na. Anjei mas dima ug ei mbang nijou di minyei biam eisi bi.
25 Ma asindui sut Allah Di Sindem Bibor binok ade mas kin ade perak di pimbai kei di bon ninyeng mem na.
26 Leu api aba angon com Allah kikau ba, abikan tut bipia Noni ne nibousi mem ade ningon lleisi ri.
27 Gino angat nadi bak lene Noni mibuhup ade nadi hanyen. Lene dem mem gima ayai mun bipek kep ade nipreu ei mem TUHANti nya.
28 Ningat mang bibor mintun him ade midyai di abrim angkek tut nya kikau ba, nipigati mipiga digai ambutti nya hagom.
29 TUHAN cut yo di ikon yonti inyeng noro teu yo di iba ibou coi mem yam bingwes ngun.
30 Noni miteu nani ba, angwes ngun gino abit ningon kanti ba, ambres nanti leu mun di kinei cem.>>