Zofar pingok Ayub ningonti hanyen
20
1-2 Leu api Zofar buhup <<Ayub e, dingon buhun drek dip ahyet ba, bit bon doom dingonti bidikimut duhui kan bi.3 Ahyet dima tigut da noro dikan tut notou mem gima dibuhup hanyen binati.
4 Jo nibreisi mem na bipia habiei ei nimbie him ngat tirigi Allah sindi kes tungwatu ei dihyeisi dini ne,
5 no di sibut ningon nggei-hi-nggeisi jo jei bi. No di miap nihyet bi cem ningon keisi jo jei bi noro dem kep niyai mpau di bingmai he.
6 Mbro nok gino no di sibut ninyeng jeisi kui sur mpia-bbed him ba, nibou nggram him ngget bumbuhui lo,
7 noni misar leu dihyeisi dini dem kep dihyei ndung di bit hou. Nisut bat nya mihig ser yam <<Mei! No dima ug ei hantou i?>>
8 Noni mipror dem kep nok nimumpriem ningwes he bipren hanyen noyam kin ningat-hi-ngat di ingat mem mmun.
9 Yoni mingat noni bou igyai him ba, nide ig bei nsi nya miba igyai hwen kep noni bu bi.
10 Lene suar nimunggwom bat nya ingkwei mun di noni pos leu yo di yuhui mbum nya hanyen biyok.
11 Mbro nok gino noni pilei yo ba, mimbri kui ningkek lo, jei bi lene noni minok dihyei ndung hanyen.
12 Mbenjen! Mun di kinei nyop kei ei nuhui ba, kum nyahan ei nidwep behei.
13 Gi pinde haninyai bi leu binhyepo ngat ningwes eisi binyohou pinde nyahan.
14 Noro njita dima nggek bimpo-mpam bipijuk ninghopti noyam kin krisieu di biyai nimai drek dip.
15 No di sibut njim tut ndigban ninggimang di pinde tu hanyen. Allah bindei hei hagom leu ninghopti.
16 Noni dut krisieu nibinduk mun di buhun kep nonti bimai drek dip dem kep nok gino wou piet ham noni.
17 Noni gingat ningwes ei mini zaitun ningei di mpung bipias hagau ba, gingat ningwes ei sapi do ngei kin ahwei lon ningei di kiber nok minyei di su cem bi sren.
18 Suar noni ngkwei nibittemti di tug ndei nya hagom hanyen. Noni gingat ningwes ei ndigban di noni tug ndei leu nide nitri-nibipek ndiyokti cem bi sren.
19 Lewo noni co kep yo di inyeng tut mun nyeng hi bi nya ba, ningkek ndok tut yok bipos yo di hiter ide ig nya cem leu yok.
20 Noni nidrui bou ngwakti dor tunggwei lene gima bindei ba, ningon gicut hon nide mun di ma nya bi.
21 Gino yem njita lene duhwen hagom bingwig hak. Jei bi lene nibong kei nigwam keisi mingwig hon nohonti.
22 Tirigi ndigban di nyeng tut dima kui sur mpia ug bipek nibou nggram him lene ningon kku no bibor tutti mibindei timek nonti.
23 Tirigi nibou sibui sut giba njita boom ninghop lene Allah migga noni bikes hukum ei noni dip.
24 Gino nang biku no leu singau simeda ngkimom nitu lene tibor nggwen di iba ngkimom-tembaga bibon mibindei bok noni.
25 Tibor ndei noni apino bok-ba. Tibor ninggwenti di njeng kei tibim ningutti bikus nite hi. Gima rino ningon digitti nok bon di kat noni.
26 Mun di nyeng tut nya hagom sar leu api hum di tungwatu indig bi yem nonti bitut nide ig bei nsi nya yahagom.
27 Mpia-bbed him ndo nide nisibut biborti ei nibreisi lene dihyeisi kiju bipai kep noni.
28 Allah nigga biborti di kui mpia tut noni mibindei sar mun di nyeng tut nya hagom.
29 Gima ne mun di micut igkep yo di isibut nya ba, mun di Allah tin ei mem yoni ri.>>