Bildad pingok Ayub ningonti
8
1-2 Leu api Bildad buhup Ayub nihyet bipai <<Apig bu api akes ahyet tut gi ambrap nok gima i? Ambrapti dima yok dem kep hou di bong biei mengti di nibimbi bong he.3 Allah ba ningon can bikes hukum ei tungwatu dip bi sren. Noni tunggwei sut gi bon mun di igbit bi sren.
4 Mpaba amunggwom bat nya pima ibon sisar tut Allah apino bitig dino Noni kes hukum ei yok dip ug a.
5 Noro tini bu ne ma anang coi ninda behei ba, ahara Noni leu binhyepo ngondut na ba, ajem ampon bak.
6 Gino angon sren ba, nitunggweisi hi joti bi lene Allah mibipbur bikwei mpu na. Noni mingkwei ade ig bei nsi nya bina bijo nijoti hanyen.
7 Mun di anyeng tut di sar tu pima bon ninyeng bi gino ibinai kin mun di mporo Allah miyai bina ei nidipti bu.
8 Ma ayok ngon kep yo di ingon ki di nipou nya ba, akan-kan nyen tut ningat di ntun adigup bat-adigai bat nya him tirigi po ipigot bram mun di igyok igyai kep nya.
9 Nyeni igyaijo mem nijam di jei ba, ingon ki tut mun nyeng hi cem bi. Igyaijoti noyam kin bumbuhui di tap di jo mbigom leu api pren hanyen.
10 Noro ma amiap kep ndigpoi di ingon ki nya ighyet di ipai kep nipou nya. Ide ningginausi pai bina,
11 <Lipig hei ei minyei igkropti he. Hib hei ei mpia di bon dihyei igkropti he.
12 Gino minyei igkropti dima pingge leu lene lipig dima nimeng mbris bimui haninyai dor njiriek mintu-minta nindigsi. Ba, mui urung tirigi nimeng ngun yo ba, dem mem gima itot bibibon mun hi bigyo.
13 Yo di isibut nya inoyam kin lipig di mui hanyen pima. Tirigi ibbwe ser Allah lene ide niba ningon comti pror sindam.
14 Yo dima iba ingon com mong mbrei di nggriu-nggrop kei gom ngat ba, gima noyam kin anggungga.
15 Gino ibram kui anggungga lene ngkiem tut yok e? Gino isu inda bikrau mong mbrei gom ngat lene dem mem gima bahati tut yok e?>
16 Nisibut Tut Yok Cig nya idem kep nok mintu-minta di mpia com ndei lene hei ba, nimeng nggrou leu api ninggrupti dwim bidem miaisi dima hagom.
17 Ide nigau nya krau kep tig di jo dihyeiti bingkiem ba, tti kan bi.
18 Mbro nok gima lo, gino ahom mintu-minta dima leu mpia di nikrau tigsi dima lene gima tereu nok gi po hei ei mpia dima bi sren.
19 Igbit ri! Yo di isibut nya ingon lleisi nok gima he. Isar leu api hiter kwei ya luei yohoti hanyen bu.
20 Noro Allah gikes yo di ingon gom ei bi sren. Noni gimpu yo di ibon mun di kinei bibor bi sren.
21 Noni mibindei ahui tiei ba, apa-pa nyen. Noni mibindei ba, ambos-hi-mbos hanyen cem.
22 Lene Noni mibindei ba, yo di ingon koi kep nani mimmai sut yonti bicut hak. Noni minggek ig di yo di isibut nya ide bitimek bingwig hak.>>