Ayub buhup Elifas nihyet
6
1-2 Leu api Ayub buhup <<Minok gino ibakilo dingon nggukti nibuhunti,3 ne nibuhunti midor tunggwei iggum muk ndigsi nibuhunti nya. Gima rino gino dinyohou yai sut dimbrapti nya bi bidingon sror lo, ma jinga leu tut au.
4 Allah Di Sindem Bibor de tibor tibim dingutti. Mun di nok krisieu silipti tibor dima ninggwenti bipijuk dinghuisi titut yam. Allah nicut igkep dati biyai dingon ttin bibor noyam kin siceu di ittei yam mem gima ikon pran bit da.
5 Keledai ningon cut hon niyem kep mintu-minta di nggriu. Nok gima tut sapi cem tirigi niceu ba njita di dem mem niyemti bihyen kep.
6 Noro tou rikimam njita di nyop bi i? Tou riyem guli dunggwei nisuai ngun i?
7 Dingon yem njita di nok gima bi lewo bindei ba, dingon him muwei sut.
8 Nggon rino Allah ba ninghim bak ditde nadi i? Nggon rino Noni ngig nitingou mem dahara Noti bi i?
9 Dikan bipia nna ba Allah co kep da bidinem-nnai ug. Nnaba yai nibou tut da biyai nimai bida ug!
10 Niyai munti dima migwam ser dingon apino midiba dingon di llei bipri-pri nyen drek dip dinghuisi di wei. Dibit Allah Di Kwes-Kwau nicukti nya ba, ditimbe tut bi sren.
11 Dani dingat rin tug hon nisindemti mindei i? Diba dingon com mindei di bindei dino diyaijo jei bu i?
12 Dinghuisi sindem ba, noyam kin bor ngug e? He dingut noyam kin mun di iba ngkimom-tembaga bibon e?
13 Dinggok tungwatu dima mpu da lo, dindei bi. No di miteu da bidingwes ngun hi bi.
14 Mbro nok gino diba dinghim bak Allah Di Sindem Bibor tu e, he bigyo e lo, disuar disut ningat dima mpu da tirigi ninghuisi wei dini hwen da.
15 Noro disut bat jen, bit bon diba dingon com je ba, dibram kui je kan bi. Lewo jinoyam kin mbang tirimpoi di pingge drek dip biget di but bi pimo.
16 Jinoyam kin minyei di ningei jo nyahan bikingkrai yam cem drek dip es di cut bikieng kep ningeisi ba, kingkrai yam,
17 noro mpe di nijam di biang ngei cut lene es ninggop kin es di kieng kep minyei ngwa dip jet nyahan hak leu ba, hi gingat gima bu bi. Minyei pmot pingge kikau ug ei nijou ba, noyam kin nggileng dip.
18 Nimpung di ibri unta nya di ittei yam ug ei iggum ndigsi inggok minyei mem idut kep inggobiausi lo, israwir drek dip ba, ihwou-hwou wai apino ibimai ei iggum ndigsi dima.
19 Nimpung di ibri unta nya kwei leu minu Syeba kin Tema inggok minyei dima ba, ingon ya mem gima idut kep inggobiausi,
20 igyok ingon mem minyei noro ide niyok ningon memti dima pren hanyen tirigi ikwei krau mbang tirimpoi di nok nggileng dip hak.
21 Disut na e, mbang tirimpoi dima bindo tut nani ri. Angat ninghuisi wei di cut igkep da ba, adigit tut drek dip leu api aom na leu da.
22-23 Nggon rino ayai nok i? Apo dahara na leu binhyepo akwas mun nyeng hi tut da e, he angot kep tungwa hi mem gima mpu da e, he angkiem ser diyaisi ba, ateu da leu ditde nitok di ngondut tungwatu bi ninda nsi e?
24 Handei kon ba, apingok dingonti lene abindo ditunggweisi bida hak ug! Midigwam nyahan bidimiap kep mun di ambot kep tut bida nya hagom.
25 Nipingokti di sren kei bindei ba, tungwatu nya ingon huk niti noro ahyet nok bu tan bibon ninyeng bi!
26 Akan bipia dimbrapti pima ne hou di dimiep atingou he ri. Gi nok lene nggon rino abuhup dihyet di diba dingon di cut leu pima bipai bina i?
27 Gima he bi noro ako ba, abinggok tut mun di mipek kep mem munggwom moibihi. Noro aris mun leu asut ningat leu binhyepo abindei ba, anyeng bibor!
28 Angig ayai kep da. Midiris mun bina bi sren.
29 Akes hon hak ug! Ma aba angon di sren bibon da! Ningat ne dibon mun tunggwei sut hi bi. Gima rino ma apai kep da au.
30 He ma angon kan bipia diris mun e, he bit bon dimig mbus gikei kin gikinei kan bi e?