Nehemia ug ei minu ndig Yerusalem
2
1 Bed nitindur bitai ser tu lo, tirigi Nibou Ndig Artahsasta yem njita ne diba diimaisi mmou buhug ba anggur ningei ei mokti bak. Hon kep njap dima nimo jug noni ngat diimaisi di hai nok gima bou niyai him bi sren. 2 Gima rino noni hig ser da <<Aimaisi hai tut nggon i? Jo nibreisi bipia anggwen bi. Gima rino dikan huk bipia angon buhun.>>Didigit tut nihyet, 3 bidibuhup <<Na di Andigpoi e, ma ayaijo ninno! Bit bon diku diimaisi di hai bijo nding leu na di Andigpoi ayai him kan bi. Dingon buhun tut ditimieisi po itig didigup bat-didigai bat nya eisi pima lewo minu dima lus bingwig ug ei dihyeisi ba, hum yem dimbou pmem nya hagom tu.>>
4 Lene nibou ndig hig ser da <<Gi nok lene asuar mindei ngan i?>>
Dingat nadi kros bak Allah ei gwamti, 5 bidibuhup nibou ndig <<Gino na di Andigpoi ajoi sut ade awak ba, ace tut dihyet dini lene ma asindui sut ba, dingkwei hanyen ug ei hanjop Yehuda ndam minu ndig gom di itig didigup bat-didigai bat nya eisi leu binhyepo diwin minu ndig dima hanyen.>>
6 Lene nibou ndig ce dihyet. Nitnem cem gwam kui meja bit noni lo, hig ser da tut nijam di dimbut nijeisi kin tto bou mem dingkwei hanyenti leu api dibuhup igbit bak.
7 Lene dahara noni tut srat nisindem mem gima dindo bak nibou di inyeng tak kep hanjop Efrat-Bei-Mpia-Nikimbastic nya di mibindei ba, isindui sut bidimbut kikau ug ei hanjop Yehuda. 8 Dahara noni tut srat nisindem gom kin bu mem gima dindo bak Asaf di ya ser baham nitindurti ei hanjop nsi dima. Lewo disuar no dima mpu da bisra cou kin biei ner mem dibikinding dimbou heisi nya ei yo di igya ser TUHAN De Ig nya ide ig kin dimbou pmem ei ngug tig di bikrop ttai minu ndig Yerusalem ba, dibingot ditde ig gom di dibong ser cem. Apino nibou ndig ce tut mun di dahara noni tut hagom lewo Allah hati tut da.
9 Lene nibou ndig cuk nibou pran ibou poi kin tentara di ibri kuda igkei nya nimpung gom ba, yehei sut da tirigi duug ei Efrat-Bei-Mpia-Nikimbasti. Tirigi dikwei krau tu lene disu srat nisindem nya bak nibou hanjop dima yok. 10 Mpe dima lene Sanbalat leu minu ndig Bet-Horon kin Tobia di nok nibou gom ei minu Amon imiap dinghapti tut gi dikwei cem kep mben Israel di ikinding itimieisi hanyen lene yahacem ingon mpo tut da.
11 Noro duug kikau ug ei minu ndig Yerusalem bidigwam nyahan ei sirima mem njap ningai. 12 Dimbot kep tut Allah nipingok dingonti tut gi po dikos tut bipia dikinding minu ndig Yerusalem hanyen pima bi. Lene dikiju mem mmun mau bidehei sut disut bat nya ibou poi ug ei nisai lo, dijem keledai ningut gom ngat leu binhyepo dibri bidigwam dip. 13 Mmun mau rino dehei kak Dimbou Pmem Mbang Briep bei mpia nikimbasti bidimbut ei nite bei mpia nibiho kikau bidinjiriek Minyei Bousi Naga kikau ug ei Dimbou Pmem Mumpiang. Lene diyok diyai kep ngug tig dima kin dimbou pmem nya kak dimbutti bidingat lo, hum yem hagom bingwig su. 14 Lene dimbut sir ngug tig nikiou ei nite bei mpia nipriti njiriek Dimbou Pmem Minyei Bousi kikau ug ei Urwer Nibou Ndig. Noro bit bon keledai di digwam dip kak puig kan bi lewo ngug tig di nggek tu nya jo sinsiou ser. 15 Gima rino dikriau ug ei Mbang Briep Kidron bidiyok diyai kep ngug tig ei sirima kak dimbutti. Gima ngwig lene dingkwei hon tirigima bidikak puig pima hanyen leu api dicoi ug ei minu ndig kak Dimbou Pmem Mbang Briep.
16 Mpe dima lene nibou nya di inyeng tak kep minu ndig Yerusalem hi kan tut dimbutti kin dingon kanti pima bi. Hon kep njap dima ne dimbot kep tut bak disut bat limwa Yahudi nya kin imam nya kin yo di inyeng jei nya kin nibou minu ndig nya yahagom di miba yok bikum da tut midyai dima bi. 17 Noro nogindini dimbot kep tut biyok <<Ide minu dini kinei bibor ba, ngug tig cem lus bingwig su. Mun di buhun cut igkep nye tu! Jikwei ba, ikinding ngug tig di bikrop ttai ide minu ndig leu binhyepo immai sut itimieisi dini bu bi.>> 18 Lene dipui sut notou Allah mpu da kin nibou ndig minu Persia nicuk dati cem biyok.
Yahagom ibuhup <<Igbit ri! Handei kon ba, ikinyon ei midyai dimati hak ug! Gima rino yahagom itin ei mem ikinyon eisi.>>
19 Noro Sanbalat kin Tobia kin Gesyem di mben Arab gom imiap nyeni ninghapti tut ningon kanti dima lene yahagom ipa ndip nye bipai <<Ma jibon ndei notou i? Mijaham jimbuk kep nibou ndig minu Persia e?>>
20 Dibuhup <<Allah di ninyeng jei ei gwamti mibindei ba, nyende midyai dini mimbut sindem. Ninok Nide awak nya ba, mbigom nikinyon eisi ug ri. Noro jeni rino jiyai srat nisindem ba, jinyeng tut hanjop nsi hi ei minu dini bi. Ba, daptar di ipas kep timiei minu ndig Yerusalem nya inyeng eisi tibim tut jinyeng bi sren.>>