SRAT EZRA
1. Mben Yahudi di isima ei ingkiaisi ei minu Babel nimpung gi nigom ingkwei hanyen kwei ei minu ndig Yerusalem bit leu nok Kores di nibou ndig Persia nicuk yoti.2. Mben Yahudi ikinding TUHAN De Ig ei minu ndig Yerusalem bipiga leu api ippu hum kin midut nikuk yok bak Allah eisi hanyen.3. Ari bingwam mang bibor bu lene mben Yahudi nimpung gom kin bu ingkwei hanyen kwei ei minu ndig Yerusalem. Imam Ezra di ningon ki tut Allah nicukti di tug hon Musa bie tut yo dima kwei leu api Ezra mpu yok leu binhyepo ippu hum kin midut nikuk no bak Allahti kin nibon midut ningon kwes kin yamti hanyen leu binhyepo inyohou mun di bitut ninnei po iba yok kep leu idigup bat-idigai bat nya.
Nirop Ninda Ndigsi
Nimpung gi nigom ingkwei hanyen leu ingkiaisi 1:1--2:70
Iwin TUHAN De Ig hanyen bipiga cem 3:1--6:22
Ezra bie tut nimpung gom kin bu ba, ingkwei hanyen leu ingkiaisi 7:1--10:44
Kores sindui sut ba, timiei Yehuda nya ingkwei hanyen ug ei itimieisi
1
1 Mpe dino Nibou Ndig Kores sindi ninyeng tak kep mben Persia mem ari bingwam gom lene TUHAN bindei ba, nihyet po Nabi Yeremia tri tut gi nipou pima hagom dem igbit nipaisi. TUHAN pingok ei Kores ningonti leu binhyepo tri tut ningon kanti tug hon srat gom di nide limwa nya ikwop kep nyen bidem minu di Kores ninyeng tak kepti nya hagom. Noni pai biyok,2 <<Da di Nibou Ndig Kores dinyeng tak kep mben Persia ba, ditri tut dicuk jeti. TUHAN di nok Allah di ninyeng tak kep gwamti bindei ba, dinyeng tak kep tungwatu bidem dihyeisi dini hagom. Noni cuk da leu binhyepo diwin Ig nibousi gom mem Noni ei minu ndig Yerusalem ei hanjop Yehuda. 3 Handei kon ba, Allah ningat rin bit je di jinok Nide limwa nya. Suar jingkwei hanyen ug ei minu ndig Yerusalem leu binhyepo jiwin TUHAN De Ig hanyen. Noni ne mben Israel ide Allah di ikuk yok bak ei minu ndig Yerusalem ri. 4 Gino Nide limwa nya di ibong ei ingkiaisi dini isuar mun di bahati tut yok kak imbutti lene suar ide ninttig-tta timiei Persia nya ikwas perak kin mas kin njita kin mindhe-ndhe mem ibikon ndigban eisi tut yok bitut mun di ibikuk yok bak TUHAN ei Nide Ig ei minu ndig Yerusalem dima cem.>>
5 Lene nibou di imbier kim nya di intun keret Yehuda kin Benyamin him kin imam nya kin keret Lewi nya kin bibikwop nindigsi di Allah pingok ingonti tu nya itin ei mem ingkwei hanyen ug ei minu ndig Yerusalem leu binhyepo iwin TUHAN De Ig hanyen. 6 Ide ninttig-tta timiei pima yok yahati tut yok ba, ikwas ndigban perak kin mas kin njita kin mindhe-ndhe mem ibikon ndigban eisi kin ndigban di nibok kui nindigsi nya tut yok bitut mun di ibikuk yok bak TUHAN ei Nide Ig cem.
7 Lene Nibou Ndig Kores tug bokor nya kin mok nya po Nibou Ndig Nebukadnezar pos leu TUHAN De Ig ei minu ndig Yerusalem bikon ei nide kwar nibousi pima hagom hanyen biyok. 8 Noni kes midyai dini ei Mitredat nindati. No dini ne nibou kintror mem mitiei minu dima di ya kui nibou ndig ri. Noni kwop igbit mun di nibou ndig mitug hanyen biyok nimangti bikes hagom ei Sesbazar di nibou Yehuda gom nindati. 9 Ndigban di iba mas bibon mem nibon midut nya nimangti ningot ningai. Ba, bokor di iba perak bibon mem nibon midut nya nimangti sribu gom. Lene bokor nindigsi nya nimangti nyatungwagom ba, muhwindatai. 10 Mok di iba mas bibon nimangti ningot ningai. Mok di iba perak bibon nimangti sratus bitai ba, simnai. Mun di iba mas kin perak bibon nindigsi nya nimangti sribu gom.
11 Mok di iba mas kin perak bibon kin nimbumbati nindigsi nya hagom nimangti sribu muhwi ba, sratus bitai bitut ndigban nindigsi nya di Sesbazar kin nisut bat ipwoi bijo leu ingkiaisi ei minu Babel bingkwei hanyen tut ug ei minu ndig Yerusalem.