Manasye di nok Nibou Ndig mem timiei Yehuda nya
(2Raj. 21:1-9)
33
1 Tirigi Manasye kui bigwam nok nibou ndig mem timiei Yehuda nya lene nide njap ug ei ari bingwam simnaibrimigcan tu ba, ninyeng tak kep timiei Yehuda nya kikau mem nijam ari bingwam ningot muhwi ba, muhwi ei minu ndig Yerusalem. 2 Manasye bon sisar tut TUHAN biyai bram mben di TUHAN jji yok leu minu Kanaan ei mpe di po mben Israel icoi ei minu pima igyai kepti di kinei bibor nya. 3 Noni win mpia di tungwatu nya ikuk yok bak kwar eisi nya po nicig Hizkia cok tut tu pima biwin hanyen ba, win nimbar hum dok nya cem mem gima tungwatu nya ikuk yok bak Baal eisi. Noni bibon kwar Sop Asyera nya bikuk no bak ham mpia-bbed him nya cem. 4 TUHAN pai ei su bipia minu ndig Yerusalem ne gumihyep di mem ikuk yok bak Allah eisi bijo ninno bijo kikau ri. Mbro nok gima lo, Manasye ngot nimbar hum dok nya mem kwar nya ei TUHAN De Ig. 5 Noni win nimbar hum dok mem gima kuk no bak ham mpia-bbed him nya eisi ei mpia di jo bas hak di iba ngug tig bikrop ttai ei TUHAN De Ig him nite hi nite hi cem. 6 Noni bui munggwom nide nya bikes bak kwar nya ei Mbang Briep Hinom dem kep nok mun di ibui bindig titut ei nimbar hum dokti ba, brim ningkek mem nung nya igyai kepti nya kin nipui mun tut nibirop hanyenti tug hon ham mpia-bbed him ba, bikan huk mun di ingat bou igyai him bi nya binggok tut ninnei di sibut nya leu binhyepo indo bindo binoni cem. Manasye bindei ba, TUHAN gga bibor tug hon nide sisar nindig bibor di noni bibon tut TUHAN. 7 Noni ttei kwar Sop Asyera ningwes bitas ei TUHAN De Ig. Noro Allah pai sut Nide Ig dima bak Daud kin nipmot Salomo nipou su. Noni pai <<Ditde Ig ei minu ndig Yerusalem di didimig ei leu keret Israel simnaibrimigcan ide hanjop nsi dini ne mpia di dindo ei nok gumihyep nibon midut eisi bak Dani ri. 8 Gino limwa mben Israel ibit Ditde nicukti nya hagom ba, ibiyai igbit niggai serti hagom di Ditde awak di Musa kes biyok tu nya lene midisindui sut yok ba, ide siceu nya mijji yok leu minu di diyai bak idigup bat-idigai bat nya dini bi.>> 9 Mbro nok gima lo, Manasye bindei ba, timiei Yehuda nya ibon kep sisar di kinei bibor nya dor tunggwei mben po TUHAN jji yok leu minu Kanaan ei mpe di po Nide limwa nya icoi ug ei minu dini pima ide sisar di ibon kep nya bu.Manasye ttin ser nide sisar bikiek ndam Allah
10 TUHAN pai kep Manasye kin nide limwa nya noro igimiap kep Nihyet bi. 11 Gima rino TUHAN bindei di nibou pran mben Asyur nya ikwei coi minu Yehuda di ihwen ug a. Lene iba simper nindig bipos Manasye ba, iba lante biteu nimig-ninda lene ikri ug ei minu Babel. 12 Tirigi Manasye tug ndei niwei-nidut dima rino om nonti ei TUHAN Allah Noho bei bingat nadi bak leu binhyepo TUHAN mikwei mpu no. 13 Lene Allah buhup nadi di Manasye ngat dima leu api bindei ngkwei noni hanyen kwei ei minu ndig Yerusalem leu binhyepo ninyeng tak kep timiei Yehuda nya hanyen bu. Tug hon mun di cut igkep noni dima lene ba ningon com bipia TUHAN ne Allah ri.
14 Niabiati bu lene Manasye bindei ba, ngug tig di jo Daud De Minu Ndig nisai ei nite bei mpia nitausi nanaisi kui bijo nai bu. Ba, kinyon ei nikinding ngug tig bijo nai dimati ei mpia ttou nsi gom ei mbang briep di jo dideu minyei bousi Gihon. Leu api binut kikau ug ei nite bei mpia nijjai ug bipek kin Dimbou Pmem Wau kin mpia di ijem Ofel. Noni kes nide nibou pran hi gom hi gom ba, ibong ser bikwop minu ndig di bon tentara nibousi di igya coi dima hagom ug. 15 Noni com mben ngkiai ide kwar ngot di ibon bou inda him kin ide kwar nya di nonti kes ei TUHAN De Ig hagom leu Ig dima ba, let nimbar hum dok ngot di nonti ngot mem kwar nya ei mbigdip di TUHAN De Ig joti kin gi jo ei mpia ttou nsi hiter nya ei minu ndig Yerusalem cem. Tungwatu nya ittei mumpiang dima yok hagom ug ei minu ndig nisai leu api icom bingwig hak. 16 Leu api Manasye nyohou kinding nimbar hum dok mem gima ibikuk yok bak TUHAN hanyen. Noni bindei ba, iba mindhe-ndhe di indig ei nimbar hum dokti dima bibon midut nibiyai ningon kwes kin TUHANti kin midut njita nibipai sigyo bak Noniti cem. Manasye bidip huk timiei Yehuda nya yahagom leu binhyepo ikuk yok bak TUHAN Allah Israel. 17 Mbro nok gino limwa nya ibui kep mindhe-ndhe bindig ei nimbar hum dokti ei mpia ttou nsi hiter nya bikuk yok eisi lo, mun di ibui di indig ei nimbar hum dokti dima ne mem TUHAN ri.
Manasye ninyeng tak kep ningwig honti
(2Raj. 21:17-18)
18 Nipui mun tut Manasye niyai munti nindigsi nya bitut nadi di noni ngat bak Allah kin Allah nihyet di nabi nya itri tut bak noni tug hon TUHAN Allah Israel ninyeng cem hagom jo ei srat Nibohon Nibou Ndig Mben Israel Nyati. 19 Manasye de nadi di ngat bak Allah bitut Allah nibuhup hanyenti bak kin nipai jit nide sisar di bon nya nipou tirigi ttin ser sisar di bon bigyo nya kin mpia di mem nikuk no bak kwar eisi di nonti ngot nya kin kwar ngot di nonti tas ei mem kwar Sop Asyera nya kin kwar nindigsi di kuk no bak nya cem nipas kepti hagom jo ei srat Nibohon Nabi Nyati. 20 Manasye mai leu api itig ei nibou ndig de ig him ba, nipmot Amon kui bigwam nok nibou ndig biya luei nohoti bu.
Amon di nok Nibou Ndig mem timiei Yehuda nya
(2Raj. 21:19-26)
21 Tirigi Amon kui bigwam nok nibou ndig mem timiei Yehuda nya lene nide njap ug ei ari bingwam nyatungwagom ba, can tu. Ninyeng tak kep bidem ari bingwam can ei minu ndig Yerusalem. 22 Noni yai bram nicig niyai munti nya ba, bon sisar tut TUHAN. Lene noni kuk no bak kwar nya di nicig kuk no bak nipou su nya ba, bui mindhe-ndhe bindig ei nimbar hum dokti bak kwar nya cem. 23 Noro Amon niyai munti nya ter leu nicig niyai munti nya lewo Amon om nonti ei TUHAN Noho bei ba, ngkwei hanyen ndam Noni bi. Nide sisar di bon nya dor tunggwei nicig nibon sisarti cem.