Nabi Mikha sok kep Ahab
(1Raj. 22:1-28)
18
1 Tirigi Nibou Ndig Yosafat nyeng tut ndigban ba, ninyeng bijei bibor tu lene ndo nide bat gom bak Ahab di nok nibou ndig mem mben Israel nide bat gom ba, iwak yam. 2 Ari bingwam poi ser lene Yosafat ug cem Ahab ei minu ndig Samaria. Ahab bon pesta bibindei ba, ibui domba kin kambir nya mang bibor nok mikwau tut Yosafat nya. Ba, bindo tut gi nibou cut bak Yosafat kin nide nimpung di ya tut nya. Ei nituti dima lene Ahab hwen Yosafat ningon leu binhyepo yahacem injei bihwen minu ndig Ramot ei hanjop Gilead. 3 Noni hig ser Yosafat <<Gino ace tut lene ma abit da ba, sinjei siceu mem gima sihwen minu ndig Ramot>>Lene Yosafat buhup <<Dice tut ba, side tentara nya mibicom yam nok gom ba, yahagom injei bikon pran bit timiei minu ndig dima. 4 Noro suar sihig ser TUHAN tut ningon kanti nipou ug e.>>
5 Leu api Ahab nduk nabi nya ibou sratus bitai kwei bihig ser yok <<Gino duug kon pran bit timiei minu ndig Ramot lene Allah mimpu da e, he bi e?>>
Lene ibuhup <<Aug kon pran bit yok hak ug lewo Allah mibindei ba, yo dima micut bak Na Di Andigpoi hak ug ri.>>
6 Noro Yosafat hig ser Ahab <<Nabi hiter di mihig ser Allah mem sa no rinaha bi e?>>
7 Lene Ahab buhup <<Nabi gom bu no rinaha. No dima ne Mikha di Yimla nipmot ri. Noro dingon mpo tut noni lewo noni mbot kep tut mun di pek kep ei nidipti bu di kei hi bitut da bi sren noro pai kep gi kinei-kinau ningkom.>>
Noro Yosafat buhup <<Aye! Ma apai nok gima au!>>
8 Lene Ahab hig nide awak gom kwei leu api cuk noni buug buwak Mikha haninyai kwei.
9 Mpe dima lene Ahab Yosafat nya isu yo ei ide sinsun nibou ndigti noyam ba, ibigwam tut ei banggo mbrei gom dip kui dimbou pmem nuhui ei minu ndig Samaria dideu mpia gom di tungwatu nya illet gandum ninjep leu nisinabai kikep eisi lo, nabi pima yok ikwei ya kui nibou ndig cin dima bimbot kep tut mun di mipek kep ei nidipti bu biyok. 10 Lene nabi Zedekia di Kenaana nipmot di ya tut nabi dima yok ba ngkimom nitu bibon mindhe nibou nggai nya leu api pai bak Ahab <<TUHAN pai <Mporo Na Di Andigpoi aya kep mben Siria ba, abindei sar yok tug hon mindhe nibou nggai di nok gini ug ri.> >> 11 Lene nabi nindigsi nya ice kep nihyet bipai <<Aya kep minu ndig Ramot ba, akon pran bit hak ug. Lewo Na Di Andigpoi mporo ahwen yok bitimek ug ri. TUHAN mibindei ba, aom kep ade siceu nya.>>
12 Lene no di ug buwak Mikha kwei pima hwen ningon bipai bak <<Nabi nindigsi nya yahagom imbot kep tut mun di mipek kep mem nibou ndig ei nidipti nok nibou ndig moom kep nide siceu nya. Suar na di andigpoi cem ambot kep tut mun di mipek kep mem nibou ndig ei nidipti di kei di noyam kin yoni ipaisi dima.>>
13 Noro Mikha buhup <<Diba neheng bipai mun brei tug hon TUHAN ninyeng bipia midipai sut Allah nicuk dati nya he!>>
14 Tirigi Mikha kwei ya ei Nibou Ndig Ahab noho bei lene nibou ndig hig ser <<Dani kin Nibou Ndig Yosafat nuug kon pran bit minu ndig Ramot ug e, he nuug au e?>>
Lene Mikha buhup <<Ma juug kon pran bit hak ug! Lewo Na Di Andigpoi mporo abindei timek yok. TUHAN mibindei ba, joom kep siceu nya bihigom.>>
15 Lene Ahab buhup <<Gino aba neheng bipai mun brei tug hon TUHAN ninyeng lene ma apai mun di igbit. Midisok kep na mbipig sut gima i?>>
16 Lene Mikha buhup <<Dikan huk tentara Israel di inang sinsiou nyen ei nungug dip nya. Tentara di inang sinsiou dima idem kep domba nya di ibon gembala di bie tut yok hi bi.>> Lene TUHAN pai sut yoni <<Yo dini ibon nibou di bie tut yok hi bi. Nna ba ingkwei hanyen kin gi ingwes ngun ug ei ide ig bei ug.>>
17 Leu api Ahab pai bak Yosafat <<Dipaisi pima igbit rin bi e? Noni mbot kep tut mun di mipek kep ei nidipti bu di kei hi mem da bi sren! Noro mbot kep tut mun di kinei kikau hak ug!>>
18 Lene Mikha pai bu <<Nogindini ma angig atingou mem TUHAN nihyet ug e! Dikan huk TUHAN gwam ei nide banggo mbrei dip ei gwamti brei bou diyai him lene nide malaikati nya yahagom igya kui Noni. 19 Lene TUHAN hig ser yok <Tou rima hwen Ahab ningon leu binhyepo ug kon pran bitug midut ei minu ndig Ramot ei hanjop Gilead i?> Lene malaikati dima yok ibuhupti nya ter leu yam, 20 kikau bibou ninnei gom kiju bidideu TUHAN lene pai <Dani rima duug hwen ningon a.> Lene TUHAN hig ser ninnei dima <Ma aris bak noni notou i?> 21 Lene ninnei dima buhup <Dani midicoi ug ei Ahab de nabi nya yahagom ingonti lene dibindei ba, yahagom iris mun bak Ahab.> Lene TUHAN buhup <Angon kanti dima kei. Ma aug yai nok gima hak ug lewo ade nihwen ningon dima mipek kep mem yok ug ri.> >>
22 Lene Mikha binut nihyet bu bipai <<Igbit! Mun dima rimipek kep a! TUHAN bindei ba, nabi di Na Di Anyeng Jei ade nya iris mun bina. Lewo TUHAN kos tut mem gima kes mun di buhun ei na dip tu.>>
23 Lene nabi Zedekia brim no biya kui Mikha leu api tem ningyoi bipai bak <<Notou rima TUHAN Ninnei kes da ei buug mbrap bit nani i?>>
24 Lene Mikha buhup <<Jei bi lene mun di bindo tut gima mijo nibreisi mem na tirigi anang ba, acoi ug ei nghim nsi gom ba, aku na nyahan eisi.>>
25 Lene Nibou Ndig Ahab cuk tentara gom bipia <<Akat noni ba, abuwak biya ei nibou Amon kin nipmot di Yoas yoho bei! 26 Disok dihyet ei na dip bak yoni leu binhyepo ibindei coi Mikha ei ig bui nsi hak ug. Lene ma ikwas njita kin ndia ngei di idut poi mien he tut noni bibou dingwes ngun bidingkwei hanyen leu Ramot ug e.>>
27 Lene Mikha pai binoni <<Gino Na Di Andigpoi angwes ngun ba, angkwei hanyen lene jo nibreisi bipia TUHAN nimbot kep tut mun di mipek kep ei nidipti bu tug hon da bi! Je di jingat rin ei sirini jahagom jintu kep duhui tut ba, jimiap dihyet ei jitingou nsi tu!>>
Ahab nimaisi
(1Raj. 22:29-35)
28 Leu api Ahab di nok nibou ndig mem mben Israel kin Yosafat di nok nibou ndig mem timiei Yehuda nya yuug kon pran bit timiei minu ndig Ramot ei hanjop Gilead. 29 Ahab pai bak Yosafat <<Midiluei ditta ba, midibon danti nok tentara nitu nya nipou ug e leu api sikon pran. Noro tut nani ne ade sinsun nibou ndig jo angkekti nok.>> Lene nibou ndig mben Israel bon nonti noyam kin tentara nitu nya tirigi noni sindi kon pran.
30 Lo bi lene nibou ndig mben Siria pingok nide nibou tentara ibou ningot ningai ba, can di iba kroba bikon pran nya ingonti leu binhyepo icut igkep hiter bi noro nibou ndig mben Israel nongkom he. 31 Tirigi yo dima ingat Nibou Ndig Yosafat lene ikan bigya noni ne nibou ndig mben Israel ri. Gima rino yahagom injei kep noni bipi bihwen. Noro Nibou Ndig Yosafat hara leu api TUHAN Allah mpu noni ba, kiek siceu di sindi injei kep dima ingwak him ndam mpia tou nsi hiter leu noni. 32 Tirigi nibou pran mben Siria nya di inyeng tak kep nimpung tentara di iba kroba pran bikon pran ngat lo, no dima ne nibou ndig mben Israel rin bi lene inda cut tut minggwen leu noni bihwen bi. 33 Noro tentara Siria gom kri nide tibor biprindei ugwai-gwai leu api tibor dima tibim hammi sinsun pran nibinut yamti bindei Ahab ningut. Leu api noni hara no di krau nide kroba pran tut no bipai <<Tibor ndei da tu! Akiek kroba pran tut da haninyai ba, abuwak da bidoom da leu pran nicutti dini.>> 34 Noro pran cig-cai bibor ser yok ba, bit bon yoom yok leu kan bi. Gima rino yahati Nibou Ndig Ahab biya niyati hak ei nide kroba pran dimati ba, ba noho rok tentara Siria kikau ba, mpia cutti lene ninnei kimbas.