Midut nipiga TUHAN De Ig
(1Raj. 8:62-66)
7
1 Tirigi Nibou Ndig Salomo ngat nadi leu su rino hum cut leu mpia-bbed him biyem mindhe-ndhe di ibui mem gima ibikuk yok bak TUHAN hagom. Leu api nipigati di piga kei di bindo tut TUHAN ningat rin ei gumihyep dima kieng kep TUHAN De Ig titut yam. 2 Apino bit bon imam nya icoi ug ei ninsi kan bi. 3 Tirigi limwa mben Israel ingat hum di cut kwei leu gwamti kin nipigati di piga kei di bindo tut TUHAN ningat rin ei gumihyep dima di kieng kep TUHAN De Ig titut yam bou igyai him lene injei yonti biba ingwak bikik dihyei noyam. Leu api inggei sut Allah ba, ikon ninyeng cem lewo Allah kei-kau-kei ba, ningon ngakei tungwatuti jo kikau buug hon nohonti bi sren. 4 Gima leu lene Nibou Ndig Salomo ya tut tungwatu nipmem ngat di idem yam ei dima bibui mindhe bindig ei nimbar hum dokti ba, ibikuk yok bak TUHAN. 5 Salomo kwas sapi ningut sribu ningot can bican lene domba ningut sribu sratus gom nyatungwagom tut yok. Lene ibui bindig hagom ei nimbar hum dokti bak TUHAN ba, ibibon midut nibiyai ningon kwes kin Allahti. Tug hon nisinati dima ne nibou ndig ya tut limwa nide di nipmem ngat dima ba, ibon midut nipiga ig di ikuk yok bak TUHAN eisi mem Noni. 6 Imam nya igya igyati ei mpia di indo mem yok ba, iba yoho rok Lewi nya di iba mun nyeng hi gom hi gom po Nibou Ndig Daud bon bou ninda him pima bikon TUHAN ninyeng ba, ipai doia <<TUHAN ningon ngakei tungwatu nyati jo kikau buug hon nohonti bi sren.>> Doia dima bit leu Daud nipingokti. Limwa nya yahagom igya igyati lene imam nya yuhui jo kep pun mbrei bimiep.7 Leu api Salomo piga mpia di jo bas hak di iba ngug tig bikrop ttai nite ninggimau ngat di jo ei TUHAN De Ig dima nuhui him ei mem TUHAN. Leu api bindei ba, ibon midut nibui mindhe-ndhe titut kin midut njita nibipai sigyo bak Allahti cem ba, indig mindhe-ndhe nimmau ndok ei gumihyep dima bak TUHAN nok nibon midut nibiyai ningon kwes kin Allahti gau noni kin limwa nide nya cem. Ibon midut nindig gima yok hagom titut yam ei mpia dima lewo nimbar hum dok ngkimom-tembaga di ibon ei su pima dem mem mun di ikwas di ibikuk yok bak TUHAN dima yok hagom bi.
8 Lene Salomo ya tut limwa mben Israel yahagom nyahan ba, ibon midut nibiyok ngon kep Njap Nindig Ig Jibei Mpam Meng ei ninsi njap muhwindacan. Yo di idem yam kep midut njap nindig dima nipmem ngat ba, ikwei leu minu ting bibor di Puig Hamat ei nite bei mpia nijjai kikau ug bipek kin minu Mesir niya kwas yamti ei nite bei mpia nibiho. 9 Idem yam ei ninsi njap muhwindacan kep midut nipiga nimbar hum dok. Leu api njap muhwindacan bu mem midut nibiyok ngon kep Njap Nindig Ig Jibei Mpam Meng. Lene ibon midut nibinggam kepti ei njap ningwigsi. 10 Njapti kui ne njap gi nyatungwagom ba, ningai ei bed gi nimuhwindacan rin leu api Salomo cuk yo ngot ndig dima bingkwei hanyen ug ei ide ig. Lene yahagom ingon kei sut mun nyeng di kei di TUHAN bon bak Nide limwa mben Israel kin Daud Salomo nya cem hagom.
TUHAN ndo Nonti bak Salomo hanyen bu
(1Raj. 9:1-9)
11 Tirigi Salomo ngot TUHAN De Ig kin nibou ndig de ig biput dem igbit nitin ei ningon kanti tutti leu su, 12 lene TUHAN ndo Nonti bak noni hanyen bu mem mmun bipai bak <<Dimiap ade nadi di angat tu ba, dice tut ig dini nok gumihyep mem gima ibui mindhe-ndhe bindig ei nimbar hum dokti bibikuk yok bak Dani. 13 Tirigino dikes biget bibut mem yok bi bidipinak hai ceng ba, igyem njita ei ide miaisi nya bingwig lene diba nsuwer ajar bihwen yok cem lo, 14 gino Ditde limwa di ikrau kep dinyeng dima ittin ser ibon munti di kinei bibor leu api yoom yonti ba, ingat nadi biDa lene ingkwei hanyen ndam Da lene midingig ditingou mem ide nadi di ingat biDani ei gwamti. Lene midikos ser ide sisar di ibon nya leu api dibindei ba, ide minu mpung tut nibong kei nigwam keisi hanyen bu. 15 Midiyok diyai kep Ditde ig dini kikau lene ditin ei mem gima dimiap kep nadi di ingat biDa ei gumihyep dini hagom. 16 Midibon mun nyeng dini yok hagom lewo didimig mpia dini pijum ei binok gumihyep di tungwatu ikuk yok bak Dani eisi bijo ninno bijo kikau. Midiyok diyai kep bidinyohou Ig dini bidem nijam hagom. 17 Gino adat acigti ba, ayai bram niyaisi ba, ayaijo dem igbit dingon kanti lene abit Ditde niggai serti nya ba, abit mun nyeng hagom di dicuk na tut nya, 18 lene midibindei bipek kep mun di dipreu ei mem acig Daud tu. Mun nyeng dima ne tungwagom leu nide nintun him yamti di bram yam nya ikieti mikui bigwam nok nibou ndig mem mben Israel sindam bijo ninno bijo kikau. 19 Noro gino aya tut ade limwa nya ba, jico tunggwei Ditde niggai serti kin nicukti nya ba, jikuk je bak nung nya, 20 lene mporo dibindei hei je leu minu dini di dikes bije tu. Lene midikes Ig di ditak buk kep nok gumihyep nikuk no biDa eisi dini ei bidimbut leu. Leu api tungwatu nya bidem minu miba ighyet bicig ig dini bipa tut cem.
21 Nogindini tungwatu nya yahagom idigit tut Ig nikuk no bak Dani eisi dini bibor. Noro mpe dima lene bikwop tungwagom-gom di mbut sir ig dini bingat bou niyai him lene mikit nibou leu. Leu api mipai <Nggon rino TUHAN bibon minu dini kin ig dini nok gima i?> 22 Leu api hiter mibuhup <Lewo iba inghim bak ide TUHAN Allah di buwak idigup bat-idigai bat nya di yehei leu minu Mesir. Leu api ikuk yok bak nung nya ba, ipreu ei mem yok bipia iba ingon di gom bibit yoni. Apino TUHAN bindei di hukum dini cut igkep yok.> >>