Daud tin ei mem gima ittei Brua Gi Preu kwei ei minu ndig Yerusalem
15
1 Mpe hi bu ne Daud ngot ig ningat poi mem nonti ei Daud De Minu Ndig bitin ei mpia ttou nsi gom mem Allah de Brua Gi Preu cem. Noni hok prak meng gom mem Brua dima ei mpia ttou nsi dima. 2 Lene noni tri tut <<Yo di intun keret Lewi him he rima ittei TUHAN De Brua Gi Preu dima lewo TUHAN Allah dimig yok ei habiei mem midyai dima ba, igyai midyai mem Noni nok Nide awak di ingon gomd bijo ninno bijo kikau.>> 3 Gima rino Daud nduk mben Israel yahagom kwei ei minu ndig Yerusalem mem gima ittei TUHAN De Brua Gi Preu kwei ei mpia ttou nsi di Daud tin ei mem tu. 4 Leu api noni nduk yo di intun Harun kin keret Lewi nya him ba, idem yam biyongkom. 5 Keret Lewi de nintun himti di idem yam ei nya inyeng rino Uriel di ntun Kehat ninsi de him di bie tut nide keret ibou sratus gom ningot can kwei. 6 Asaya di ntun Merari ninsi de him cem bie tut ibou sratus can ningot can kwei. 7 Yoel di ntun Gerson ninsi de him cem bie tut ibou sratus gom ningot ningai kwei. 8 Semaya di ntun Elsafan ninsi de him cem bie tut ibou sratus can kwei. 9 Eliel di ntun Hebron ninsi de him cem bie tut ibou ningot muhwindaningai kwei. 10 Aminadab di ntun Uziel ninsi de him cem bie tut ibou sratus gom simnaibrimigican kwei.11 Leu api Daud jem Imam Zadok Abyatar nya kin keret Lewi ibou muhwindagom di inyeng rino Uriel kin Asaya kin Yoel kin Semaya kin Eliel kin Aminadab kwei, 12 bipai biyok <<Jeni ne nibou mem jide bat nya di intun keret Lewi him ri. Gima rino suar jeni kin keret Lewi nindigsi nya jibon midut nipiap jenti bipwoi. Leu api jittei TUHAN Allah Israel De Brua Gi Preu kwei ei mpia ttou nsi di ditin ei mem tu. 13 Nipou yo tirigi tungwatu nya ittei brua pima lene jiya tut nye ei mpia ttou nsi dima bijittei bi. Apino ide TUHAN Allah kes hukum ei nyeni dip lewo ikuk nye bak Noni dem igbit ningon kanti bi.>>
14 Gima rino imam nya kin Lewi nya ibon midut nipiap yonti bipwoi leu api yuug ttei TUHAN Allah De Brua Gi Preu dima kwei. 15 Tirigi ittei brua dima kwei lene iba ug can bikon ei inghat dip leu api ittei sut ba, ibibit leu TUHAN nikos tutti di yai bak Musa nipou su.
16 Daud cuk nibou Lewi dima yok leu binhyepo indo ibou poi leu ide keret mem gima ipai doia ba, ibikek nggong mbrei kin yeng beng ngkimom-tembaga di ibui cem ba, ibipai doia niyai nillei cem. 17-21 Idimig yo di ipai kep doia ei ide ig bei nsi nya bimbus yok mem gima ibui yeng beng ngkimom-tembaga. Yo dima inyeng Heman di Yoel nipmot kin nide bat nya. Nide bat nya dima inyeng Asaf di Berekhya nipmot kin Etan di Kusaya nipmot leu Merari ninsi de. Lene idimig yo di intun keret Lewi him di inyeng rino Zakharia kin Yaaziel kin Semiramot kin Yehiel kin Uni kin Eliab kin Maaseya kin Benaya ei mem gima ibicom yam bit yok ba, ikek kep nggong mbrei di nihyet mien nya. Idimig Matica kin Elifele kin Mikneya kin Azazya kin yo di igya ser TUHAN De Ig ibou can di inyeng rino Obed-Edom kin Yeiel mem gima ikek kep nggong mbrei nya di nihyet ndig.
22 Idimig Kenanya binok nibou di bie tut yo di intun Lewi him di iba musik bipai doia lewo ningon ki tut gi ba musik bipai doia nya. 23-24 Idimig Berekhya kin Elkana kin Obed-Edom kin Yehia yoni ei mem gima igya ser TUHAN De Brua Gi Preu ba, idimig imam nya. Idimig Sebanya kin Yosafat kin Netaneel kin Amasia kin Zakharia kin Benaya kin Eliezer ei mem gima imiep pun mbrei ba, ibibie Brua Gi Preu noho.
Ittei TUHAN De Brua Gi Preu kwei ei minu ndig Yerusalem
(2Sam. 6:12-22)
25 Leu api Daud njei sut nibou mben Israel kin nibou tentara nya ba, yuug ei Obed-Edom de ig mem gima ittei Brua Gi Preu kwei ba, ibon midut di nindig bibor cem kep. 26 Ibui sapi nikre ningut muhwindacan kin domba ningut muhwindacan ba, ibikuk yok bak Allah lewo Noni sindem tut Lewi nya ba, ittei Brua Gi Preu dima kwei su. 27 Mpe dima lene Daud juk sinsun ndok di jei di iba minghas di nggriu-nggrop kei bibon. Lene yo di iba musik bipai doia kin Kenanya di nok nibou mem yok kin Lewi nya di ittei Brua Gi Preu dima cem ijuk sinsun di noyam kin gi Daud juk. Daud juk sinsun nisrak di ninyeng efode cem. 28 Mben Israel yahagom injei nyahan bit Brua Gi Preu dima kikau ba, ikwei krau minu ndig Yerusalem kep. Lene iba ingon di llei bimbos-hi-mbos cem imiep pun mbrei nicun nya kin nijei nya cem ibui yeng beng ngkimom-tembaga cem ikek nggong mbrei nya cem.
29 Tirigi ittei brua dima ba, sindi ibicoi minu ndig lene Saul nipmisop Mikhal su no kendera mihyeti bingat Nibou Ndig Daud di bien-bien nyen leu api ba ningon di nggei-hi-nggei bingon-mingon cem. Apino Mikhal koi nuhwap tut noni.