Ittei Brua Gi Preu leu Kiryat-Yearim kwei ei minu ndig Yerusalem
(2Sam. 6:1-11)
13
1 Nibou Ndig Daud mbrap bit nide nibou tentara di ibie tut nimpung tentara ibou sribu gom nya kin nimpung sratus gom nya yahagom. 2 Leu api pai bak yo dima yahagom <<Gino jice tut ba, ide TUHAN Allah joi sut cem lene midikes dihyet bak imam nya kin Lewi nya di ibong bidem ide minu mien nya kin nye di mben Israel nindigsi nya yahagom cem leu binhyepo induk yam kwei ba, idem yam bit nyeni ei sirini. 3 Leu api yuug yai Allah de Brua Gi Preu di iba igyai ngat di jo-jo wai hak ei nijoti mem nijam po Nibou Ndig Saul ninyeng tak kep limwa nya pima.>> 4 Lene mben Israel di idem yam ei mpia dima yahagom ingon kei sut nibou ndig ningon kanti dima ba, ice tut.5 Daud nduk mben Israel bidem minu hagom kwei ba, yahagom idem yam. Binduk yok hon Mesir de minu niya kwas yamti ei bei mpia nibiho kikau bipek kin puig Hamat ei bei mpia nijjai mem gima yuug kon Allah de Brua Gi Preu pima kwei leu Kiryat-Yearim ba, ittei kwei ei minu ndig Yerusalem. 6 Leu api Daud ya tut yok ba, yuug ei minu ndig Baala di ninyeng hi Kiryat-Yearim ei keret Yehuda ide hanjop nsi leu binhyepo ikon Brua Gi Preu kwei. Ijem Brua Gi Preu dima ninyeng hi TUHAN di kui bigwam ei banggo mbrei di jo nai kerub nya dip. 7 Tirigi yuug krau Baala lene ikon Brua Gi Preu dima leu Abinadab de ig ba, ibindei kui ei kroba di nijep-jau gom di sapi nya ikri dip. Leu api Uza kin Ahyo ibram kroba dima leu binhyepo yahati tut. 8 Lene Daud kin mben Israel yahagom ibien-bien nyen ba, ibingon mingon ser. Lene iba ingon di llei bibor bikon Allah ninyeng ba, ibikek nggong mbrei kin ndug-ndug kin yeng beng ngkimom-tembaga di ibui kin pun mbrei cem.
9 Tirigi yuug krau Kidon de mpia ttou nsi gom di ico kep gandum eisi lene sapi nya di ibrim kroba tut Brua Gi Preu dima idilleu sut. Gima rino Uza su ninda bikat Brua dima leu binhyepo cut au. 10-11 Hammi tirigi noni yai nok rino TUHAN gga Uza hak lewo niyai munti dima dem kep nok ningkek ndok tut TUHAN. Leu api TUHAN yai nimai bak noni hak ei nikrau bruati dima. Hon njap dima kwei lene ijem mpia dima ninyeng Peres-Uza. Lene Daud gga tut gi TUHAN bindei di Uza mai hak nok gima. 12 Noro Daud ttin tut TUHAN bipai <<Notou mem gima dittei Brua Gi Preu dima i?>> 13 Apino dem tut gima Daud ttei Brua Gi Preu dima ug ei minu ndig Yerusalem bi. Noro kes bijo hak ei Obed-Edom di timiei minu ndig Gat de ig. 14 Brua dima jo kikau ei sirima mem nijam bed ningai. Lene TUHAN njei mun di kei bak Obed-Edom kin nide ig bei nsi nya bitut mun di nyeng tut nya hagom cem.