Daud kui bigwam nok nibou ndig mem mben Israel kin timiei Yehuda nya
(2Sam. 5:1-10)
11
1 Mpe dima lene nibou mben Israel yahagom ikwei ngat Daud ei Hebron ba, ipai bak <<Nyeni nimbier kim Na Di Anyeng Jei. 2 Na Di Anyeng Jei rino attei nibou tut tentara Israel bikwop mpe di injei mem gima ikon pran habiei nipou cem mpe di Saul ninyeng tak kep nye cem. Nok gima cem Na Di Anyeng Jei ade TUHAN Allah preu ei su bipai mporo akui ba, agwam nok nibou ndig ba, abie tut Nide limwa nya.>> 3 Gima rino Daud kiju di bon gi preu bit nibou mben Israel leu api ita noni binok nibou ndig mben Israel dem igbit TUHAN nipreu ei tug hon Samuelti nipou su.4 Mpe di gom ne Nibou Ndig Daud ya tut tentara Israel yahagom ba, yuug hwen minu ndig Yerusalem. Mpe dima lene ijem minu ndig Yerusalem ninyeng minu ndig Yebus. Timiei ngat di ibong ei minu ndig dima rino mben Yebus.
5-7 Mben Yebus ipai bak Daud bipia noni micoi ug ei ide minu ndig biyati bi sren. Noro Daud coi biyai ide tentara nibousi di igya coi di sindem bibor ei Sion biyati ug. Mpe dima lene noni pai bak nide limwa di ibit yahagom bipia noni mikon no di miyai nimai bak mben Yebus gom ngat ei nimbie him ngat binok nibou tentara. Lene Yoab rino coi di hwen mben Yebus nimbie him ngat a. Gima rino Daud kon noni nok nibou tentara mem mben Israel kin timiei Yehuda nya. (Yoab nipmem ninyeng Zeruya.) Tirigi Daud co kep tentara nibousi di igya coi ei Sion pima nisindemti leu su lene noni bong eisi. Gima rino ijem mpia dima ninyeng Daud De Minu Ndig habiei leu mpe dima tu. 8 Lene Daud win minu ndig di Yerusalem dima hanyen. Noni kinyon eisi ei mpia di injei dihyei kep mbang briep gom di jo nungug nitta dima nite bei mpia nipriti. Leu api Yoab bindei ba, iwin minu ndig dima kikau biput kep. 9 Daud de nisindemti kum eisi kikau. Lewo TUHAN Di Sindem Bibor mpu noni.
Daud de nihwen mun cig di inyeng jei nya
(2Sam. 23:8-39)
10 Yo dini ne Daud de nibou tentara di isindem bibor nya inyeng ri. Ibie tut mben Israel ba, ikon pran kikau leu binhyepo Daud kui bigwam nok nibou ndig bipek kep mun di TUHAN preu ei mem no nipou su. Yo dini yahati tut Daud ninyeng tak kep limwa nyati cem.
11 Nibou tentara gi nigom ninyeng Yasobam. Yasobam ne mben Hakhmoni ri. Noni ne nibou di bie tut tentara di inyeng Nihwen Mun Cig Ibou Ningai ri. Mpe di gom di ikon pran bit yam lene noni kiju bihwen siceu nya ibou sratus ningai ba, imai hak tug hon nide micim di srer bijo nindati. 12 No di nican di coi bit Nihwen Mun Cig Ibou Ningai dima ninyeng Eleazar di Dodo nipmot di kwei leu Ahohi ninsi de. 13-14 Tirigi ikon pran bit yam ei Pas-Damim lene noni tti kin Daud bihwen mben Filistin. Tirigi tentara Israel ipi binang lene noni ya ngkiem tut nide limwa nya ei miai gandum nghousi ninggimau yon ba, yahau mem yok tirigi ihwen mben Filistin. Nok leu api TUHAN bindei ba, Eleazar hwen bitimek siceu imang bibor dima.
15-16 Mpe di gom bu ne Daud de nibou tentara ibou ningai leu nibou tentara ibou ningot ningai di inyeng jei nya ikieti yuug ngat Daud di bong ei dikti simiak nungug tig gom dideu hak mihyeti Adulam. Mpe dima lene tentara Filistin yohok ide prak meng yati ei Mbang Briep Refaim ba, nimpung tentara di ide nya gom icoi Betlehem ba, igyai bigyati. 17 Daud wei minu bei nide bipai <<Ayo! Handei kon ba, tungwa hi ug ei minyei bousi dideu dimbou pmem ei Betlehem bitau minyei kwei bididut ug o!>> 18 Lene nibou tentara ibou ningai dima imiap nihyet dima. Gima rino isu yok nyahan sin mben Filistinti ei ide prak meng yati bitau minyei leu minyei bousi pima leu api ittei kwei bak Daud. Noro Daud dut minyei dima bi. Noni kiber nok midut nikwas mun tut TUHAN ba, 19 pai bipia <<Deheng bitug hon TUHAN ninyeng bipia mididut minyei dini bi sren! Gino didut minyei dini lene dem kep nok didut yo di inggok imai eisi mem da inggrom ri!>> Gima rino Daud kou sut gi dut minyei dima bibor. Gima ne tentara Nihwen Mun Cig ibou ningai di mimbri kui ingkek bibor dima ide nibon mun nyeng gomti ri.
20-21 Nibou tentara ibou ningot ningai di inyeng jei dima ne ijem yok <Nihwen Mun Cig Ibou Ningot Ningai> ba, Abisai di Yoab nikijoi rinok nibou mem yoni. Abisai ba nide micim biyai nimai bak ibou sratus ningai leu api tug ndei ninyeng di jei tug hon nibon munti dima. Noro tug ndei ninyeng jei noyam kin Nihwen Mun Cig Ibou Ningai pima bi.
22 Nibou tentara di ninyeng jei hiter bu ninyeng rino Benaya di Yoyada nipmot di mben Kabzeel. Mimbri kui ningkek bibor apino yai nimai bak mben Moab ide nihwen mun cig ibou can di inyeng jei. Mpe hi bu tirigi es kin hou cut lene noni hwen singa ningut gom ei dihyei mihyeti bibui ei sirima. 23 Mpe hi bu lene yai nimai bak mben Mesir di nintig bou anjan bibor gom cem. No dima nintig bou jeisi njiriek leu meter can bittei micim di nindig bibor. Noro Benaya ba tom nibibui he di jo nindati bihwen noni. Leu api su ninda bibrim micim di mben Mesir dima ttei leu noni leu api ba micim dima bidat nonti hanyen biyai nimai bak hak ug. 24 Tug hon nisinati dima ne Benaya brim ningkek bibor bitug ndei ninyeng jei. Noni cem nggre kin Nihwen Mun Cig Ibou Ningot Ningai pima. 25 Benaya rino ninyeng jei njiriek nindigsi nya ei nimpung dima. Noro nide nisindemti dor tunggwei Nihwen Mun Cig Ibou Ningai pima bi. Daud kon Benaya binok nibou mem yo di icuon nonti niyaisi pijum hak nya.
26-47 Nibou tentara di inyeng jei nindigsi nya inyeng rino Asael di Yoab nikinjoi kin Elhanan di Dodo nipmot leu Betlehem kin Samot leu Harod kin Heles leu Peloni kin Ira di Ikes nipmot leu Tekoa kin Abiezer leu Anatot kin Sibkhai leu Husa kin Ilai leu Ahohi kin Maharai leu Netofa kin Heled di Baana nipmot leu Netofa kin Itai di Ribai nipmot leu Gibea leu hanjop Benyamin kin Benaya leu Piraton kin Hurai leu mbang briep Gaas nya kin Abiel leu Araba kin Azmawet leu Bahurim kin Elyahba leu Saalbon kin Hasyem leu Gizon kin Yonatan di Sage nipmot leu Harari kin Ahiam di Sakhar nipmot leu Harari kin Elifal di Ur nipmot kin Hefer leu Mekherati kin Ahia leu Peloni kin Hezrai leu Karmel kin Naarai di Ezbai nipmot kin Yoel di Natan yoni icig gom kin Mibhar di Hagri nipmot kin Zelek leu minu Amon kin Naharai leu Beerot di ttei kep Yoab de minggwen nya kin Irai kin Gareb leu Yetri kin Uria leu minu Het kin Zabad di Ahlai nipmot kin Adina di Siza nipmot (di ntun keret Ruben him ba, bie tut tentara nya ibou ningot ningai) kin Hanan di Maakha nipmot kin Yosafat leu Mitni kin Uzia leu Asytarot kin Syama kin Yeiel di Hotam nipmot bat cin leu Aroer kin Yeiel kin Yoha di Zimri nipmot bat cin leu Tizi kin Eliel leu Mahawim kin Yeribai kin Yosawya di Elnaam nipmot bat cin kin Yitma leu minu Moab kin Eliel kin Obed kin Yaasiel yok leu Mezobaya.